ឮគេប្រាប់ថាប្តី…ប្រពន្ធសុំគ្រូពេទ្យបីកូនខ្ចីទៅមើល លុះឃើញហើយយំមិនចេញ

ថ្ងៃទី ១៩ ខែ មេសា ឆ្នាំ ២០១៩
ម៉ោង ១៥:២៥
ច័ន្ទ រស្មី

ខេត្តសៀមរាប ៖ បុរសម្នាក់ស្រាតខោអាវឡើងទៅចងកសម្លាប់ខ្លួននៅលើដើមចាមរី ដែលមានកំពស់១០ម៉ែត្រ ស្ថិតនៅខាងក្រោយមន្ទីរពេទ្យគន្ធបុប្ផាសៀមរាប បង្កឱ្យមានការភ្ញាក់ផ្អើលដល់ប្រពន្ធដែលទើបនឹងសម្រាលកូននៅក្នុងមន្ទីរពេទ្យ បីកូនមកស្រែកទ្រហោយំ ព្រោះមិននឹកស្មានថា ប្តីរបស់គាត់គិតខ្លីដូច្នេះសោះ។

ហេតុការណ៍ខាងលើនេះបង្កឱ្យមានការភ្ញាក់ផ្អើលបានកើតឡើងកាលពីវេលាម៉ោង៨និង៣០នាទីព្រឹកថ្ងៃទី១៨ ខែមេសា ឆ្នាំ២០១៩ ស្ថិតនៅខាងក្រោយមន្ទីរពេទ្យគន្ធបុប្ផាសៀមរាប ក្នុងភូមិត្រពាំងសេះ សង្កាត់គោកចក ក្រុងសៀមរាប។

លោកវរសេនីយ៍ទោ នួន ស័ក្ក ចំរើនរិទ្ធ អធិការរង ទទួលផែនព្រហ្មទណ្ឌ នៃអធិការនគរបាលក្រុងសៀមរាប បានប្រាប់តាមទូរស័ព្ទកាលពីវេលាម៉ោង១០និង១៤នាទីព្រឹកថ្ងៃទី១៩ ខែមេសា ឆ្នាំ២០១៩នេះថា ជនរងគ្រោះដែលស្លាប់ឈ្មោះ លី ម៉ាន់ថង ភេទ ប្រុស អាយុ៣៧ឆ្នាំ មានទីលំនៅបច្ចុប្បន្នភូមិ ទំនប់ ក៥ សង្កាត់ ប៉ោយប៉ែត ក្រុង ប៉ោយប៉ែត ខេត្តបន្ទាយមានជ័យ។

លោកបានបញ្ជាក់បន្ថែមថា តាមការបំភ្លឺរបស់ប្រពន្ធជនរងគ្រោះឈ្មោះ ហុក អាង អាយុ៤១ឆ្នាំ បានឱ្យដឹងថា គាត់ជាមួយប្ដីបានធ្វើដំណើរចេញពីពីខេត្តបន្ទាយមានជ័យ តាំងពីថ្ងៃទី១៦ មេសា ឆ្នាំ២០១៩ ដោយសារគាត់មកសម្រាលកូន ហើយត្រូវក្រុមគ្រូពេទ្យឱ្យធ្វើការវះកាត់ ទើបត្រូវសម្រាកក្នុងមន្ទីរពេទ្យគន្ធបុប្ផាសៀមរាប។

ស្ត្រីជាប្រពន្ធជនរងគ្រោះបានរៀបរាប់បន្តថា កាលពីយប់ថ្ងៃទី១៧ ខែ មេសា ឆ្នាំ ២០១៩ ប្ដីរបស់គាត់ជាមនុស្សញៀនស្រា និងធ្លាប់ប្រើប្រាស់គ្រឿងញៀនផងនោះ ដោយទ្រាំមិនបាន ប្ដីរបស់គាត់បានចេញមកខាងក្រៅមន្ទីរពេទ្យលួចផឹកស្រាបានប្រហែលជាពីរម៉ោងរួចក៏ចូលទៅមន្ទីរពេទ្យវិញ ពេលនោះគាត់ក៏ធុំក្លិនស្រា និងស្ដីបន្ទោសឱ្យ ធ្វើឱ្យប្ដីរបស់គាត់ខឹង ក៏ដើរចេញមកក្រៅបាត់រហូតតែម្ដង។

ស្ត្រីជាប្រពន្ធជនរងគ្រោះបានរៀបរាប់បន្តទៀតថា លុះព្រឹកឡើងថ្ងៃទី១៨ ខែមេសា មានក្រុមអ្នកគ្រូពេទ្យមកប្រាប់ថាប្តីរបស់គាត់បានស្រាតខោអាវចង.កសម្លាប់ខ្លួនលើដើមចាមរី ពេលឮដូច្នេះ គាត់ក៏សុំគ្រូពេទ្យបីកូនចេញទៅមើលកន្លែងកើតហេតុ ស្រាប់តែឃើញដូចគេប្រាប់មែន ធ្វើឱ្យគាត់យំក៏យំមិនចេញដែរ ព្រោះមិននឹកស្មានថា គ្រាន់តែគាត់ហាមមិនឱ្យផឹកស្រាប៉ុណ្ណឹងសោះ រឿងអីប្តីសម្លាប់ខ្លួនបែបនេះ។

ក្រោយពេលកើតហេតុ សពជនរងគ្រោះ ត្រូវបានសមត្ថកិច្ចប្រគល់ឱ្យគ្រួសារយកទៅបូជានៅវត្តប្រាសាទគោកចក ស្ថិតនៅក្នុងភូមិ វាល សង្កាត់គោកចក ក្រុងសៀមរាប រួចរាល់អស់ហើយ ថែមទាំង ត្រូវបានលោកមេភូមិជូនប្រាក់ដល់ប្រពន្ធជនរងគ្រោះចំនួន៨០ដុល្លារ និងបងប្អូនប្រជាពលរដ្ឋដែលទៅមើលឃើញហើយអាណិត ក៏បានជូនប្រាក់ដល់ប្រពន្ធរបស់ជនរងគ្រោះផងដែរ ៕