ខេត្តស្ទឹងត្រែង ៖ បើតាមសេចក្តីរាយការណ៍ឲ្យដឹងថា មានបុរសម្នាក់ដាច់ចិត្តចង.កសម្លាប់ខ្លួននៅលើដើមឈើ ដោយមិនទាន់ដឹងពីមូលហេតុពិតប្រាកដនៅឡើយទេ ហេតុការណ៍នេះកើតឡើង កាលពីព្រឹកថ្ងៃទី២០ ខែមេសា ស្ថិតក្នុងភូមិវាលដេញ ឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង ។
សេចក្តីរាយការណ៍បន្តថា ជនរងគ្រោះមានឈ្មោះ ស្រី ឈួន អាយុ៥៣ឆ្នាំ រស់នៅភូមិវាលដេញ ឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង ។
តាមសាក្សីស្ត្រីជាប្រពន្ធចុងបានរៀបរាប់ប្រាប់ថា មុនកើតហេតុជនរងគ្រោះជាប្តីបាននាំអ្នកជិតខាងផឹកស្រានៅផ្ទះរបស់គាត់នៅយប់ថ្ងៃទី១៩ ខែមេសា ព្រោះនៅផ្ទះគាត់មានធ្វើកម្មវិធីសែនព្រេនលាប្រណន់ ដោយបានបន់ស្រន់តាមទំនៀមទំលាប់របស់ពួកគាត់ ។ ខណៈពេលជួបជុំគ្នាផឹកស្រាមានបងប្អូន៤ទៅ៥នាក់ សុទ្ធតែសាច់ញាតិរបស់ខ្លួន តែពេលផឹកស្រាអស់ប្រហែល១លីត្រកន្លះ បងប្អូន៤-៥នាក់បានបែកគ្នាទៅផ្ទះរៀងៗខ្លួនទៅ ។
ប្រភពដដែលបន្តថា ចំណែកប្តីគាត់បាននៅជាមួយគាត់ ពេលនោះប្តីគាត់ចេះតែរអ៊ូរទាំថា ចង់តែស្លាប់ ប៉ុន្តែមិនបានលាតត្រដាងពាក់ព័ន្ធដល់ការចង់សម្លាប់ខ្លួននោះទេ ។ ពេលនោះគាត់ចេះតែតាមអង្វរប្តីកុំឲ្យធ្វើអ្វីផ្តេសផ្តាស ហើយក៏នាំប្តីចូលដេក តែពួកគាត់មិនទាន់ដេកទេ ។ លុះដល់ម៉ោង១២យប់ គាត់បប្រាប់ប្តីថា យប់ជ្រៅហើយគាត់ងុយដេកណាស់ ប្តីក៏ឆ្លើយវិញថា ដេកទៅគាត់មិនដេកទេ បើគាត់ដេកគឺឡើងដេកលើផ្ទះធំ ។
ស្ត្រីជាភរិយាបន្តថា ពេលនោះគាត់បានចូលទៅដេកលក់រហូតទល់ភ្លឺ ចូលថ្ងៃទី២០ មេសា ទើបភ្ញាក់ឡើងមិនឃើញប្តីទេ ពេលនោះគាត់គិតថា ទំនងប្តីគាត់ឡើងទៅដេកលើផ្ទះធំ គាត់បានឡើងទៅមើលតែពុំឃើញដដែល ភ្លាមនោះគាត់យល់ថា ប្រហែលជាប្តីទៅផ្ទះប្រពន្ធដើមវិញហើយ គាត់ក៏ពុំបានតាមរកដែរ។ បន្តិចក្រោយមកគាត់បានដើរចេញទៅខាងក្រោយផ្ទះ ដើម្បីរកបត់ផើងធំ ស្រាប់តែប្រទះឃើញប្តីចង.កសម្លាប់ខ្លួននៅលើដើមក្រខុបស្លាប់បាត់ទៅហើយ ។
ក្រោយកើតហេតុ ដោយឃើញដូច្នោះគាត់បានទៅរាយការណ៍ប្រាប់នគរបាលមូលដ្ឋាន បន្ទាប់មកទើបបានខាងកម្លាំងសមត្ថកិច្ចជំនាញស្រុក-ខេត្តចុះទៅពិនិត្យសពប្តីអ្នកស្រី ហើយសន្និដ្ឋានថា ជនរងគ្រោះស្លាប់ដោយយកក្រមាចង.កធ្វើអត្តឃាតសម្លាប់ខ្លួន ។
សមត្ថកិច្ចឲ្យដឹងថា យោងតាមការបំភ្លឺពីសំណាក់ប្រពន្ធទាំងពីរ (ចុង និងដើម) បានញ្ជាក់ថា ប្តីរបស់គាត់តែងតែផឹកស្រាស្រវឹងរាល់ថ្ងៃ ហើយចេះតែចង់សម្លាប់ខ្លួនជាញឹកញាប់ តែដោយបានប្រពន្ធ និងកូនជួយសង្គ្រោះទាន់ ដូចជាចង.ក២ដង ផឹកសាំង១ដង ផឹកថ្នាំកណ្តៀរ១ដង ។
យ៉ាងណាក្តីការសម្លាប់ខ្លួនបានសម្រេចតាមរយៈមធ្យោបាយចង.កនៅលើដើមឈើនេះ ប្រពន្ធចុង និងប្រពន្ធដើមកំពុងមើលមុខគ្នា ដោយរកមូលហេតុដែលប្តីពួកគាត់បានបញ្ចប់ជីវិតមិនឃើញឡើយ ៕
ចែករំលែកព័តមាននេះ