តាម​ប្រភព​ព័ត៌មាន Goal បានឱ្យ​ដឹង​ថា អតីត​កីឡាករ​ជើង​ខ្លាំង​របស់​ប្រេ​ស៊ី​ល Rivaldo ថា ជើង​ខ្លាំង​ប្រចាំ​ក្លិប​អ្នកមាន​បុណ្យ Lionel Messi សម​នឹង​ទទួល​ពាន Ballon d’Or ជា​លើក​ទី​៦ មិន​ថា​ឈ្នះ​ពាន Champions League ជាមួយនឹង Barcelona ឬ​អត់​នោះ​ទេ ។

Barcelona នៅ​ពេល​នេះ អាច​រក្សា​ខ្លួនឯង​ឱ្យ​នៅ​ក្នុង​ការ​ប្រកួត​ទៅ​ដណ្តើម Champions League បាន ក្រោយ​ពី​ជួបនឹង Manchester United ហើយ​កំពុង​តែ​ត្រៀម​នឹង​ក្លាយជា​ជើងឯក La Liga ។

Rivaldo ដែល​ជា​អតីត​កីឡាករ​ជើងឯក​ប្រចាំឆ្នាំ FIFA World Cup បាន​ប្រាប់​ព័ត៌មាន Goal ថា​៖ «​វា​ពិតជា​មិន​អាច​រៀបរាប់​ពី Messi បាន​មែន ។ ខ្ញុំ​ចូល​ចិត្ត​គេ​ខ្លាំង​ណាស់ ហើយ​ខ្ញុំ​តែងតែ​និយាយ​ថា ខ្ញុំ​មិន​សប្បាយចិត្ត ដោយសារ​តែ​គេ​មិន​ដែល​ឈ្នះ​ពាន World Cup ជាមួយនឹង​អា​ហ្ស​ង់​ទី​ន ។ វា​គឺជា​ពាន​ដែល​គេ​គួរតែ​ទទួល​បាន ព្រោះ​កីឡាករ​លំដាប់​ពិភពលោក​ដូច​គេ គឺ​គួរ​ទទួល​ពាន​លំដាប់​ពិភពលោក​»​។

អតីត​ជើង​ខ្លាំង​ម្នាក់​នេះ​បាន​បន្ត​ថា​៖«​គេ​បាន​រក​គ្រាប់​បាល់​បានជា​ច្រើន ដែល​ខ្ញុំ​គិត​ថា អ្វី​ដែល​គេ​បាន​ធ្វើ​នៅ Champions League គឺ​អាច​ជួយ​ឱ្យ​លេចធ្លោ​កាន់តែ​ខ្លាំង​។ ប្រសិនបើ​គេ​មិន​អាច​ឈ្នះ​ពាន Champions League គេ​ក៏​នៅ​តែ​សម​នឹង​ទទួល​ពាន Ballon d’Or ដែរ​»៕