ខេត្តកណ្តាល ៖ បុរសម្នាក់ត្រូវអ្នកជិតខាងទៅដោះសំរះ ស្រាប់តែប្រទះឃើញអណ្តែតទឹក ខណៈដែលបុរសរងគ្រោះទៅឆក់ត្រីនៅពេលផឹកស្រា រួចជិះទូកទៅឆក់ត្រី ក៏ឆក់ខ្លួនឯងស្លាប់។ ហេតុការណ៍នេះបានកើតឡើងកាលពីម៉ោង៧ព្រឹក នៅថ្ងៃទី១៨ ខែមេសា ឆ្នាំ២០១៩ ចំណុចបឹងកិច្ច ក្នុងភូមិព្រែកល្វា ឃុំព្រែកតាកូវ ស្រុកខ្សាច់កណ្តាល ។
ជនរងគ្រោះខាងលើឈ្មោះ អឿន ចាន់ថន ហៅម៉ាប់ ភេទប្រុស អាយុ៣៤ឆ្នាំ មុខរបរកម្មកររោងចក្រ មានទីលំនៅភូមិព្រែកល្វា ឃុំព្រែកតាកូវ ស្រុកខ្សាច់កណ្តាល មានប្រពន្ធឈ្មោះ ម៉ាឡៃ អាយុ២៥ឆ្នាំ មុខរបរកម្មកររោងចក្រ មានកូន២នាក់ ក្នុងនោះប្រុស ចំណែកវត្ថុតាងនៅកន្លែងកើតហេតុមានអាគុយចំនួន១កម្លាំង៤០អំពែ ដុំឆក់ចំនួន០១ និងដងឆក់ធ្វើពីឬស្សីចំនួន០១។
បើតាមសាក្សីបានឱ្យដឹងថា នៅថ្ងៃទី១៧ មេសា ម៉ោង៩យប់ជនរងគ្រោះបានផឹកស្រាជាមួយអ្នកជិតខាងរហូតដល់ម៉ោង២រំលងអធ្រាត្រឈានចូលថ្ងៃទី១៨ មេសា ជនរងគ្រោះបានទៅយកឧបករណ៍ឆក់ត្រីពីក្នុងផ្ទះរបស់ខ្លួន ហើយជិះទូកតែម្នាក់ឯងឆ្ពោះទៅឆក់ត្រីនៅបឹងកិច្ច ។ លុះដល់ម៉ោង៧ព្រឹក បុរសម្នាក់ឈ្មោះហម ថា អាយុ៤៥ឆ្នាំ រួមនឹងឈ្មោះអយ អឿន ឈ្មោះកាន គីម បាននាំគ្នាទៅហ៊ុមសំរះនៅបឹងកិច្ចនោះដែរ ។ ពេលទៅដល់បឹងក៏ឃើញអាគុយដុំឆក់នៅលើទូក និងឃើញដងឆក់អណ្តែតក្នុងទឹក ។
ប្រភពដដែលបន្តថា ពេលនោះឈ្មោះហម ថា បានទៅមើល ស្រាប់តែជនរងគ្រោះស្លាប់នៅក្នុងទឹក ដោយដៃកាន់ដងឆក់ជាប់ ពេលនោះឈ្មោះហម ថា បានប្រាប់បងប្អូនរបស់ជនរងគ្រោះ ព្រមទាំងរាយការណ៍ជូនសមត្ថកិច្ចនគរបាលប៉ុស្តិ៍ព្រែកតាកូវ ហើយក្រុមគ្រួសារបានស្រង់សពជនរងគ្រោះយកមកផ្ទះ ។
ក្រោយពេលកើតហេតុ បន្ទាប់មកសមត្ថកិច្ចជំនាញសហការជាមួយកម្លាំងនគរបាលប៉ុស្តិ៍ព្រែកតាកូវ ពិនិត្យសាកសពដោយហ្មត់ចត់ឃើញថា មានស្លាកស្នាមស្លោកនៅម្រាមដៃឆ្វេង ក្រៅពីនេះពុំមានស្លាកស្នាមអ្វីគួរឲ្យកត់សម្គាល់ឡើយ រួចក៏បានប្រគល់សពជូនក្រុមគ្រួសារធ្វើបុណ្យតាមប្រពៃណី៕
ចែករំលែកព័តមាននេះ