ខេត្តបន្ទាយមានជ័យ ៖ មានរឿងរ៉ាវ២ករណីនៅខេត្តបន្ទាយមានជ័យដោយខុសគ្នាតែ១សប្តាហ៍ប៉ុណ្ណោះ រឿងហិង្សាដុតទ្រព្យបំផ្លាញចោលដោយគ្មានគិតពីកម្លាំងខំប្រឹងរកកន្លងមក ទាំងលំបាក ។ រឿងមួយកាលពីថ្ងៃចូលឆ្នាំយប់ថ្ងៃទី១ បុរសជាបងខឹងនឹងប្អូនប្រុសខ្លួនយកឡានរបស់ខ្លួនជិះដើរលេងដោយគ្មានការអនុញាតិ ពេលប្អូនត្រឡប់មកផ្ទះវិញកើតមានជម្លោះពាក្យសំដីនឹងគ្នាក្លាយជាហិង្សាទៅចងអត្តឃាត និងឡានក៏ដុតឡានរបស់ខ្លួនចោលឆេះហ្មត់សល់តែគ្រោងឆ្អឹងនៅក្រុងសិរីសោភ័ណ ។
ដោយឡែកករណីមួយទៀតនេះវេលាម៉ោង១០និង៣០នាទីនៅថ្ងៃទី១៩ ខែមេសា ឆ្នាំ២០១៩ ប្តីប្រចណ្ឌប្រពន្ធកើតជាជម្លោះបុរសជាប្តីបែរជាទៅចងអត្តឃាតជាមួយនឹងផ្ទះ ក៏ដុតផ្ទះចោលឆេះអស់ទាំងស្រុងសល់តែឆ្អឹងស័ង្កសី ក៏បានភ្ញាក់ផ្អើលដល់ឡានទឹកពន្លត់អគ្គិភ័យរបស់អធិការដ្ឋាននគរបាលស្រុកមង្គលបូរី ហើយអ្នកបង្កជិះម៉ូតូរត់គេចខ្លួនបាត់ ។ ហេតុការណ៍បង្កឲ្យមានការភ្ញាក់ផ្អើលនេះបានកើតឡើងនៅភូមិបឹងរាំង ឃុំភ្នំតូច ស្រុកមង្គលបូរី ខេត្តបន្ទាយមានជ័យ ។
លោកវរសេនីយឯក ស៊ិន ណារ៉ាក់ អធិការនគរបាលស្រុកមង្គលបូរីបានឲ្យដឹងថា ម្ចាស់ផ្ទះដែលត្រូវបានអគ្គិភ័យឆាបឆេះនោះឈ្មោះ យុត ស៊ីណាត ភេទស្រី អាយុ៣៨ឆ្នាំ ជាប្រពន្ធ រីឯប្តីឈ្មោះ ភួន ដា អាយុ៣៨ឆ្នាំ មានកូនប្រុសតូចម្នាក់ក្នុងបន្ទុក គ្រួសារនេះរស់នៅភូមិបឹងរាំង ឃុំភ្នំតូច ស្រុកមង្គលបូរី ខេត្តបន្ទាយមានជ័យ ។ ផ្ទះដែលឆេះ គឺផ្ទះទាមធ្វើអំពីឈើប្រក់ស័ង្កសី ជញ្ជាំងស័ង្កសី ។
លោកអធិការនគរបាលស្រុកបានបញ្ជាក់ថា មូលហេតុដែលបង្កឲ្យឆេះនេះបើតាមការសាកសួរព័ត៌មានពីស្ត្រីដែលជាម្ចាស់បាននិយាយមូលហេតុដែលបង្កឲ្យឆេះនោះ គឺដោយសារប្តីរបស់នាងគាត់មានភាពប្រចណ្ឌ និងគាត់ដោយបានចោទប្រកាន់ថា នាងមានសាហាយស្មន់ក៏ក្លាយជាជម្លោះរាំរ៉ៃយូរមកហើយ ហើយរឿងនេះនៅយប់ថ្ងៃកើតហេតុក៏បានកើតជាជម្លោះ និងគ្នាកើតជាហិង្សា ប្តីរបស់នាងក៏យកសាំង១លីត្រ និងប្រេងម៉ាស៊ីនចាក់ដុតផ្ទះបង្កឲ្យឆាបឆេះអស់ទាំងស្រុង ក្រោយពីបង្កឲ្យផ្ទះហើយក៏ជិះម៉ូតូរត់គេចខ្លួនបាត់ ។ លោកអធិការបានបញ្ជាក់ផងដែរថា ក្រោយពីទទួលបានព័ត៌មានលោកបានដឹកនាំកម្លាំងចំនួន៨នាក់នាំយករថយន្តពន្លត់អគ្គិភ័យចុះមកជួយអន្តរាគមន៍តែពេលមកដល់ផ្ទះត្រូវបានអគ្គិភ័យឆាបឆេះអស់ទៅហើយ តែក្នុងនោះក៏យើងបានបាញ់ទឹកអស់១ឡាន ដើម្បីពន្លត់កុំឲ្យមានការរាលដាលទៅឆេះផ្ទះអ្នកជិតខាងបន្ថែមមទៀត ។
បើតាមការបញ្ជាក់ពីស្ត្រីឈ្មោះយុត ស៊ីណាត បានប្រាប់ថា គិតពីសម្ភារក្នុងផ្ទះ និងឈើចំនួន២គីប ទុកសម្រាប់សង់ផ្ទះនោះក៏ត្រូវឆេះអស់ គិតជាទឹកប្រាក់ចំនួន៦លានរៀល ៕
ចែករំលែកព័តមាននេះ