ខេត្តព្រះសីហនុ ៖ ចាប់បង្គាស្រស់មានសារធាតុគីមីជិត១តោន នាំចូលពីវៀតណាមត្រូវបានបង្ក្រាបដោយកំលាំងចម្រុះកាលពីវេលាទៀបភ្លឺថ្ងៃទី២៧ មេសា ឆ្នាំ២០១៩ បន្ទាប់ពីឈ្មួញនាំចូលតាមច្រកព្រំដែនកម្ពុជា-វៀតណាម ច្រកព្រែកចាក ចូលមកលក់ចែកចាយនៅតាមទីផ្សារនានាក្នុងក្រុងព្រះសីហនុ។ លោក…
ខេត្តព្រះសីហនុ ៖ ចាប់បង្គាស្រស់មានសារធាតុគីមីជិត១តោន នាំចូលពីវៀតណាមត្រូវបានបង្ក្រាបដោយកំលាំងចម្រុះកាលពីវេលាទៀបភ្លឺថ្ងៃទី២៧ មេសា ឆ្នាំ២០១៩ បន្ទាប់ពីឈ្មួញនាំចូលតាមច្រកព្រំដែនកម្ពុជា-វៀតណាម ច្រកព្រែកចាក ចូលមកលក់ចែកចាយនៅតាមទីផ្សារនានាក្នុងក្រុងព្រះសីហនុ។
លោក នៅ តុន អនុប្រធានសាខាកាំកុងត្រូលខេត្តព្រះសីហនុ បានផ្តល់សម្ភាសន៍ដល់កោះសន្តិភាពឱ្យដឹងថា មន្ត្រីស្ថាប័នលោកបានសហកាជាមួយកម្លាំងនគរបាលប្រឆាំងបទល្មើសសេដ្ឋកិច្ច នៃស្នងការដ្ឋានខេត្តព្រះសីហនុ បានចាប់ឃាត់រថយន្តមួយគ្រឿងដឹកបង្គាស្រស់ចំនួន៤៥កេស ទម្ងន់៩០០គីឡូក្រាម មានផ្ទុកសារធាតុគីមីហាមឃាត់ ដែលឈ្មួញនាំចូលពីប្រទេសវៀតណាម ចូលតាមច្រកព្រំដែនកម្ពុជា-វៀតណាម ច្រកព្រែកចាក ខេត្តកំពត យកមកដុតកម្ទេចចោលភ្លាមៗផងដែរ។
លោកអនុប្រធានសាខាកាំកុងត្រូលខេត្តព្រះសីហនុបន្តថា បង្គាស្រស់ទាំងនោះ បន្ទាប់ពីមន្ត្រីសាខាកាំកុងត្រូលខេត្តព្រះសីហនុ បានធ្វើការត្រួតពិនិត្យរកឃើញមានដាក់លាយសារធាតុគីមី មានសណ្ឋានដូចចាហួយ ត្រូវបានម្ចាស់ទំនិញដាក់លាយនៅក្នុងបង្គាស្រស់ទាំងនោះ។
លោកអនុប្រធានសាខាកាំកុងត្រូលខេត្តព្រះសីហនុបន្តថា បង្គាស្រស់មានលាយសារធាតុគីមីទាំង៤៥កេះ ត្រូវបានយកមកដុតកម្ទេចចោលភ្លាមៗនៅក្នុងបរិវេណសាខាកាំកុងត្រូកខេត្តព្រះសីហនុកាលពីព្រឹកថ្ងៃទី២៧ ខែមេសា ឆ្នាំ២០១៩នេះ។ ក្នុងនោះ មន្ត្រីជំនាញ ក៏បានតម្រូវឲ្យម្ចាស់រថយន្តដឹកបង្គា និងជាតំណងឲ្យម្ចាស់ទំនិញ ធ្វើកិច្ចសន្យាបញ្ឈប់នាំចូលបង្គា មានសារធាតុគីមីទាំងនោះ នាថ្ងៃខាងមុខទៀត។
ទាក់ទិននឹងបញ្ហានេះ លោក ជា ប៉ិច អនុប្រធានសាខាកាំកុងត្រូលខេត្តព្រះសីហនុ ក៏បានអំពាវនាវដល់ផ្នែកពាក់ព័ន្ធ ជាពិសេសក្រុមអាជីវករត្រូវចូលរួមសហការ និងបញ្ឈប់ការនាំចូល ឬដាក់លក់ទំនិញ បន្លែ ត្រីសាច់ ព្រមទាំងទំនិញផ្សេងៗទៀត ដែលមានដាក់សារធាតុគីមីហាមឃាត់ ដែលនាំឲ្យប៉ះពាល់ដល់សុខភាពអ្នកបរិភោគ។
លោកអនុប្រធានសាខាកាំកុងត្រូលខេត្តព្រះសីហនុបានបន្តថា ការនាំចូល ឬការទទួលលក់ទំនិញ និងចំណីអាហារខូចគុណភាព ឬមានលាយសារធាតុគីមី ដើម្បីឲ្យចំណីអាហារនៅស្រស់ និងរក្សាទុកលក់បានយូរ គឺជាអំពើខុសច្បាប់។ ហើយថា អ្នកជាប់ពាក់ព័ន្ធសកម្មភាពខាងលើ នឹងត្រូវប្រឈមមុខការផ្តន្ទាទោស បើមន្ត្រីជំនាញរកឃើញមានកំហុសឆ្គងធ្ងន់ធ្ងរ៕
ចែករំលែកព័តមាននេះ