រាជធានីភ្នំពេញ ៖ យុវជនជាជាងដែកម្នាក់ ត្រូវបានចរន្តអគ្គិសនីឆក់បណ្ដាលឲ្យធ្លាក់ពីលើដំបូលកម្ពស់ជិត១០ម៉ែត្រមកដី បណ្ដាលឲ្យរងរបួសយ៉ាងធ្ងន់ធ្ងរ និងត្រូវបានមិត្តភក្ដិរួមការងារនិងអ្នកភូមិនាំគ្នាយកទៅកប់ដីខ្សាច់ជាការសង្គ្រោះបឋមមុន និងបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ ។ ហេតុការណ៍នេះបានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង១១ព្រឹក ថ្ងៃទី២២ ខែមេសា ឆ្នាំ២០១៩ ស្ថិតនៅក្នុងភូមិព្រែកធំ សង្កាត់ព្រៃស ខណ្ឌដង្កោ រាជធានីភ្នំពេញ ។
យុវជនរងគ្រោះមានឈ្មោះ រស្មី អាយុ២២ឆ្នាំ មុខរបរជាងដែក ស្នាក់នៅក្នុងភូមិកើតហេតុខាងលើ និងមានស្រុកកំណើតនៅក្នុងខេត្ដតាកែវ ។
អ្នកភូមិបាននិយាយឲ្យដឹងថា ជនរងគ្រោះ និងជាងដែក២នាក់ទៀតបានម៉ៅធ្វើសំយ៉ាបផ្ទះខាងលើ ហើយពួកគេបានធ្វើជាច្រើនថ្ងៃកន្លងមកហើយ ដោយបានផ្សាគ្រោងឆ្អឹងដំបូលនោះហើយរួចរាល់ហើយ នៅតែប្រក់ដំបូលប៉ុណ្ណោះ ។ លុះដល់ព្រឹកថ្ងៃកើតហេតុពួកគេបានទៅបន្តការងារដោយត្រូវប្រក់ដំបូល ហើយជនរងគ្រោះជាអ្នកឡើងទៅប្រក់ ខណៈនោះបានទុកព្រីភ្លើងនៅជិតស័ង្កសី ក្រោយមករវល់តែធ្វើការភ្លេចខ្លួនធ្វើឲ្យព្រីភ្លើងនោះប៉ះជាមួយស័ង្កសីទើបបណ្ដាលឲ្យឆ្លងចរន្តឆក់យុវជនរងគ្រោះរូបនេះតែម្ដង ។
ប្រភពដដែលបានបន្តថា យុវជនរងគ្រោះត្រូវបានចរន្តភ្លើងឆក់ធ្លាក់ពីលើដំបូលសំយ៉ាបផ្ទះខាងលើ បណ្ដាលឲ្យរងរបួសធ្ងន់ធ្ងរ ខណៈនោះត្រូវបានមិត្តភក្ដិរួមការងារ និងអ្នកជិតខាងនាំគ្នាជួយសង្គ្រោះបឋម ដោយការយកគាត់ទៅកប់នៅក្នុងដីខ្សាច់សើមៗ ។ លុះក្រោយមកទើបហៅរថយន្តសាមុយទៅដឹកយកទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ហើយមិនទាន់ដឹងថា ជនរងគ្រោះរូបនេះអាចរួចផុតពីគ្រោះថ្នាក់ ឬអត់នៅឡើយ ៕
ចែករំលែកព័តមាននេះ