រាជធានីភ្នំពេញ ៖ ធ្មេចបើកៗកូនប្រុសច្បងរបស់អតីតកីឡាករ អេ ភូថង ដែលត្រូវគេស្គាល់ថា ជាកូនទី២របស់លោក និងបានបណ្ដុះបណ្ដាលឱ្យចេះប្រដាល់តាំងពីក្មេង ពេលនេះអាយុបាន១៥ឆ្នាំហើយ ដោយកីឡាករវ័យក្មេងរូបនេះ ក៏មានមហិច្ឆតាចង់ស្នងតំណែងឪពុក ដើម្បីឡើងប្រដាល់រកប្រាក់ជួយឪពុកម្ដាយ និងក្រែងមានកេរ្តិ៍ឈ្មោះបោះសំលេងដូចឪពុកកាលពីមុននោះផងដែរ។
អ្នកស្រី សាំង សុម៉ាលី ភរិយាលោក អេ ភូងថង បានថ្លែងប្រាប់ថា កូនប្រុសច្បង ឬកូនទី២របស់ខ្លួន (បន្ទាប់ពីអេ យ៉ានុត) អត់មានឪពុកម្ដាយបង្ខំឱ្យប្រដាល់នោះទេ គឺគេបន់ឱ្យតែបានគេហៅឡើងប្រដាល់តែម្ដង ដើម្បីបានលុយជួយដល់គ្រួសារ។ អ្នកស្រីថា ថ្ងៃខ្លះឱ្យតែឮគេហៅឡើងរេញ គឺសុខចិត្តផ្អាករៀនមួយថ្ងៃ ឬ២ថ្ងៃ ដើម្បីហ្វឹកហាត ឬត្រូវហ្វឹកហាត់ទាំងយប់ក៏មាន ឱ្យគេផ្ដល់ឱកាស។
អ្នកស្រីថា កូនប្រុសច្បងរបស់អ្នកស្រីដែលមានឈ្មោះថា អេ អាំម៉ារីនភូថង រូបនេះ ភាគច្រើន ច្រើនតែងត្រូវគេហៅឱ្យឡើងវ៉ៃជំនួស ក្នុងពេលកីឡាករណាម្នាក់អវត្តមាន ឬខកខានឡើងរេញប៉ុណ្ណោះ។ ជាក់ស្ដែងនៅក្នុងព្រឹត្តិការណ៍ ជ្រើសរើសជើងឯករបស់ប៉ុស្តិ៍លេខ៥ TV5 Knock Out Series By K-Cement ត្រូវបានចូលប្រកួតនៅក្នុងព្រឹត្តិការណ៍មួយនេះ ដោយសារតែបេក្ខភាពមួយរូបអវត្តមានប៉ុណ្ណោះ ។
ហើយអ្នកស្រីសររសើរកូនប្រុសយ៉ាងខ្លាំង ដោយគ្រាន់តែឮគេឱ្យមកប្រកួតជំនួស គឺខំហ្វឹកហាត់អត់បាយអត់ទឹក ហើយអ្នកស្រីរឹតតែសរសើរទៅទៀត ដែលកូនប្រុសប្រកួតឈ្នះក្នុងជុំទី១ កាលពីថ្ងៃ៦ មេសា ដោយទៅប្រកួតបន្តក្នុងជុំទី២ ក្នុងពេលខាងមុខ។
អ្នកស្រីថា កូនច្បងរបស់ខ្លួន បើនិយាយពីអារម្មណ៍នៅក្នុងពេលនេះ គឺចង់រកលុយជួយគ្រួសារជាជាងចង់តស៊ូរៀនឱ្យបានខ្ពង់ខ្ពស់។ យ៉ាងណាមិញអ្នកស្រី នឹងតស៊ូមិនឱ្យកូនផ្អាករៀន ហើយតស៊ូប្រដាល់ចោលការសិក្សានោះទេ។ អ្នកស្រីថា ហេតុផលដែលកូនប្រុសរបស់អ្នកស្រី មិនសូវត្រូវបានគេផ្គូរផ្គងឡើងប្រដាល់ គឺដោយសារតែកូនប្រុសនៅក្មេងពេក ហើយម្យ៉ាងទៀតបទពិសោធន៍នៃការប្រកួតរបស់គេ ទើបតែបានប្រមាណជាង១០ដង គឺតិចមែនទែនដែលអ្នករៀបចំការប្រកួតចេះតែមិនចង់ដាក់។
ប៉ុន្តែអ្នកស្រីថា កូនប្រុសរបស់អ្នកស្រីមានឆន្ទៈចង់ប្រដាល់ខ្លាំងណាស់ ព្រោះគេយល់ថា មានតែបានប្រដាល់ប៉ុណ្ណោះ ទើបជួយរកលុយឪពុកម្ដាយបាន ដោយអ្នកស្រីពោលថា បើជីវភាពរាល់ថ្ងៃមានបានវិញ គឺមិនឱ្យកូនប្រុសវ័យទើប១៥ឆ្នាំប្រឡូកប្រដាល់នាំឱ្យប៉ះពាល់ដល់អារម្មណ៍ក្នុងការសិក្សានោះទេ ប៉ុន្តែមកពីខ្លួនក៏រកបានតែមួយគេៗដែរ ទើបកូនទារប្រដាល់មានតែរុញបន្ថែម៕
ចែករំលែកព័តមាននេះ