ខេត្តស្វាយរៀង ៖ បន្ទាប់ពីមានប្រជាពលរដ្ឋចំនួន៣នាក់បានរងគ្រោះដោយសារឆ្មាខាំ និងក្រញៅបង្កឱ្យកើតជាជំងឺកាចសាហាវ និងមានគ្រោះថ្នាក់រហូតដល់បាត់បង់ជីវិតរួចមក លោកស៊ូ ម៉ុល ប្រធានក្រុមការងារយុវជនគណបក្សស្រុក និងជាអភិបាលរងស្រុករមាសហែកបានអំពាវនាវឱ្យប្រជាពលរដ្ឋ មានការប្រុងប្រយ័ត្នចំពោះសត្វចិញ្ចឹមឆ្មានិងឆ្កែ គប្បីចាក់វ៉ាក់សាំងការពារជាមុន។
លោកបានអំពាវនាវបែបនេះក្នុងឱកាសដែលរូបលោក និងក្រុមការងារចុះសួរសុខទុក្ខប្រជាពលរដ្ឋដែលរងគ្រោះដោយសារត្រូវសត្វឆ្មាខាំ និងក្រញៅចំនួន៣គ្រួសារកាលពីព្រឹកថ្ងៃទី១៨ ខែមេសា ឆ្នាំ២០១៩ នៅឃុំត្រពាំងស្តៅ ស្រុករមាសហែក។
ជាមួយគ្នានោះដែរ ក្រុមការងារយុវជនគណបក្សស្រុករមាសហែកក៏បានចូលរួមពិធីបុណ្យសពលោកពៅ មល់ អាយុ៣២ឆ្នាំ រស់នៅភូមិត្រពាំងស្គន់ថ្មី ឃុំត្រពាំងស្តៅ ស្រុករមាសហែក ដែលសត្វឆ្មាខាំហើយបានស្លាប់កាលពីថ្ងៃទី១៧ ខែមេសា។
ក្រៅពីនោះក្រុមការងារក៏បានសួរសុខទុក្ខជនរងគ្រោះដោយសារត្រូវសត្វឆ្មាក្រញៅចំនួន២នាក់ កាលពីថ្ងៃទី១៦ ខែមេសា ឆ្នាំ២០១៩ រួមមាន ក្មេងស្រីម្នាក់ឈ្មោះសំ រស្មី អាយុ១៣ឆ្នាំ និងយុវជនម្នាក់ទៀតឈ្មោះសំពិសិដ្ឋ អាយុ១៨ឆ្នាំ ហើយជនរងគ្រោះទាំង២នាក់រស់នៅភូមិត្រពាំងឈ្នាង ឃុំត្រពាំងស្តៅ ស្រុករមាសហែក ត្រូវបានអាណាព្យាបាលនាំទៅមន្ទីរពេទ្យដើម្បីពិគ្រោះយោបល់ និងចាក់ថ្នាំបង្ការរួចហើយពោលគឺមិនមានអាការៈធ្ងន់ធ្ងរនោះទេ។
គួរកត់សម្គាល់ថា ជំងឺកាចសាហាវបណ្តាលមកពីសត្វឆ្មា និងសត្វឆ្កែខាំ ឬក្រញៅនេះ កំពុងមានការព្រួយបារម្ភយ៉ាងខ្លាំងពីប្រជាពលរដ្ឋទូទៅ ធ្វើឲ្យពួកគាត់បាននាំគ្នាសម្រុកទៅចាក់ថ្នាំបង្ការនៅវិទ្យាស្ថានប៉ាស្ទ័រ រាជធានីភ្នំពេញ។ ជាក់ស្តែងនៅខេត្តស្វាយរៀងក្នុងរយៈពេលតែមួយខែប៉ុណ្ណោះមានមនុស្សម្នាក់បានស្លាប់ដោយសារត្រូវសត្វឆ្កែខាំនៅស្រុកស្វាយជ្រំ និងមនុស្សម្នាក់ទៀតបានស្លាប់ រីឯមនុស្ស២នាក់ផ្សេងទៀតបានរងរបួសដោយសារត្រូវសត្វឆ្មាខាំ និងក្រញៅនៅស្រុករមាសហែក៕
ចែករំលែកព័តមាននេះ