ពិសេសណាស់ពិនិត្យផ្ទៃពោះរហូតដល់ឆ្លងទន្លេមិនអស់លុយហើយបានលុយវិញ៧៦ម៉ឺនរៀលទៀត
- រតនគិរី
ខេត្តរតនគិរី ៖ នៅរសៀលថ្ងៃទី២១ ខែមេសា ឆ្នាំ២០១៩ នៅមន្ទីរសុខាភិបាលខេត្ត លោក ម៉ម ប៊ុនហេង រដ្ឋមន្ត្រីក្រសួងសុខាភិបាល…
ខេត្តរតនគិរី ៖ នៅរសៀលថ្ងៃទី២១ ខែមេសា ឆ្នាំ២០១៩ នៅមន្ទីរសុខាភិបាលខេត្ត លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងក្នុងពិធីបើកសន្និបាតការងារសុខាភិបាលឆ្នាំ២០១៨ និងលើកទិសដៅឆ្នាំ២០១៩ ថានឹងរៀបចំឲ្យស្ត្រីមានផ្ទៃពោះទៅទទួលសេវាពិនិត្យសុខភាពនៅមន្ទីរពេទ្យរហូតដល់ឆ្លងទន្លេបាន២ឆ្នាំមិនត្រឹមតែមិនបង់ប្រាក់នោះទេ ថែមទាំងទទួលបានប្រាក់ថែទាំមកវិញ រហូតដល់៧៦ម៉ឺនរៀលទៀតផង ។
លោករដ្ឋមន្ត្រីក្រសួងសុខាភិបាលបានសំដែងនូវការកោតសរសើរចំពោះអស់លោក លោកស្រីទាំងអស់ដែលជាមន្ត្រី បុគ្គលិកសុខាភិបាល និងដៃគូរអភិវឌ្ឍន៍ រួមទាំងអាជ្ញាធរមូលដ្ឋានដែលបានរួមកម្លាំងគ្នាធ្វើឲ្យសម្រេចជោគជ័យជាបន្តបន្ទាប់ ។
លោកក៏បានជម្រុញបន្ថែមដល់មន្ត្រីសុខាភិបាលទាំងអស់ឲ្យខិតខំក្នុងការបំរើសេវាព្យាបាលជូនដល់ប្រជាពលរដ្ឋ ឲ្យសមស្របតាមទិសដៅគោលនយោបាយថ្មីៗរបស់រាជរដ្ឋាភិបាល គឺការរៀបចំឲ្យមានប្រព័ន្ធសុវត្ថិភាពសុខភាពសង្គម គឺការជួយថែទាំព្យាបាលប្រជាពលរដ្ឋយើង ដោយប្រើប្រាស់មូលនិធិសមធម៌របស់រាជរដ្ឋាភិបាល បានន័យថា ជនក្រីក្រ ជនពិការ ដែលយើងផ្ដល់សេវាព្យាបាលដោយមិនបាច់យកប្រាក់ ។
លោកក៏បានបញ្ជាក់ថា ក្រសួងកំពុងរៀបចំគ្របដណ្ដប់ដល់ជនក្រីក្រ ក្នុងការបង្កើតកូនទៀតមានន័យថា ជនក្រីក្រទាំងអស់ មុននឹងដល់ពេលកើតកូនត្រូវមកពិនិត្យផ្ទៃពោះឲ្យបាន៤ដងដោយមិនចាំបាច់បង់ប្រាក់ ហើយផ្ដល់ប្រាក់ឧបត្ថម្ភទៅវិញ ក្នុងការមកពិនិត្យម្ដងជូនប្រាក់៤ម៉ឺនរៀលត្រឡប់ទៅវិញដល់ពេលឆ្លងទន្លេជូន២០ម៉ឺនរៀល និងក្រោយពេលឆ្លងទន្លេរយៈពេល២ឆ្នាំ ទាំងម្ដាយ និងកូនត្រូវមកពិនិត្យសុខភាពឲ្យបាន១០ដង ក្នុងម្ដងក៏ត្រូវផ្ដល់ប្រាក់ឧបត្ថម្ភ៤ម៉ឺនរៀលទៀតដែរ ។ ដូច្នេះសរុបទឹកប្រាក់ចាប់ពីមានផ្ទៃពោះរហូតឆ្លងទន្លេ និងក្រោយឆ្លងទន្លេបាន២ឆ្នាំ ត្រូវបានប្រាក់ថែទាំទាំងអស់៧៦ម៉ឺនរៀល ៕
ចែករំលែកព័តមាននេះ