អន្តរជាតិ ៖ ក្រុមបាល់ទាត់ជម្រើសជាតិអង់គ្លេស នឹងទទួលបានការការពារយ៉ាងតឹងរ៉ឹងបំផុតជាមួយដែនការពារចំនួន ៣ ថ្នាក់ ស្ថិតនៅឯមូលដ្ឋានហ្វឹកហាត់ Swope Soccer Village ជាមជ្ឈមណ្ឌលកីឡាបាល់ទាត់ដ៏ធំមួយក្នុងទីក្រុងកាន់សាស់ (Kansas City) រដ្ឋមីស៊ូរី (Missouri) សហរដ្ឋអាមេរិក សម្រាប់ភារកិច្ចព្រឹត្តិការណ៍ FIFA World Cup ឆ្នាំ២០២៦។ វិធានការសុវត្ថិភាពទាំងនោះ រួមបញ្ចូលទាំងការតំឡើងរបាំងទប់ស្កាត់ការលបបាញ់ (Sniper) និងបច្ចេកវិទ្យាទប់ស្កាត់ដ្រូនទំនើបៗផងដែរ។ នេះបើយោងតាមប្រភពពីកាសែត The Sun បានចេញផ្សាយ។
សណ្ឋាគារស្នាក់នៅរបស់ក្រុមតោកំណាចអង់គ្លេស នឹងក្លាយជាបន្ទាយការពារនិម្មិតមួយ ដោយបែងចែកជា ៣ ផ្នែក (ផ្នែកខាងក្រៅ ជុំវិញ និងខាងក្នុង) ដែលហ៊ុមព័ទ្ធជុំវិញដោយរបាំងបេតុង និងផ្ទាំងការពារបិទបាំងទប់ស្កាត់ការលបបាញ់ដែលអាចកើតមាន។ លើសពីនេះ តំបន់ហាមឃាត់ប្រតិបតិ្តការអាកាសនឹងត្រូវអនុវត្ត ដើម្បីទប់ស្កាត់ការវាយប្រហារដោយដ្រូន តាមរយៈការបំពាក់កាំភ្លើងសម្រាប់កងការពារទុកបាញ់ផ្ដាច់ប្រព័ន្ធបញ្ជា និងរំខានសញ្ញាដ្រូន ហើយបញ្ជាការចល័តមួយនឹងត្រូវបានបង្កើតឡើងនៅទល់មុខនឹងសណ្ឋាគារ The Inn at Meadowbrook ផ្ទាល់តែម្តង។
ប៉ូលិសប្រដាប់អាវុធ កងកម្លាំងសន្តិសុខ និងឆ្មាំសន្តិសុខឯកជន នឹងល្បាតជុំវិញបរិវេណ សណ្ឋាគារនោះយ៉ាងតឹងរ៉ឹងបំផុត។ ផ្ទាំងបិទបាំងបន្ថែមទៀតនឹងត្រូវដំឡើង ដើម្បីការពារ និងបិទបាំងអ្នករស់នៅអាផាតមិនជាប់នោះប្រមាណ ៥០០នាក់ពីការមើលឃើញ ឬថតសកម្មភាពក្រុមដែលដឹកនាំដោយលោកគ្រូបង្វឹក Thomas Tuchel មួយនេះ រួមទាំងការពារសង្កាត់ទាំងមូលពីការរំខានពីខាងក្រៅផងដែរ។ ជាមួយគ្នាដែរ អាជ្ញាធរបានផ្ញើលិខិតទៅកាន់អ្នកទាំងនោះ ដើម្បីបង្ហាញពីផែនការសន្តិសុខដ៏តឹងរ៉ឹងនេះ។
កម្លាំងប៉ូលិសនឹងអមដំណើររថយន្តក្រុងក្រុមជម្រើសជាតិអង់គ្លេសទាំងទៅទាំងមក រវាងសណ្ឋាគារ កន្លែងហ្វឹកហាត់ ក៏ដូចជាពេលការប្រកួតផងដែរ។ សមាគមកីឡាបាល់ទាត់អង់គ្លេស (FA) អះអាងថាសុវត្ថិភាព និងសន្តិសុខកីឡាករ បុគ្គលិក និងក្រុមគ្រួសាររបស់ពួកគេ គឺជាអាទិភាពចម្បង ប៉ុន្តែវិធានការប្រុងប្រយ័ត្នអំឡុងពេលនៅសហរដ្ឋអាមេរិក ត្រូវបានពង្រឹងបន្ថែមទៀត។ ក្រុមសន្តិសុខផ្ទាល់របស់ FA ក៏នឹងបង្កើនការប្រុងប្រយ័ត្នខ្ពស់ផងដែរ។
គួរបញ្ជាក់ថា អង់គ្លេស ស្ថិតនៅក្នុងពូល L រួមជាមួយ ក្រូអាស៊ី ហ្កាណា និង ប៉ាណាម៉ា ដោយការប្រកួតនៅក្នុងពូលនេះ ចាប់ផ្តើមពីថ្ងៃទី១៨ ខែមិថុនា ឆ្នាំ២០២៦ តទៅ ដោយប្រកួតទាំងអស់របស់អង់គ្លេសធ្វើឡើងនៅទឹកដីសហរដ្ឋអាមេរិក៕
ចែករំលែកព័តមាននេះ