រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បានបញ្ជាក់ថា ពលករដែលធ្វើការនៅប្រទេសកូរ៉េ ដែលចូលរួមមហាបាតុកម្មរបសបក្សប្រឆាំងអាចនឹងឈប់ទទួលបានទិដ្ឋការទៅធ្វើការនៅប្រទេសកូរ៉េបើជេប្រមាថ និងប្រើពាក្យអសុរោះមកលើរាជរដ្ឋាបាល ។ ការអះអាងរបស់អ្នកនាំពាក្យគណបក្សកាន់អំណាចនេះ ខណៈដែលក្រុមពលករដែលគាំទ្រគណបក្សប្រឆាំងបានធ្វើមហាបាតុកម្មនៅប្រទេសកូរ៉េ ដោយដឹកនាំដោយលោក សម រង្ស៊ី អតីតប្រធានគណបក្សសង្គ្រោះជាតិ និងក្រុមរបស់លោក ។
យ៉ាងណាក្តីលោកសុខ ឥសាន បានហៅការធ្វើបាតុកម្មរបស់ក្រុមប្រឆាំងនៅក្រៅប្រទេសថាមានអ្នកចូលរួមមិនបានមួយដំបរស្វានោះទេ ។ លោកសុខ ឥសាន បានឲ្យដឹងនៅថ្ងៃទី១៩ មេសានេះថា នៅថ្ងៃទី២០ ខែមេសា ឆ្នាំ២០១៩នេះ ព្ញថានឹងមានមហាបាតុកម្មមួយរៀបចំដោយពួកយុវជនប្រឆាំងម្នាក់ពីរនាក់ និងមានការចូលរួមពីមនុស្សមួយចំនួនតូចតិចតួច ដែលពួកគេខិតខំឃោសនាបំប៉ោងថា មកពីគ្រប់ទិសទីនៅលើពិភពលោក ។ លោកបន្តថា បើតាមការឃោសនាបំប៉ោងអាចនឹងផ្អៀងប្រទេសកូរ៉េខាងត្បូងនេះជាមិនខាន ។ ក៏ប៉ុន្តែការពិតមានមនុស្សមកពីប្រទេសនេះ១ឬ២នាក់ពីប្រទេសនោះ១ឬ២នាក់ ដែលសរុបទៅបានមួយដំបរស្វាប៉ុណ្ណោះបានសេចក្តីថា មិនបានស្មើនឹងប្រជាពុទ្ធបរិស័ទទៅបុណ្យចូលឆ្នាំនៅវត្តមួយផង ។
លោកសុខ ឥសាន ក៏បានវាយតម្លៃការធ្វើបាតុកម្មរបស់ក្រុមប្រឆាំងនៅប្រទេសកូរ៉េថា គឺគ្មានអ្វីក្រៅតែពីទៅជួបជុំគ្នាជេរប្រមាថ បរិហាកេរ្តិ៍សំអុយជាតិសាសន៍ខ្មែរឯងតែមួយមុខប៉ុណ្ណោះទេ ។ លោកបានបញ្ជាក់ថា«នេះហើយដែលហៅថា ចរិតអ្នកស្នេហាជាតិរបស់ពួកគេ ។ ដោយសារមានចរិតប្រមាថជាតិសាសន៍ឯងយ៉ាងនេះហើយគង់មានថ្ងៃណាមួយពួកទាំងនេះនឹងឈប់បានទទួលទិដ្ឋាការឲ្យនៅធ្វើការនៅប្រទេសកូរ៉េ ពេលនោះនឹងឃើញទឹកភ្នែកជូតក្បាលជង្គង់ជាមិនខាន» ។ លោកគូសបញ្ជាក់ថា នៅពេលនោះទុកឲ្យពួកឧទ្ទាមខ្មែរក្បត់ជាតិរត់ចោលស្រុកមកជួយចុះកុំស្រែកដង្ហោយរកជំនួយពីស្ថានទូតខ្មែរនៅប្រទេសកូរ៉េអី ៕
ចែករំលែកព័តមាននេះ