ខេត្តកណ្ដាល ៖ រថយន្តកាម៉ាស់១គ្រឿងកំពុងបើកសុខៗក៏បត់ត្រឡប់ក្រោយ ធ្វើឲ្យរថយន្តកូរ៉ូឡាមើលអត់ឃើញកជ្រុលទៅបុកចំកង់មុខ បណ្ដាលឲ្យខូចខាតយ៉ាងដំណំ សំណាងមិនមានរងរបួសទេ រីឯអ្នកបើករថយន្តកាម៉ាស់រត់គេចខ្លួន លុះបានបន្តិចរថយន្តហ៊ីយ៉ាន់ដាយ១គ្រឿង បោះពួយយ៉ាងល្បឿនក៏បុកចំកង់ក្រោយរថយន្តកាម៉ាស់ធ្វើឱ្យរថយន្តក្រពឹតរួញកាប៊ីនកៀបយុវជនម្នាក់ស្លាប់ហើយត្រូវនគរបាលនាំគ្នាជួយគាស់យកចេញ។
រីឯអ្នកបើក និងអ្នករួមដំណើររងរបួស បង្កឱ្យមានការភ្ញាក់ផ្អើលកាលពីម៉ោង២និង២០នាទីយប់រំលងអធ្រាត្រឈានចូលថ្ងៃទី២៧ ខែមេសា ឆ្នាំ២០១៩ នៅលើកំណាត់ផ្លូវជាតិលេខ៤ ត្រង់ចំណុចចន្លោះគីឡូម៉ែត្រ លេខ២៩-៣០ ស្ថិតក្នុងភូមិព្រៃក្រឡាញ់ ឃុំលំហាច ស្រុកអង្គស្នួល ខេត្តកណ្ដាល ។
នគរបាលបានឲ្យដឹងថា ហេតុការណ៍នេះបង្កដោយរថយន្ត១គ្រឿងម៉ាកកាម៉ាស់សណ្ដោងកន្ទុយរ៉ឺម៉កដឹកទំនិញ ពណ៌ស ពាក់ស្លាក លេខ ក -8956 ភ.ព3 បើកដោយបុរសមិនស្គាល់ឈ្មោះម្នាក់បានរត់គេចខ្លួនបាត់ ចំណែករថយន្តម៉ាកកូរ៉ូឡា ប្រភេទទេសចរណ៍ ពណ៌ក្រហម ពាក់ស្លាកលេខ កណ្ដាល២2A-0768 បើកដោយឈ្មោះ ញ៉ែម ស្រទុំ ភេទប្រុស អាយុ៣៣ឆ្នាំ មានទីលំនៅក្នុងភូមិស្រង់ ឃុំស្រង់ ស្រុកគងពីសី ខេត្តកំពង់ស្ពឺ រងរបួសស្រាល និងរថយន្តដឹកបន្លែម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ព្រះសីហនុ 2A-2448 បើកដោយបុរសម្នាក់ឈ្មោះ អឿន ដារិន អាយុ២៥ឆ្នាំ មានទីលំនៅក្នុងភូមិ៤ ក្រុមទី១៣ សង្កាត់ស្ទឹងហាវ ខេត្តព្រះស៊ីហនុ រងរបួសស្រាល។
ប្រភពដដែលបន្តថា ដោយឡែកយុវជនម្នាក់ឈ្មោះ រ៉ាត់ អាយុ២១ឆ្នាំ ដែលជាព្រូរថយន្ត ស្នាក់នៅជាមួយគ្នាបានស្លាប់ ក្រោយបញ្ជូនដល់មន្ទីរពេទ្យ និងយុវជនម្នាក់ទៀតឈ្មោះ ម៉ែន តឿ អាយុ២៥ឆ្នាំ ជាអ្នករួមដំណើរ មានទីលំនៅក្នុងភូមិ៣ សង្កាត់លេខ៤ ខេត្តព្រះស៊ីហនុរងរបួសស្រាល។
ប្រភពដដែលបន្តថា នៅមុនកើតហេតុ រថយន្តបង្កបានបើកពីលិចទៅកើត លុះដល់កន្លែងកើតហេតុ ស្រាប់តែបានបត់ឆ្លងផ្លូវត្រឡប់ក្រោយទៅទិសខាងលិចវិញ ដោយមិនបានមើលមុខមើលក្រោយឡើយ។ ខណៈកំពុងតែបត់ខ្លួនទទឹងផ្លូវ ស្រាប់តែរថយន្តម៉ាកកូរ៉ូឡាបើកបរក្នុងល្បឿនលឿនពីកើតទៅលិចបញ្ច្រាស់ទិសទៅដល់ល្មម ហើយដោយសារតែយប់ងងឹតមើលមិនឃើញ ទើបគេចមិនទាន់ ជាន់ហ្វ្រាំងក៏មិនទាន់ ស្រាប់តែជ្រុលទៅបុកចំកង់មុខរថយន្តចំហៀងខាងស្ដាំរថយន្តកាម៉ាស់នោះតែម្ដង។
នគរបាលខាងលើបញ្ជាក់ទៀតថា ខណៈពេលនោះរថយន្តកូរ៉ូឡា រងការខូចខាតយ៉ាងដំណំ ប៉ុន្តែអ្នកបើកបររងរបួសស្រាលប៉ុណ្ណោះ ចំណែកអ្នកបើកបររថយន្តបង្កបានចុះរត់គេចខ្លួនបាត់ស្រមោល។ លុះបន្តិចក្រោយមករថយន្តម៉ាកហ៊ីយ៉ា់ដាយដឹកបន្លែ១គ្រឿងផ្សេងទៀត បានបើកបោះពួយក្នុងល្បឿនលឿនទៅដល់ល្មម ហើយមើលមិនឃើញក៏ជ្រុលទៅបុកចំកង់ក្រោយចំហៀងខាងស្ដាំរថយន្តកាម៉ាស់នោះយ៉ាងពេញទំហឹងទៀត បណ្ដាលឲ្យរថយន្តដឹកបន្លែនេះក្រពឹតរួញមុខខូចខាតទាំងស្រុងកៀបជាប់យុវជនរងគ្រោះដែលជាព្រូក្នុងកាប៊ីនរងរបួសធ្ងន់ធ្ងរ។
នគរបាលបន្តថា រហូតមានកម្លាំងនគរបាលនៃអធិការដ្ឋានស្រុកអង្គស្នួលចុះទៅអន្តរាគមន៍ទើបជួយគាស់យកចេញបាន រួចបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ ប៉ុន្តែជាអកុសលពេលទៅដល់ភ្លាម ជនសង្ស័យបានស្លាប់ទៅហើយ។ ចំណែកអ្នកបើកបរ និងអ្នករួមដំណើរម្នាក់ទៀតរងរបួសស្រាល បន្ទាប់មកកម្លាំងបាននាំយករថយន្តទាំង៣គ្រឿងទៅរក្សាទុករង់ចាំការដោះស្រាយតាមផ្លូវច្បាប់៕
ចែករំលែកព័តមាននេះ