រាជធានីភ្នំពេញ ៖ បុរសម្នាក់ដែលគេអះអាងថាស្រវឹងស្រា បានបើកម៉ូតូកង់បីមួយគ្រឿងបញ្ច្រាសទិសដៅឡើងលើស្ពានជ្រោយចង្វា ទៅបុកម៉ូតូកង់បីដូចគ្នាបណ្តាលឱ្យរងការខូចខាតយ៉ាងដំណំ កាលពីវេលាម៉ោង៩យប់ថ្ងៃទី២៥ ខែមេសា នៅលើស្ពានជ្រោយចង្វាថ្មី ក្នុងសង្កាត់ជ្រោយចង្វា ខណ្ឌជ្រោយចង្វា ។
តាមអ្នកឃើញហេតុការណ៍ឲ្យដឹងថា បុរសអ្នករត់ម៉ូតូកង់បី បើកម៉ូតូកង់បីពណ៌សលាយក្រហម ពាក់ផ្លាកលេខភ្នំពេញ ១GR-០៩៥៩តាមផ្លូវជាតិលេខ៦ពីខាងកើតទៅខាងលិច ។ ខណៈមកដល់លើស្ពានជ្រោយចង្វាថ្មី ស្រាប់តែមានបុរសម្នាក់ទៀតជាអ្នករត់ម៉ូតូកង់បីដូចគ្នា បើកម៉ូតូកង់បីពណ៌សលាយក្រហមដូចគ្នា តែពាក់ផ្លាកលេខ ភ្នំពេញ ១FS-៥៦២១ ពីខាងលិចទៅខាងកើតក្នុងល្បឿនយ៉ាងលឿនហើយបញ្ច្រាស
ទិសដៅចរាចរណ៍និងស្រវឹងផង ក៏ជ្រុលទៅបុកម៉ូតូកង់បីដែលបើកត្រូវទិសដៅចរាចរណ៍ចំពីមុខពេញទំហឹង ។
គ្រោះថ្នាក់នេះ បណ្តាលឱ្យម៉ូតូកង់បីទាំង២គ្រឿងបែកកញ្ចក់មុខនិងវៀចកង់មុខដូចគ្នា ហើយក្រោយកើតហេតុខាងម៉ូតូកង់បីដែលរងគ្រោះបានយល់ព្រមឲ្យខាងម៉ូតូកង់បីដែលបើកខុសជួសជុលយានជំនិះដែលខូចខាត តាមសំណូមពរ ដើម្បីបញ្ចប់រឿងនៅនឹងកន្លែង ។
ក្នុងហេតុការណ៍៍ដាច់ដោយឡែកមួយទៀតអ្នករត់ម៉ូតូកង់បីម្នាក់ដែលអះអាងថា បានប្រកបរបរនេះជាង៦ឆ្នាំមកហើយ ពេលមានម៉ូយចុះមកពីលើរថយន្តក្រុងមក ក៏មានអ្នករត់ម៉ូតូកង់ ៣ថ្មីៗមកដណ្តើមម៉ូយរបស់ខ្លួន នាំឲ្យក្លាយជាការប្រទូស្តរ៉ាយគ្នាបណ្តាលឱ្យហើមមុខម្នាក់ ។ ហេតុការណ៍នេះ កើតឡើងកាលពីវេលាម៉ោង១០និង៣០នាទីយប់ថ្ងៃទី២៥ ខែមេសា នៅចំណុចរង្វង់មូលកួចកាណុង ស្ថិតក្នុងសង្កាត់ស្រះចក ខណ្ឌដូនពេញ ។
តាមអ្នកឃើញហេតុការណ៍ឱ្យដឹងថា បុរស២នាក់ដែលសុទ្ធសឹងជាអ្នករត់ម៉ូតូកង់បីដូចគ្នាហើយភាគីម្ខាងពាក់មួកខ្មៅ ពេលឃើញម៉ូយចុះមកពីលើរថយន្តក៏នាំគ្នាចាប់ម៉ូយ ដោយបុរសពាក់ពួកខ្មៅ បានយកអីវ៉ាន់របស់ម៉ូយមកទុកនៅក្រោម ហើយសួរទៅអ្នករត់ម៉ូតូកង់បីម្នាក់ទៀតសុំដឹកម៉ូយនោះ ។
ប៉ុន្តែត្រូវបានបដិសេធដោយសំអាងថា រូបគេចាប់មុនហើយ ស្រាប់តែមួយសន្ទុះក្រោយមក ភាគីទាំងសងខាងបានឈ្លោះប្រកែកគ្នានិងឈានដល់ការវាយតប់គ្នារហូតរបួសម្នាក់ហើមមុខហើមមាត់ ដោយខាងបុរសដែលត្រូវរបួសចោទប្រកាន់ខាងបុរសពាក់ពួកខ្មៅថាជាអ្នកវាយរូបគាត់ ។ ចំណែកបុរសពាក់មួកខ្មៅនិយាយថា ខ្លួនអត់បានវាយទេ គឺមានអ្នកផ្សេងជាអ្នកវាយពីព្រោះពេលនោះគាត់ជាអ្នកឃាត់ ។
សមត្ថកិច្ចនិយាយថា រឿងរ៉ាវនេះកើតឡើងតាំងពីក្បាលព្រលប់ម្ល៉េះ ហើយលោកនាយប៉ុស្តិ៍ក៏សម្របសម្រួលឱ្យទៅផ្ទះរៀងៗខ្លួនសិន ចាំព្រឹកស្អែកសឹមមកដោះស្រាយគ្នាទៀត រកសាក្សីឲ្យបានរៀងៗខ្លួនមកដោះស្រាយ ។ បាតុភាពបែបនេះមានតែការយោគយល់គ្នាប៉ុណ្ណោះ គឺបើមួយខ្លាំងមួយទៀតកុំតបតទៅបានសុខហើយ និងមានឱកាសប្រកបរបរដោយសុចរិតនេះបានយូរអង្វែងតទៅទៀត៕
ចែករំលែកព័តមាននេះ