បង្គោលក្រហម សេក សារ៉ាន់ ឈ្នះពិន្ទុ បានឡើងវគ្គ១៦នាក់
- ភ្នំពេញ
រាជធានីភ្នំពេញ ៖ ការប្រកួតកំពូលជើងឯក TV5 Boxing Knock Out Series By K-Cement…
រាជធានីភ្នំពេញ ៖ ការប្រកួតកំពូលជើងឯក TV5 Boxing Knock Out Series By K-Cement នៅប៉ុស្ដិ៍លេខ៥ កាលពីថ្ងៃ២០ ខែមេសា កីឡាករ៤រូបបានឡើងប្រកួតគ្នា ដើម្បីជ្រើសយក២រូបឡើងទៅវគ្គបន្ត ហើយ២នាក់ដែលចាញ់ការប្រកួតត្រូវធ្លាក់ហាលអាវ។ យ៉ាងណាមិញក្នុងចំណោម៤រូបដែលឡើងប្រកួតគ្នាគេកត់សម្គាល់ថា កីឡាករមួយគូ គឺកីឡាករសេក សារ៉ាន់ មកពីក្លិបអង្គរមានជ័យ ខេត្តសៀមរាប និងកីឡាករបង្គោលខៀវ ម៉ៅ ប៉ោក មកពីក្លិបរាជសីហ៍ ខេត្តរតនៈគីរី ដោយសារតែកីឡាករទាំងពីរ ទម្រាំរកឃើញចាញ់ឈ្នះគឺម្នាក់ៗវេទនាខ្លាំង។
ការប្រកួតដែលបានធ្វើឡើងនៅប៉ុស្ដិ៍លេខ៥ ស្ថិតនៅព្រែកកំពិសនោះ កាន់តែឈានជិតចប់វគ្គជម្រុះ៣២នាក់យកតែ១៦នាក់ហើយ ដោយកីឡាករដែលបានឡើងទៅវគ្គបន្តញញឹមបិទមាត់មិនជិតនោះទេ បើទោះជាដឹងថា ការប្រកួតរបស់ខ្លួនក្នុងវគ្គ១៦នាក់យក៨នាក់ គឺជាវគ្គដ៏តានតឹងដែលពិបាកសង្ឃឹម តែឱ្យតែបានឡើងទៅវគ្គបន្តសិន គឺចាត់ទុកថា ខ្លួនមានយីអ៊ុនហើយ។
កីឡាករបង្គោលក្រហម សេក សារ៉ាន់ ត្រូវគេឃើញបង្ហាញសមត្ថភាពបានយ៉ាងល្អសម្រាប់ការប្រកួតដែលពោរពេញដោយភាពស្វិតស្វាញនោះ។ ក្នុងទឹកទី១ កីឡាករទាំងពីរប្រកួតទៅប្រកួតមក រកមិនឃើញអ្នកណាក្ដោបក្ដាប់ពិន្ទុបានច្រើននោះទេ ប៉ុន្តែឈានដល់ទឹកទី២ កីឡាករបង្គោលក្រហមដែលអ្នកទស្សនាភាគច្រើនមិនសូវសង្ឃឹមថា នឹងឈ្នះ ស្រាប់តែធ្វើបានល្អ ហើយវាយសង្គ្រប់បង្គោលខៀវត្រូវចំគោលដៅ រហូតធ្វើឱ្យអ្នកគាំទ្រដែលក្នុងទឹកទី១ ទុកចិត្តបង្គោលខៀវជាងប្រែជាទះដៃអបអរចំពោះបង្គោលក្រហមវិញ។
ក្នុងទឹកទី៣ ដែលទឹកកាត់ក្ដី រឹតតែធ្វើឱ្យអ្នកទស្សនាជាប់ចិត្តនឹងកណ្ដាប់ដៃរបស់បង្គោលក្រហមខ្លាំងឡើង ជាពិសេសនៅពេលគេវ័ធកែងបានល្អ ហើយធ្វើឱ្យបង្គោលខៀវកាន់តែចូលកាន់តែទទួលកណ្ដាប់ដៃយ៉ាងចាស់ដៃ ហើយទ័លទីរកផ្លូវតស៊ូលែងបាន។ មួយគូរនេះ គេដឹងថា កីឡាករបង្គោលក្រហមឈ្នះប្រៀប និងបានឡើងទៅកាន់វគ្គ១៦នាក់តាំងពីមិនទាន់ប្រកាសលទ្ធផល អ៊ីចឹងហើយទើបគ្រាន់តែប្រកាសថា កីឡាករ សេក សារ៉ាន់ ជាអ្នកឈ្នះពិន្ទុគឺម្នាក់ៗសប្បាយចិត្ត។
យ៉ាងណាមិញ គេមិនទាន់ដឹងថា សមត្ថភាពយកឈ្នះយ៉ាងខ្លាំងក្លារបស់សេក សារ៉ាន់ តើអាចឱ្យគេបានឡើងទៅវគ្គ៨នាក់ក្នុងវគ្គបន្តបានឬមិនបាននោះទេ?
ចែករំលែកព័តមាននេះ