រកឃើញគូចុងក្រោយ ការប្រកួតជ្រើសរើសជើងឯកជុំទី១ហើយ
- ភ្នំពេញ
រាជធានីភ្នំពេញ ៖ ទើបតែបើកការប្រកួតរដូវកាលទី៥ កាលពីពេលថ្មីៗសោះ ធ្មេចបើកៗការប្រកួតជ្រើសរើសឯករបស់ព្រឹត្តិការណ៍ TV5 Knock Out Series By K-Cement ក្នុងប្រភេទទម្ងន់៥៤គីឡូក្រាមមួយនេះ ឈានដល់វគ្គបញ្ចប់ហើយសម្រាប់ជុំទី១ ក្នុងរដូវកាលថ្មីនេះ។ កីឡាករ៤រូប ត្រូវបានប្រកួតគ្នាយ៉ាងស្វិតស្វាញ ដោយកីឡាករ៤រូបបានឡើងប្រកួតគ្នាទម្លាក់២នាក់ ហើយកីឡាករមួយគូចុងក្រោយ ដែលជាគូបិទគូទក្នុងការបញ្ចប់វគ្គជម្រុះជុំទី១ ឆ្ពោះទៅប្រកួតវគ្គបន្ត។
ការប្រកួតក្នុងជុំចុងក្រោយនេះ ជំនួបកីឡាករគូទីបិទវគ្គ រវាងបង្គោលខៀវ និងបង្គោលក្រហម គឺពោរពេញឆាកយុទ្ធគុនយ៉ាងជក់ចិត្តយ៉ាងខ្លាំង។ បង្គោលក្រហមកីឡាករ ញឹម សារិទ្ឋ មកពីក្លិបអារុណរៈកីឡា គឺជាគូប្រកួតយ៉ាងស៊ីសាច់ហុតឈាមជាមួយបង្គោលខៀវ គីន ខ្លឹម មកពីក្លិបកងពលតូចទ័ពពិសេសឆត្រយោង៩១១។
បង្គោលក្រហមមានប្រវត្តិប្រកួតបានចំនួន១០ ឈ្នះ ៩ចាញ់ ១ ឯបង្គោលខៀវប្រកួតបានចំនួន ១០ ឈ្នះ ៧ចាញ់៣។ ដូចនេះកីឡាករទាំង២មានប្រវត្តិប្រកួតស្មើគ្នា ទើបធ្វើឱ្យការប្រកួតទាំងមូលមានសកម្មភាពវាយគ្នាពិបាកស្វែងរកចាញ់ឈ្នះ។ កីឡាករ គីន ខ្លឹម ត្រូវគេឃើញមានសន្ទុះវាយសន្ធាប់ទៅលើកីឡាករ ញឹម សារិទ្ធ កាន់តែចំគោលដៅ ខណៈដែលកីឡាករម្ខាងទៀត ក៏វាយទៅវិញផូងផាំងៗធ្វើឱ្យអ្នកទស្សនាជក់ចិត្ត។
អ្នកទស្សនាភាគច្រើន ជាប់ចិត្តនឹងការប្រកួតមួយគូនេះយ៉ាងខ្លាំង ដោយអ្នកកាន់ជើងកីឡាករម្ខាងៗ ចាប់ផ្ដើមអស់ជំនឿក្នុងការទុកចិត្តសម្រាប់កីឡាកររបស់ខ្លួននឹងឈ្នះនោះផង។ ម្នាក់ៗចាប់ផ្ដើម ហើបគូទពីកៅអី ព្រោះតែការប្រកួតមួយនេះ គឺជក់ចិត្តស្ទើរតែពេញទាំង៣ទឹក។ ៣ទឹកពេញកីឡាករ គីម ខ្លឹម បានក្លាយជាកីឡាករដណ្ដើមបានកៅអី ដែលអាចទម្លាក់គូប្រកួតឱ្យហាលអាវ ហើយឈានទៅប្រកួតក្នុងជុំទី២។ ជ័យជំនះដែលទទួលបាននេះ កីឡាករ គីន ខ្លឹម បានអះអាងថា កើតឡើងពីការហ្វឹកហាត់ និងការតស៊ូ ដោយមិនខ្លាចគ្រោះថ្នាក់នោះផង ទើបអាចឈានឡើងទៅវគ្គទី២បែបនេះ៕
ចែករំលែកព័តមាននេះ