រាជធានីភ្នំពេញ ៖ ក្រុមបឹងកេតអែហ្វស៊ី បានយកឈ្នះក្រុមបាតតរាងខេត្តកំពង់ចាម៧-០នៅលើទឹកដីរបស់ខ្លួនឯមេមត់កាលពីថ្ងៃអាទិត្យទី២១ មេសា ក្នុងព្រឹត្តិការណ៍បាល់ទាត់ពានរង្វាន់មិត្តហ្វូនខេមបូឌានលីគរដូវកាលឆ្នាំ២០១៩ ខណៈក្រុមព្រះខ័នរាជស្វាយរៀង នៅតែរក្សាកំណត់ត្រាមិនដែលចាញ់ទាល់តែបាន។
ក្រុមបឹងកេតអែហ្វស៊ីដែលបានយកឈ្នះលើក្រុមខេត្តកំពង់ចាម៧-០លើកនេះកើនបាន៧ពិន្ទុហើយនៅក្នុងការប្រកួតទាំង៤លើកឈ្នះ២ ស្មើ១ និងចាញ់១ ។ ចំណែកក្រុមខេត្តកំពង់ចាមវិញ ទើបតែរកបាន៣ពិន្ទុប៉ុណ្ណោះក្នុងចំណោមការប្រកួតទាំង៤លើកដែលទទួលលទ្ធផលឈ្នះ១ ចាញ់៣ ។
រីឯក្រុមព្រះខ័នរាជស្វាយរៀងវិញ រហូតមកទល់នឹងពេលនេះនៅតែរក្សាស្ថិតិមិនធ្លាប់ចាញ់បានយ៉ាងល្អ បន្ទាប់ពីប្រកួតឈ្នះក្រុមភ្នំពេញក្រោន៥-១នៅលើទឹកដីរបស់គេឯខេត្តស្វាយរៀងកាលពីថ្ងៃអាទិត្យ ។ ការប្រកួតទាំង៤លើកមកនេះ ក្រុមព្រះខ័នរាជស្វាយរៀងមាន១២ពិនុ្ទឡើងទៅឈរនៅកំពូលតារាងជាបណ្ដោះអាសន្ន ក្នុងពេលក្រុមភ្នំពេញក្រោនប្រកួត៤លើកឈ្នះតែ១លើកគត់មាន៣ពិន្ទុ។
នៅថ្ងៃដដែលក្រុមក្រសួងការពារជាតិបានយកឈ្នះលើក្រុមអគ្គស្នងការដ្ឋាននគរបាលជាត់៤-២ ។ ក្រុមអគ្គស្នងការដ្ឋាននគរបាលជាតិ ប្រកួត៤លើកទើបតែរកបាន៣ពិន្ទុតាម រយៈការយកឈ្នះ១ប្រកួត ចាញ់៣ប្រកួត។
ចំណែកក្រុមក្រសួងការពារជាតិវិញ ប្រកួត ៤លើក ឈ្នះ៣ ស្មើ១ មាន១០ពិន្ទុ ។ មួយ ប្រកួតទៀត ក្រុមណាហ្គាវើលអែហ្វស៊ី បានយកឈ្នះលើក្រុមសូទីឡូអង្គរ១-០។
ទោះជាយ៉ាងណា ក្រុមណាហ្គាវើលអែហ្វស៊ី នៅតែអាចរក្សាកិត្តិនាមជាក្រុមខ្លាំងដដែល ព្រោះអីការប្រកួត៤លើកកន្លងមកស្គាល់ចាញ់តែ១ប្រកួតប៉ុណ្ណោះមាន៩ពិន្ទុ ខណៈក្រុមសូទីឡូអង្គរមិនទាន់ងើបរួចពីបាតតារាងនៅឡើយ៕
ចែករំលែកព័តមាននេះ