រាជធានីភ្នំពេញ ៖ មន្ត្រីនគរបាលមួយរូបបម្រើការងារនៅប៉ុស្តិ៍រដ្ឋបាលនគរបាលក្បាលកោះ ចំណុះអធិការដ្ឋាននគរបាលខណ្ឌច្បារអំពៅ បានផ្ទុះអាវុធមួយគ្រាប់ ដើម្បីបំបែកហ្វូងក្រុមក្មេងស្ទាវវាយគ្នា បណ្តាលឱ្យពលរដ្ឋចំនួន៣នាក់ត្រូវរងរបួសធ្ងន់ស្រាល នៅចំណុចភូមិព្រែកធំ១ សង្កាត់ក្បាលកោះ ខណ្ឌច្បារអំពៅ កាលពីម៉ោង៩យប់ ថ្ងៃទី១៣ ខែមេសា ឆ្នាំ២០១៩ កន្លងទៅ ។
មន្ត្រីនគរបាលរូបនោះ ឈ្មោះម៉ាត់ រតនា អាយុជាង៣០ឆ្នាំ ហើយត្រូវបានក្រុមពលរដ្ឋអះអាងថា ជានគរបាលដែលក្រអើតក្រទោមកោងកាងនៅក្នុងភូមិសាស្ត្រសង្កាត់ក្បាលកោះបំផុត ។
តាមប្រភពព័ត៌មានឱ្យដឹងថា នៅមុនកើតហេតុ គឺមានការដាក់ធុងប៉ាស់រាំលេងកម្សាន្តក្នុងឱកាសបុណ្យចូលឆ្នាំប្រពៃណីជាតិខ្មែរ ប៉ុន្តែការរាំលេងនោះ ស្រាប់តែបង្កឱ្យកើតមានជាជម្លោះវាយតប់គ្នាពីសំណាក់ក្រុមក្មេងស្ទាវដែលចូលទៅរាំលេង ។ កំឡុងកើតមានការវាយតប់គ្នា គេសង្គេតឃើញវត្តមានមន្ត្រីនគរបាលប៉ុស្តិ៍ក្បាលកោះមួយក្រុមមានគ្នា៤ទៅ៥នាក់ចុះទៅអន្តរាគមន៍ដល់កន្លែងកើតហេតុ ដើម្បីទប់ស្កាត់ការវាយតប់គ្នាពីសំណាក់ក្រុមក្មេងស្ទាវ ប៉ុន្តែដោយសារស្ថានការណ៍មានភាពផ្ទុះហិង្សាកាន់តែខ្លាំងពេក មន្ត្រីនគរបាលឈ្មោះម៉ាត់ រតនា បានដកកាំភ្លើងបាញ់ភ្ចុចផ្លូវប៉េតុង បណ្តាលឱ្យគ្រាប់កាំភ្លើងខ្ទាតផ្លាតចំមនុស្សចំនួន៣នាក់រងរបួស ក្នុងនោះម្នាក់ធ្ងន់ ២នាក់ស្រាល ។
ជុំវិញករណីផ្ទុះអាវុធខាងលើនេះ នាយប៉ុស្តិ៍រដ្ឋបាលនគរបាលក្បាលកោះ លោកអ៊ុន ប៊ុនណា ថ្លែងប្រាប់កោះសន្តិភាពតាមរយៈទូរស័ព្ទនៅ ព្រឹកថ្ងៃទី១៨ ខែមេសានេះឱ្យដឹងថា ករណីផ្ទុះអាវុធខាងលើនេះ គឺកូនចៅរបស់លោកផ្ទុះដោយអចេតនានោះទេ ពោលគឺកំឡុងពេលដែលនគរបាលអន្តរាគមន៍ឃាត់ក្រុមក្មេងស្ទាវដែលវាយគ្នានើ ក្នុងនោះមានអ្នកខ្លះជាមន្ត្រីយោធាផងដែរ ។
ហើយពួកគេពុំព្រមស្តាប់ការសម្របសម្រួលរបស់សមត្ថកិច្ចឡើយ និងប្រុងប្រើហិង្សារទៅលើក្រុមសមត្ថកិច្ចទៀតផង ជាហេតុធ្វើអោយកូនចៅរបស់លោក ម៉ាត់ រតនា បានដកកាំភ្លើងចេញពីចង្កេះអាមេគំរាមទៅលើពួកគេដោយពុំបានបាញ់នោះទេ ហើយក៏ដាក់ចូលទៅក្នុងស្រោមកាំភ្លើងវិញ ប៉ុន្តែពេលដាក់ចូលស្រោមនៅចង្កេះវិញនោះ ដោយពុំបានបិទសោកាំភ្លើង ជាហេតុបណ្តាលឱ្យរាលកៃផ្ទុះមួយគ្រាប់ ហើយខ្ទាតគ្រាប់កាំភ្លើងចំពលរដ្ឋរងរបួសតែម្តងទៅ ។
លោកនាយប៉ុស្តិ៍បញ្ជាក់ថា ករណីនេះមន្ត្រីនគរបាលរបស់លោកដែលបានផ្ទុះអាវុធនើ បានចរចាសំណងសម្របសម្រួលជាមួយជនរងគ្រោះទាំងអស់ហើយ ហើយក្រុមជនរងគ្រោះក៏សម្រេចទទួលយកការសម្របសម្រួលបញ្ចប់រឿង ដោយមិនមានការប្តឹងប្តល់នោះឡើយ។
ជុំវិញករណីខាងលើនេះ ក្រុមពលរដ្ឋលើកឡើងថា ជាករណីផ្ទុះអាវុធដោយចេតនា ពោលគឺមន្ត្រីនគរបាលរូបនោះដកកាំភ្លើងបាញ់ភ្ជុចដី ហើយខ្ទាតគ្រាប់កាំភ្លើងត្រូវពលរដ្ឋបណ្តាលឱ្យរងរបួស ខណៈដែលលោកប៉ុស្តិ៍បញ្ជាក់ថា ជាការផ្ទុះដោយអចេតនាទៅវិញ ។
ចំណែកអធិការរងនគរបាលខណ្ឌច្បារអំពៅ លោកម៉ៅ សឿត ក៏បានបញ្ជាក់មកកាន់កើសន្តិភាពដូចគ្នាទៅនឹងលោកនាយប៉ុស្តិ៍ក្បាលកោះ ថា ករណីនេះ គឺជាករណីរាលកៃដោយអចេតនាប្រាកដមែន ពុំមែនជាករណីដែលមានចេតនាប៉ងបាញ់គំរាមលើក្រុមពលរដ្ឋដែលកំពុងមានជម្លោះនោះឡើយ ។
យ៉ាងណាមិញ ជុំវិញករណីខាងលើនេះ មជ្ឈដ្ឋានទូទៅសម្តែងអារម្មណ៍សោកស្តាយ និងមិនពេញចិត្តបំផុតចំពោះកំសោយនៃការចុះអន្តរាគមន៍ពីសំណាក់ក្រុមមន្ត្រីនគរបាលខាងលើ ដែលមានការធ្វើប្រហែសរហូតមានការផ្ទុះអាវុធបង្កឱ្យមានរងរបួសបែបនេះ ។ ពលរដ្ឋ ដាក់សំណួរថា ចុះបើថ្ងៃខាងមុខ អាចកើតមានការធ្វេសប្រហែសដូចករណីខាងលើទៀត តើអាចនឹងមានមនុស្សត្រូវរងរបួសបន្តទៀត ឬក៏ត្រូវបាត់បង់អាយុជីវិតដោយសារការធ្វេសប្រហែសរបស់អស់លោកជាអ្នកអនុវត្តច្បាប់?
ដូច្នេះហើយ ក្រុមនគរបាលដែលជាមេកើយ ឬក៏ប្រធានអង្គភាព ដែលមានលោកអធិការនគរបាលខណ្ឌដែលជាអ្នកដឹកនាំក្នុងមូលដ្ឋានខណ្ឌច្បារអំពៅ គួរណាស់មានវិធានការ ឬក៏ការដាក់វិន័យណាមួយលើមន្ត្រីនគរបាលរូបនោះ ដើម្បីជាការដាក់ទោសចំពោះកំហុសខុសឆ្គងដែលរូបគេបានប្រព្រឹត្តិខុសចំពោះក្រុមប្រជាពលរដ្ឋធម្មតា ពិសេសករណីខាងលើជាក់ស្តែង ៕
ចែករំលែកព័តមាននេះ