គ្រោះធម្មជាតិបំផ្លាញផ្ទះជិត២ពាន់ខ្នង និងសម្លាប់ជីវិតមនុស្ស-សត្វពាហនៈជាច្រើន
- បន្ទាយមានជ័យ
ខេត្តបន្ទាយមានជ័យ ៖ លោកឧបនាយករដ្ឋមន្ត្រី កែ គឹមយ៉ាន អំពាវនាវមន្ត្រីរាជការ និងកងកម្លាំងប្រដាប់អាវុធសប្បុរស់ជួយខេត្តបន្ទាយមានជ័យដែលប្រជាពលរដ្ឋរងគ្រោះដោយខ្យល់កន្ត្រាក់ប៉ះពាល់ខូចខាតប្រមាណជិត២ពាន់ខ្នង ហើយរន្ទះបាញ់បណ្តាលឱ្យស្លាប់មនុស្ស៣នាក់ និងសត្វពាហនៈចំនួន៣ក្បាល។
ក្រោយពេលខេត្តបន្ទាយមានជ័យរងគ្រោះដោយធម្មជាតិមានដូចជាខ្យល់កន្ត្រាក់បណ្តាលឱ្យប៉ះពាល់ខូចខាតផ្ទះសំបែងប្រជាពលរដ្ឋទាំង៩ស្រុក-ក្រុងអស់ប្រមាណជិត២ពាន់ខ្នង ហើយរន្ទះបាញ់បណ្តាលឱ្យស្លាប់មនុស្សចំនួន៣នាក់រួចមក លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀននិងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យបានអំពាវនាវតាមរយៈផេកផ្លូវការរបស់លោកថា «សូមអំពាវនាវដល់មន្ត្រីរាជការ កងកម្លាំងទាំងបីស្ថាប័ន និងសប្បុរសជន សូមចូលរួមជាមនុស្សធម៌ដើម្បីជួយដល់ប្រជាពលរដ្ឋដែលរងគ្រោះដោយខ្យល់កន្ត្រាក់ចេះតែកើនឡើងជារៀងរាល់ថ្ងៃ សូមអតគុណទុកជាមុន»។
ក្នុងបញ្ជីរាយនាមអ្នកដែលចូលរួមជួយពលរដ្ឋគ្រោះខាងលើរួមមានមន្ត្រីរាជការនិងកម្លាំងប្រដាប់អាវុធនិងសប្បុរសជនក្នុងខេត្ត និងក្រៅខេត្តបានថវិកាចំនួន២.៣០០.០០០រៀល និងប្រាក់ដុល្លាចំនួន១.០០០ដុល្លារ និងក្រុមការងារចលនាយុវជនកម្ពុជា(ក្រុម១៥៧)សាខាខេត្តបន្ទាយមានជ័យចូលរួមចំនួន៥០០.០០០រៀល និងប្រាក់ដុល្លារចំនួន២២០ដុល្លារ។
ដោយយោងតាមរបាយការណ៍គណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យចាប់ពីថ្ងៃទី១ ដល់២៦ ខែមេសា ឆ្នាំ២០១៩នេះ ខេត្តបន្ទាយមានជ័យរងគ្រោះដោយធម្មជាតិខ្យល់កន្ត្រាក់ប៉ះពាល់ទាំង៩ស្រុក-ក្រុងបណ្តាលឱ្យរងការខូចខាតផ្ទះសំបែងប្រជាពលរដ្ឋអស់ចំនួន១.៣១៨ខ្នង និងបណ្តាលឱ្យស្លាប់មនុស្សចំនួន៣នាក់ ព្រមទាំងសត្វពាហនៈចំនួន៣ក្បាល។
ចាប់ពីថ្ងៃទី១ ដល់១៧ ខែមេសា ឆ្នាំ២០១៩ ខ្យល់កន្ត្រាក់បណ្តាលឱ្យប៉ះពាល់ និងខូចខាតផ្ទះសំបែងរបស់ប្រជាពលរដ្ឋចំនួន៤៣៧ខ្នង ក្នុងនោះរងការខូចខាតធ្ងន់ធ្ងរចំនួន១០ខ្នង រន្ទះបាញ់បណ្តាលឱ្យស្លាប់មនុស្ស១នាក់ ហើយរន្ទះបាញ់បណ្តាលឱ្យឆេះផ្ទះអស់១ខ្នង សាលារៀនចំនួន៣ខ្នង និងឃ្លាំងដាក់សម្ភារៈផ្សារអូរស្ងួតចាស់១ខ្នងតំលៃជាង១០ម៉ឺនដុល្លារ បានកើតមានឡើងក្នុង ក្រុងប៉ោយប៉ែត ស្រុកម៉ាឡៃ ស្រុកមង្គលបូរី ស្រុកស្វាយចេក ស្រុកព្រះនេត្រព្រះ ស្រុកភ្នំស្រុក ក្រុងសិរីសោភ័ណ។
ថ្ងៃទី១៨ដល់២០ខែមេសាឆ្នាំ២០១៩រងគ្រោះដោយខ្យល់កន្ត្រាក់បណ្តាលប៉ះពាល់ខូចខាតផ្ទះសំបែងចំនួន៥៥ខ្នងវត្តចំនួន១ខ្នង សាលាឆទាន១ខ្នង រោងចិញ្ចឹមត្រី១ខ្នងប៉ះពាល់មានស្រុកស្វាយចេក ស្រុកអូរជ្រៅ ស្រុកភ្នំស្រុក។
ថ្ងៃទី២១ដល់២២ខែមេសា ឆ្នាំ២០១៩ រងគ្រោះដោយខ្យល់កន្ត្រាក់បណ្តាលប៉ះពាល់ខូចខាតផ្ទះសំបែងប្រជាពលរដ្ឋចំនួន៣៤៤ខ្នងខូចធ្ងន់ធ្ងរចំនួន៣៧ខ្នងមានសាលារៀន៣ខ្នង រោងដាក់ត្រាក់ទ័រ១ខ្នង រន្ទះបាញ់ស្លាប់២នាក់។
ថ្ងៃទី២៥ដល់២៦ ខែមេសា ឆ្នាំ២០១៩រងគ្រោះដោយខ្យល់កន្ត្រាក់បណ្តាល់ប៉ះពាល់ខូចខាតផ្ទះសំបែងប្រជាពលរដ្ឋចំនួន៤៨២ខ្នងខូចខាតធ្ងន់ធ្ងរចំនួន៥៨ខ្នង រោងម៉ាស៊ី១ខ្នង វត្ត២ខ្នង សាលារៀន៣ខ្នង។
នៅថ្ងៃទី២៧ដល់២៨ខែមេសាឆ្នាំ២០១៩នេះខេត្តបន្ទាយមានជ័យរងគ្រោះដោយខ្យល់កន្ត្រាក់បណ្តាលប៉ះពាល់ខូចខាតអស់ប្រមាណជាង២០០ខ្នងដែលប៉ះពាល់ស្រុកមង្គលបូរីនិងស្រុកព្រះនេត្រព្រះនិងស្រុកភ្នំស្រុក ៕
ចែករំលែកព័តមាននេះ