រាជធានីភ្នំពេញ ៖ ថ្នាក់ដឹកនាំអន្តរក្រសួងថ្មីៗនេះបានសម្រេចដាក់ឱសានវាទ ទៅដល់ក្រុមហ៊ុនប្រតិបត្តិករទូរគមនាគមន៍ធ្វើការចាត់ចែងទូទាត់ចំណែកនៃផលចំណូលនិងបំណុលទាំងអស់ដែលជំពាក់រដ្ឋជូនទៅក្រសួងប្រៃសណីយ៍ យ៉ាងយូរត្រឹមថ្ងៃទី៣១ ខែឧសភា ឆ្នាំ២០១៩ ខាងមុខនេះ បើមិនដូច្នេះទេក្រសួងនឹងចាត់វិធានការតឹងរឹងទៅតាមផ្លូវច្បាប់ ។…
រាជធានីភ្នំពេញ ៖ ថ្នាក់ដឹកនាំអន្តរក្រសួងថ្មីៗនេះបានសម្រេចដាក់ឱសានវាទ ទៅដល់ក្រុមហ៊ុនប្រតិបត្តិករទូរគមនាគមន៍ធ្វើការចាត់ចែងទូទាត់ចំណែកនៃផលចំណូលនិងបំណុលទាំងអស់ដែលជំពាក់រដ្ឋជូនទៅក្រសួងប្រៃសណីយ៍ យ៉ាងយូរត្រឹមថ្ងៃទី៣១ ខែឧសភា ឆ្នាំ២០១៩ ខាងមុខនេះ បើមិនដូច្នេះទេក្រសួងនឹងចាត់វិធានការតឹងរឹងទៅតាមផ្លូវច្បាប់ ។ នេះបើ យោងតាមសេចក្តីជូនដំណឹងរបស់សេដ្ឋកិច្ចនិងហិរញ្ញវត្ថុ និងក្រសួងប្រៃសណីយ៍និងទូរគមនាគមន៍ដែលចេញផ្សាយកាលពីថ្ងៃទី១១ ខែមេសា កន្លងទៅ ។
សេចក្តីជូនដំណឹងដដែលគូសបញ្ជាក់ថា «ផុតកាលកំណត់នេះ ក្រសួងសេដ្ឋកិច្ច និងហិរញ្ញវត្ថុ និងក្រសួងប្រៃសណីយ៍និងទូរគមនាគមន៍ នឹងចាត់វិធានការតឹងរឹងជាបន្តដូចខាងក្រោមដោយពុំមានការលើកលែងឡើយ ៖ ១) – ប្រកាសជាសាធារណៈតាមបណ្តាញសារព័ត៌មានដូចចាកាសែត វិទ្យុ ទូរទស្សន៍ សារព័ត៌មាន Online ជាដើម។ចំពោះក្រុមហ៊ុនទាំងឡាយណា ដែលខកខានមិនបានអនុវត្តតាមការកំណត់ខាងលើដោយដាក់ឈ្មោះក្រុមហ៊ុន ឈ្មោះអភិបាលក្រុមហ៊ុន, ម្ចាស់ក្រុមហ៊ុននិងចំនួនទឹកប្រាក់ដែលជំពាក់។ ២) -ចាត់វិធានការតាមផ្លូវច្បាប់ដូចជាបង្កសំណើសុំការអនុញ្ញាតនានា បង្កកគណនីនៅតាមធនាគារពាណិជ្ជ, បិទហ្វ្រេកង់ស៍, ហាមឃាត់ការនាំចេញ នាំចូល ហាមឃាត់ការចូលរួមក្នុងដំណើរការលទ្ធកម្ម សាធារណៈ, ព្យួរ ឬដកហូតអាជ្ញាប័ណ្ណប្រតិបត្តិការ អាជ្ញាប័ណ្ណហ្វ្រេកង់ស៍វិទ្យុ កិច្ចព្រមព្រៀង ឬលិខិតគិតយុត្តពាក់ព័ន្ធផ្សេងៗសម្រាប់ធ្វើអាជីវកម្មនិងចុងក្រោយរៀបចំសំណុំរឿងដាក់បណ្តឹងទៅតុលាការ»។
បន្ទាប់ពីអន្តរក្រសួងចេញសេចក្តីជូនដំណឹងទៅដល់ក្រុមហ៊ុនប្រតិបត្តិករកាលពីថ្ងៃទី១១ មេសា រហូតមកដល់ថ្ងៃទី ២២ ខែមេសាម្សិលមិញនេះ បើតាមមន្ត្រីអ្នកនាំពាក្យថា ក្រសួងមិនទាន់ទទួលបានព័ត៌មានពីក្រុមហ៊ុនណាមួយជាក់លាក់នៅឡើយទេ ព្រោះការជូនដំណឹងនេះស្ថិតចំរដូវបុណ្យចូលឆ្នាំថ្មីប្រពៃណីជាតិ ប៉ុន្តែនៅក្នុងសប្តាហ៍នេះនឹងទទួលបានព័ត៌មានច្រើនអំពីបញ្ហាខាងលើ។
លោក មាស ប៉ូ មន្ត្រីអ្នកនាំពាក្យក្រសួងប្រៃសណីយ៍និងទូរគមនាគមន៍មានប្រសាសន៍ថា «អន្តរក្រសួងបានជូនដំណឹងកាលពីថ្ងៃទី១១មេសា និងបានដាក់ឱសានវាទដល់ថ្ងៃទី៣១ខែឧសភា ២០១៩។ ពេលចេញសេចក្តីជូនដំណឹងចំពេលរដូវចូលឆ្នាំថ្មីប្រពៃណីជាតិយើង រហូតដល់ពេលនេះយើងមិនទាន់ទទួលបានជាក់លាក់ណាមួយប្រាប់បាននូវឡើយនោះទេ។តែនៅក្នុងអាទិត្យនេះខ្ញុំគិតថាអាចនឹងមានព័ត៌មានច្រើនពាក់ព័ន្ធនឹងក្រុមហ៊ុនដែលមិនទាន់បានទូទាត់ផលនៃចំណូលនិងបំណុលជូនមកខាងក្រសួង»។
តាមមន្ត្រីអ្នកនាំពាក្យស្ថិតក្នុងអន្តរកាលនេះក្រសួងមិនទាន់អាចបង្ហាញឈ្មោះក្រុមហ៊ុនប្រតិបត្តិករទូរគមាគមន៍និងទំហំទឹកប្រាក់ដែលត្រូវធ្វើទូទាត់ជូនរដ្ឋទៅឱ្យសាធារណជនបានដឹងនៅឡើយនោះទេ។
លោក មាស ប៉ូ មានប្រសាសន៍បន្តថា «ប្រតិបត្តិករដែលមិនទាន់បានធ្វើទូទាត់ជូនរដ្ឋគឺ មានច្រើនក្រុមហ៊ុន ហើយទឹកប្រាក់ដែលត្រូវការទូទាត់ជូនរដ្ឋក៏មានច្រើនដែរ ។ ប៉ុន្តែខ្ញុំសូមរក្សាមិនទាន់ប្រាប់បាននៅឡើយនោះទេ ព្រោះសេចក្តីជូនដំណឹងក៏បានណែនាំហើយដែរ លុះត្រាតែក្រោយថ្ងៃឱសានវាទ គាត់មិនព្រមទូទាត់ទើបយើងប្រកាសឈ្មោះក្រុមហ៊ុនជាសាធារណៈ»។
យោងតាមរបាយការណ៍ប្រចាំឆ្នាំរបស់ក្រសួងប្រៃសណីយ៍និងទូរគមនាគមន៍បានបង្ហាញថាការប្រមូលចំណូលរបស់ក្រសួងប្រៃសណីយ៍នៅឆ្នាំ២០១៨នេះ មានការកើនឡើងខ្ពស់ ហួសពីអ្វីដែលយើងគិតទុក ពោលកើនឡើងពីជាង២៩លានដុល្លារអាមេរិកនៅឆ្នាំ២០១៧ ដល់ជាង៣៩លានដុល្លារអាមេរិកនៅឆ្នាំ២០១៨ស្មើប្រមាណជាង៨១%នៃផែនការ។បើតាមការរបាយការណ៍ ឆ្នាំ២០១៨ក្រសួងក្រៅពីទទួលបានចំណូលជាប្រាក់ដុល្លារអាមេរិក ជាង៣៩លានដុល្លារ នូវទទួលបានចំណូលជាប្រាក់រៀលប្រមាណ១ពាន់លានរៀល ខណៈនៅឆ្នាំ២០១៧ចំណូលជាប្រាក់រៀលមានប្រមាណតែ២៧៨លានរៀល៕
ចែករំលែកព័តមាននេះ