រាជធានីភ្នំពេញ ៖ រយៈពេល៣ថ្ងៃនៃពិធីបុណ្យចូលឆ្នាំប្រពៃណីជាតិខ្មែរ ឆ្នាំកុរ ឯកសក្តិ ២៥៦៣ បងប្អូនប្រជាពរដ្ឋ និងភ្ញៀវទេសចរអន្តរជាតិចូលរួមកំសាន្តក្នុងព្រឹត្តិការណ៍សង្ក្រាន្ត និងតាមរមណីយដ្ឋានទេសចរណ៍ប្រមាណជាង៤លាននាក់ (មិនទាន់គិតដល់បងប្អូនប្រជាពលរដ្ឋដែលនាំគ្នាកំសាន្តតាមវត្តអារាម សាលារៀន តាមភូមិប្រមាណជាង៣លាននាក់ផងទៀត) ។
នេះបើយោងតាមរបាយការណ៍បថមរបស់មន្ទីរទេសចរណ៍រាជធានី-ខេត្តតាមការវាយតម្លៃជំហានដំបូង ភ្ញៀវទេសចរ និងបងប្អូនប្រជាពលរដ្ឋដែលបានដើរកម្សាន្តនៅតាមគោលដៅទេសចរណ៍សំខាន់ៗ និងតាមទីកន្លែងប្រារព្ធព្រឹត្តិការណ៍សង្ក្រាន្តសំខាន់ៗ នាឱកាសពិធីបុណ្យចូលឆ្នាំប្រពៃណីជាតិខ្មែរ ថ្ងៃទី១៤-១៦ ខែមេសា មានចំនួនសរុបប្រមាណ៤.៧២៦.៦០២នាក់ កើនឡើង៦៧.០២% ក្នុងនោះភ្ញៀវជាតិមានចំនួន ៤.៦៣៩.៣៤១នាក់ កើនឡើង៦៦.៤០%, ភ្ញៀវអន្តរជាតិមានចំនួន៨៣.១២៣នាក់ កើនឡើង៩៨.២៧%។
ភ្ញៀវទេសចរក្នុងថ្ងៃទី១ នៃពិធីបុណ្យត្រូវនឹងថ្ងៃទី១៤ ខែមេសា មានភ្ញៀវសរុបចំនួនប្រមាណ៨១៦.៤៩៦នាក់ កើនឡើង៩.៤០% ក្នុងនោះភ្ញៀវជាតិមានប្រមាណ៧៨៣ ៦៣២ នាក់ និងភ្ញៀវអន្តរជាតិមានប្រមាណ៣២.៦៦៤ នាក់។ ថ្ងៃទី២ នៃពិធីបុណ្យត្រូវនឹងថ្ងៃទី១៥ ខែមេសា មានភ្ញៀវសរុបចំនួនប្រមាណ១.៦០៩.៧២១នាក់ កើនឡើង២៨.៣៣% ក្នុងនោះភ្ញៀវជាតិមានប្រមាណ១.៥៨២.១២៩នាក់ និងភ្ញៀវអន្តរជាតិមានប្រមាណ២៧.៤៧៤នាក់។ ចំណែកថ្ងៃទី៣ នៃពិធីបុណ្យត្រូវនឹងថ្ងៃទី១៦ ខែមេសាមានភ្ញៀវសរុបចំនួនប្រមាណ២.២៧៥.១៨៥នាក់ កើនឡើងប្រមាណ១៥៩.៨៥% ក្នុងនោះភ្ញៀវជាតិមានប្រមាណ២.២៧៣.១៨០នាក់ និងភ្ញៀវអន្តរជាតិមានប្រមាណ ២២.៩៨៥នាក់។
ជាការគួរឲ្យកត់សម្គាល់ តួលេខខាងលើ គឺគ្រាន់តែជាការប៉ាន់ស្មានជំហានដំបូងសម្រាប់គោលដៅទេសចរណ៍សំខាន់ៗ និងតាមទីកន្លែងប្រារព្ធព្រឹត្តិការណ៍សង្ក្រាន្តសំខាន់ៗ ដោយមិនទាន់គិតពីចំនួនបងប្អូនប្រជាពលរដ្ឋនៅតាមគោលដៅបន្ទាប់បន្សំនានាដូចជាវត្តអារាម សាលារៀន ភូមិ ឃុំ ស្រុក និងទីប្រជុំជននានា ដែលមានចំនួនមិនតិចជាង៣លាននាក់ទេ សម្រាប់៣ថ្ងៃនេះបន្ថែមពីលើចំនួនខាងលើ។
លោកថោង ខុន រដ្ឋមន្ត្រី ក្រសួងទេសចរណ៍បានគូសបញ្ជាក់ថា ការចូលរួមកំសាន្តដ៏ច្រើនកុះកររបស់បងប្អូនប្រជាពលរដ្ឋយើងនេះ បានបញ្ជាក់កាន់តែច្បាស់ណាស់ថា ប្រជាពលរដ្ឋយើងពេញចិត្តនឹងសភាពការណ៍ប្រទេសជាតិបច្ចុប្បន្ន ពេញចិត្តនឹងគាំទ្រដាច់ខាតចំពោះការដឹកនាំដ៏ត្រឹមត្រូវ និងឈ្លាសវៃរបស់សម្តេចតេជា ហ៊ិន សែន ។
ប្រជាពលរដ្ឋពិតជាត្រូវការសុខសន្តិភាព និងការអភិវឌ្ឍន៍ គ្រប់ទីកន្លែង មិនថា តាមរមណីយដ្ឋាន ទេសចរណ៍ ប៉ុន្តែតាមវត្តអារាម សាលារៀន តាមភូមិ តាមផ្ទះសំបែង ។ល។ គឺគ្រប់គ្រួសារសុទ្ធតែបានចូលរួមយ៉ាងសប្បាយរីករាយក្នុងបុណ្យចូលឆ្នាំថ្មី ប្រពៃណីជាតិរបស់ខ្លួនប្រកបដោយស្មារតីគោរពស្រឡាញ់ប្រពៃណីវប្បធម៌របស់ខ្លួន មានការយល់ដឹងកាន់តែច្រើនអំពីវប្បធម៌ ប្រពៃណីជាតិ ស្គាល់តម្លៃបរិស្ថាន ផ្តល់ភាពកក់ក្តៅជិតស្និទ្ធដល់ទេសចរជាតិនិងអន្តរជាតិ សមត្ថកិច្ចគ្រប់ផ្នែក គ្រប់ជាន់ថ្នាក់ និងមានការទទួលខុសត្រូវខ្ពស់ក្នងការរៀបចំចាត់តាំងព្រឹត្តការណ៍សង្ក្រានបានល្អ។
នៅតាមផ្ទះសំបែង និងតាមក្រុមតូចៗខ្លះ ប្រជាពលរដ្ឋបានទិញធុងបាស់ទំនើបប្រើប្រពន្ធ Bluetooth យ៉ាងងាយស្រួល។ នៅតាមវត្តអារាម តាមភូមិដ្ឋាន កំលាំងប្រជាការពារបានបំពេញតួនាទី ភារកិច្ចរបស់ខ្លួនបានត្រឹមត្រូវល្អណាស់។ និយាយរួមបងប្អូនប្រជាពលរដ្ឋយើងសប្បាយណាស់ឆ្នាំនេះ សប្បាយនឹងសុខសន្តិភាព សប្បាយនឹងការអភិវឌ្ឍរបស់ប្រទេសជាតិ។
អ្វីៗវាបញ្ជាក់ច្បាស់នៅពេលនេះ ទោះបីកន្លងមកគេធ្លាប់និយាយថា នៅស្រុកខ្មែរហាក់ដូចមានបុណ្យចូលឆ្នាំច្រើន តែពេលនេះបានឃើញ និងបញ្ជាក់ច្បាស់ហើយថា ខ្មែរ គឺជាខ្មៃរ គឺជាប្រជាជាតិមួយដែលធ្លាប់មានអម្បូរពូជពង្ស និងវប្បធម៌ប្រពៃណីដ៏ថ្លៃថ្នូររុងរឿង។ ក្រោមម្លប់នៃសន្តិភាព និងការរីកចំរើន ជីវភាពរស់នៅរបស់បងប្អូនប្រជាពលរដ្ឋមានការអភិវឌ្ឍ ដែលបានធ្វើឲ្យពួកគាត់មានការរីករាយ ព្រមទាំងបានធ្វើឲ្យការរៀបចំពិធីបុណ្យចូលឆ្នាំប្រពៃណីជាតិឆ្នាំនេះប្រព្រឹត្តទៅបានយ៉ាងល្អ និងឆ្លុះបញ្ចាំងពីអត្តសញ្ញាណខ្មែរពិតៗ៕
ចែករំលែកព័តមាននេះ