ខេត្តសៀមរាប ៖ ជនសង្ស័យជាអ្នក (លក់សាច់ឆ្កែ) ម្នាក់ដែលត្រូវជាបងប្អូនបង្កើតបានយក កាំបិតបុ័ងតោកាប់ទៅលើបងស្រី និងប្អូនស្រីគ្មានដកដៃ បណ្តាលឱ្យស្លាប់ភ្លាមៗ ក្នុងថ្លុកឈាមទាំង២នាក់នៅហ្នឹងកន្លែងកើតហេតុនោះ ត្រូវបានសមត្ថកិច្ចធ្វើការឃាត់ខ្លួនបញ្ជូនទៅតុលាការខេត្ត ដើម្បីចាត់ការតាមនីតិវិធីច្បាប់ហើយ ។ ហេតុការណ៍បង្កឱ្យមានការភ្ញាក់ផ្អើលពេញស្រុកនោះបានកើតឡើងនៅវេលាម៉ោង១៧និង២០នាទីល្ងាច ថ្ងៃទី២០ ខែមេសា ឆ្នាំ២០១៩ ស្ថិតនៅចំណុចផ្ទះរបស់ជនរងគ្រោះ ក្នុងភូមិដំរីកូន ឃុំពពេល ស្រុកសូទ្រនិគម ខេត្តសៀមរាប ។
តាមប្រភពពីសមត្ថកិច្ចមូលដ្ឋានស្រុកសូទ្រនិគមបានប្រាប់ថា ករណីឃាតកម្មរវាងបងប្អូនបង្កើត និងបងប្អូនបង្កើតនោះបង្កឡើងដោយជនសង្ស័យឈ្មោះ វ៉ូ វន ភេទប្រុស អាយុ៤៩ឆ្នាំ ទីលំនៅភូមិឃុំកើតហេតុខាងលើបានកាប់ទៅលើជនរងគ្រោះដែលត្រូវជាបងស្រី និងប្អូនស្រីបង្កើតរបស់ខ្លួននឹងកាំបិតបុ័ងតោ បណ្ដាលឱ្យស្លាប់ទាំង០២នាក់តែម្តង ។
មូលហេតុជម្លោះដីធ្លី បន្តិចបន្តួច ។ ប្រភពបានបញ្ជាក់ទៀតថា ជនរងគ្រោះទាំង២នាក់បងប្អូនបង្កើតនោះមានទី១- ឈ្មោះ វ៉ូ ខឹម ភេទស្រី អាយុ៤៩ឆ្នាំ ត្រូវជាបងស្រីបង្កើតរបស់ជនសង្ស័យ មានទីលំនៅភូមិ ឃុំកើតហេតុខាងលើ (ស្លាប់) ត្រូវជនសង្ស័យជាប្អូនប្រុសបង្កើតកាប់ត្រូវចំថ្គាមខាងឆ្វេង១កន្លែង និងកញ្ចឹងក១កន្លែង និងទី២- ឈ្មោះ វ៉ូ ខុត ភេទស្រី អាយុ៤២ឆ្នាំ ត្រូវជាប្អូនស្រីបង្កើតរបស់ជនសង្ស័យ មានទីលំនៅ ភូមិឃុំកើតហេតុខាងលើ (ស្លាប់) ជនសង្ស័យជាបងប្រុសបង្កើត បានកាប់ត្រូវកាប់ចំថ្គាមខាងឆ្វេង២កន្លែង លើត្រចៀក១កន្លែង បំពង.ក ១កន្លែង និងត្រចៀក១កន្លែង ។
ប្រភពបានបញ្ជាក់បន្ថែមទៀតថា មុនពេលកើតហេតុនៅល្ងាចថ្ងៃទី២០ ខែមេសា ឆ្នាំ២០១៩ ជនសង្ស័យបានជីកដីដាក់ដាំបង្គោលធ្វើបន្ទប់ទឹក នៅមុខផ្ទះជនរងគ្រោះ ហើយជនរងគ្រោះ បានស្តីបន្ទោសឱ្យជនសង្ស័យតបសម្តីគ្នាទៅវិញទៅមកបានមួយសន្ទុះ ជនសង្ស័យខឹងក៏ឡើងទៅលើផ្ទះរបស់ខ្លួនយកកាំបិតបុ័ងតោចុះមកចាប់ជនរងគ្រោះទី១ ដែលត្រូវជាបងស្រី បង្កើតកាប់យកៗ បណ្តាលឱ្យស្លាប់ភ្លាមៗ ខណៈពេលនោះ ជនរងគ្រោះទី២ ប្អូនស្រីបង្កើត ដែលនៅផ្ទះជាប់របងគ្នាឃើញដូច្នោះក៏ស្រែកឱ្យអ្នកជិតខាងជួយក៏ត្រូវជនសង្ស័យ លឺស្រែក ក៏រត់ទៅដេញកាប់រហូតដល់ស្លាប់ម្នាក់ទៀត ។
ប្រភពបានបញ្ជាក់បន្ថែមទៀតថា បន្ទាប់ពីធ្វើការឃាត់ខ្លួនបានជនសង្ស័យយកមកធ្វើការសួរនាំនៅការិយាល័យជំនាញរួចមកជនសង្ស័យបានសារភាពថា ខ្លួនពិតជាបានកាប់សម្លាប់បងប្អូនបង្កើតរបស់ខ្លួនពិតប្រាកដមែន ដោយសារពួកគេទាំង២នាក់បានជេរប្រមាណដល់រូបគេ រឿងជីកដីដាំបង្គោលធ្វើបន្ទប់ទឹក សម្រាប់ឱ្យភ្ញៀវជុះនោម ដែលចូលមកហូប ក្លែម សាច់ឆ្កែ តែប៉ុណ្ណោះ ។
សូមបញ្ជាក់ថា ករណីមនុស្សឃាតនោះបង្កឡើងដោយបុរសអ្នកលក់សាច់ឆ្កែម្នាក់បានប្រើកាំបិតបុ័ងតោកាប់សម្លាប់មនុស្ស២នាក់ឱ្យស្លាប់នៅនឹងកន្លែងយ៉ាងសាហាវព្រៃផ្សៃនៅល្ងាចថ្ងៃទី២០ មេសា ឆ្នាំ២០១៩ ហើយគេឃើញជនដៃដល់បានកាន់កាំបិតប៉័ងតោវែងប្រលាក់ដោយឈាម ហើយឈរសម្ញែងនៅមុខផ្ទះខ្ទមលក់ដូរមួយតាមផ្លូវជាតិ ដោយមិនបានរត់គេចខ្លួនទៅណាឡើយ ឬមានអារម្មណ៍ភិតភ័យតក់ស្លុតអ្វីឡើយ ។ ចំណែកកូនស្រីរបស់ជនរងគ្រោះបានត្រឹមស្រែកទ្រហោយំស្ទើរគាំងបេះដូងឱបសពម្ដាយ តែមិនអាចធ្វើអ្វីជនបង្កនោះបានឡើយ ៕
ចែករំលែកព័តមាននេះ