ខេត្តកំពង់ចាម ៖ ពិតជាគួរឲ្យសោកស្តាយដោយរថយន្តម៉ាកហាយឡែនឌ័រ១គ្រឿង ស៊េរី២០០២ ពាក់ស្លាកលេខភ្នំពេញ 2AK-7333 បានឆាបឆេះនៅសល់តែគ្រោងឆ្អឹងដែក ចំណែកម្ចាស់រថយន្តបានត្រឹមឈរមើលប៉ុណ្ណោះ ព្រោះទីនោះទឹក ហើយរថយន្តពន្លត់អគ្គិភ័យក៏មិនអាចចូលកើត ហេតុការណ៍កើតឡើងនៅម៉ោង៤និង៣០នាទីរសៀល ថ្ងៃទី២១ មេសា ២០១៩ នៅដីវាលស្រែបន្ទាយតូច មួយកន្លែង ស្ថិតក្នុងភូមិទី៥ ឃុំព្រែកតានង់ ស្រុកកោះសូទិន ។
លោកវរសេនីយ៍ឯក អ៊ឹម ខឿន អធិការនគរបាលស្រុកកោះសូទិន ប្រាប់ឲ្យដឹងថា រថយន្តខាងលើបើកបរដោយឈ្មោះភួង រ៉ាវី ភេទប្រុស អាយុ៣១ឆ្នាំ រស់នៅភូមិទី៥ ឃុំព្រែកតានង់ បានបើករថយន្តចេញពីផ្ទះដើម្បីទៅមើលដីរបស់ខ្លួនមានចំងាយប្រមាណ៥គីឡូម៉ែត្រពីភូមិក្នុងទិសដៅពីកើតមកលិច ចៃដន្យស្របពេលដែលបើកត្រឡប់មកវិញរថយន្តកើលទ្រូង។
អធិការនគរបាលស្រុកកោះសូទិន ប្រាប់បន្តថា ស្របពេលរថយន្តកើលទ្រូងនឹងទួលភ្លឺស្រែបើកទៅមុខមិនកើត អ្នកបើកបររូបនេះប្រឹងរោទិ៍ម៉ាស៊ីន តែដោយសារក្រោមរថយន្តមានចំប៉ើង ហើយក្តៅនឹងស៊ីម៉ាំងរថយន្តផង បណ្តាលឲ្យឆេះឆាបមកដល់រថយន្តបន្តិចម្តងៗ និងភ្លើងឆេះកាន់តែខ្លាំងឡើងៗចេញអណ្តាតភ្លើងយ៉ាងសន្ធោរសន្ធៅ ។ នៅកន្លែងកើតហេតុមិនមានទឹកសម្រាប់ដងជះពន្លត់នោះទេ សូម្បីតែរថយន្តពន្លត់អគ្គិភ័យរបស់អធិការនគរបាលស្រុក ដែលចង់ចេញទៅជួយក៏មិនមានផ្លូវចូលផង ទើបធ្វើឱ្យម្ចាស់រថយន្តបណ្តោយឲ្យឆេះរហូតដល់អស់សល់តែគ្រោងឆ្អឹងដែក ហើយបានត្រឹមតែឈរមើល និងសោកស្តាយរថយន្តបស់ខ្លួនតែប៉ុណ្ណោះ ។
ក្រោយកើតហេតុនគរបាលមូលដ្ឋានបានចុះទៅពិនិត្យមើលរថយន្តឃើញនៅសល់តែគ្រោងឆ្អឹង ប្រសិនបើមិនមានចំប៉ើងកល់នៅក្រោមរថយន្តក៏មិនមានហេតុការណ៍គ្រោះអគ្គិភ័យឆាបឆេះមកដល់រថយន្តដែរ ។ លោកអធិការនគរបាលស្រុកកោះសូទិនបានលើកឡើងថា ផ្លូវចូលចូលវាលស្រែមិនគួរណាបើករថយន្តទៅសោះ បើសិនជាជិះម៉ូតូទៅប្រសើរជាង៕
ចែករំលែកព័តមាននេះ