ទីក្រុង​ក​ដ្ឋ​ម​ណ្ឌូ ៖ លោក Balendra Shah ដែល​ជា​តារាចម្រៀង​រ៉េ​ប​ប្រែក្លាយ​ខ្លួន​ជា​អ្នកនយោបាយ និង​ជា​ឥស្សរជន​ដ៏​មាន​ប្រជាប្រិយភាព​បំផុត​នៅ​ក្នុង​ក្រុម​មនុស្ស​ជំនាន់ Z ឬ Gen Z (Generation Z) ដ្បិត​អ្នកជំនាញ​វិស្វកម្ម​សំណង់​វ័យ​៣៥​ឆ្នាំ​រូប​នេះ កំពុង​តែ​បោះ​ជំហាន​ខិត​ជិ​t​ក្លាយជា​នាយក​រដ្ឋមន្ត្រី​ថ្មី​របស់​ប្រទេស​នេ​ប៉ា​ល់ បន្ទាប់​ពី​គណបក្ស​លោក​បាន​ឈ្នះ​ដោយ​សំឡេង​គាំទ្រ​មិន​ធ្លាប់​មាន​ពី​មុន​មក​។

លោក Balendra Shah ឬ Balen និង​គណបក្ស​កណ្តាល​និយម Rastriya Swatantra (RSP) របស់​លោក​ទទួល​បាន​ជ័យជម្នះ​ដ៏​កម្រ​ជា​លើក​ដំបូង​ក្នុង​ការ​បោះ​ឆ្នោតជាតិ ចាប់តាំងពី​ផ្ទុះ​ការ​តវ៉ា​ដឹកនាំ​ដោយ​ក្រុម Gen Z ដែល​អំឡុង​ពេល​នោះ​មនុស្ស​រាប់​សិប​នាក់​ត្រូវ​បាន​សម្លាប់ ហើយ​រដ្ឋាភិបាល​ចាស់​ត្រូវ​បាន​ផ្តួលរំលំ​។

ការ​បោះ​ឆ្នោត​កាលពី​ថ្ងៃ​ទី​៥ ខែមីនា ឆ្នាំ​២០២៦ បាន​ជ្រើសរើស​សភាតំណាងរាស្ត្រ​ថ្មី តំណាង​ឱ្យ ២៧៥ អាសនៈ ដែល​សភា​ជាន់​ទាប​មាន ១៦៥ អាសនៈ​តាម​រយៈ​ការ​បោះ​ឆ្នោត​ដោយ​ផ្ទាល់ និង ១១០ អាសនៈ តាម​រយៈ​តំណាង​សមាមាត្រ​។

គិត​ត្រឹម​ល្ងាច​ថ្ងៃ​ទី​៩ ខែមីនា ឆ្នាំ​២០២៦ (​ម៉ោង​នៅ​ក្នុងស្រុក​) គណបក្ស RSP របស់​លោក Balendra Shah បាន​ឈ្នះ ១២៥ អាសនៈ​នៅ​ក្នុង​ចំណោម ១៦៥ អាសនៈ​។ យោង​តាម​របាយការណ៍​ពី BBC Nepali ផ្អែក​លើ​ទិន្នន័យ និង​រូបមន្ត​ចុង​ក្រោយ​បំផុត​របស់​គណៈកម្មការ​រៀបចំ​ការ​បោះ​ឆ្នោត គណបក្ស RSP ដែល​បង្កើត​កាលពី​៣​ឆ្នាំ​មុន​នោះ ទំនងជា​ទទួល​បាន​យ៉ាង​ហោច​ណាស់ ៥៨ អាសនៈ​ក្នុង​ចំណោម ១១០ អាសនៈ ដែល​ត្រូវ​បែងចែក​តាម​តំណាង​គណបក្ស​នីមួយ​ៗ​។

មន្ត្រី​ម្នាក់​មក​ពី​គណៈកម្មការ​រៀបចំ​ការ​បោះ​ឆ្នោត​បានឱ្យ​ដឹង​ថា ការ​រាប់​សន្លឹក​ឆ្នោត​ទាំងអស់​នឹង​ត្រូវ​បញ្ចប់​នៅ​ល្ងាច​ថ្ងៃ​ទី​១០ ខែមីនា ឆ្នាំ​២០២៦ (​ម៉ោង​ក្នុងស្រុក​) ហើយនឹង​បន្ត​ចំណាយពេល​យ៉ាង​ហោច​ណាស់​៤​ថ្ងៃ សម្រាប់​គណៈកម្មការ​ដើម្បី​ប្រកាស​លទ្ធផល​ចុង​ក្រោយ​ជា​ផ្លូវការ​។

លោក Shah បាន​គូសបញ្ជាក់​ពី​គោលនយោបាយ​សុខភាព និង​ការ​អប់រំ​សម្រាប់​ប្រជាជន​ក្រីក្រ ជា​ចំណុច​សំខាន់​នៃ​យុទ្ធនាការ​របស់​លោក ដោយ​ទទួល​បាន​ប្រជាប្រិយភាព​ភ្លូកទឹកភ្លូកដី ជា​ពិសេស​ក្នុង​ចំណោម​យុវជន Gen Z​។ លោក​ថា ការ​បោះ​ឆ្នោត​នេះ បាន​ឆ្លុះ​បញ្ចាំង​ពី​ការ​បដិសេធ​របស់​លោក​ក្នុង​ការ​ជ្រើសរើស​ផ្លូវ​ដឹកនាំ​បែប​ងាយស្រួល ហើយ​សង្កត់ធ្ងន់​ដោយ​បាន​រាប់​បញ្ចូល​នូវ​បញ្ហា​នានា រួម​ទាំង​ការ​ក្បត់ ពុក​រលួយ ដែល​បាន​ប៉ះពាល់​ដល់​ប្រទេស​នេ​ប៉ា​ល់​។

លោក Ramesh Paudyal មេដឹកនាំ​ជាន់ខ្ពស់​គណបក្ស Rastriya Swatantra បាន​ថ្លែង​ថា «​នេះ​ជា​ជ័យជម្នះ​នៃ​ក្តី​សង្ឃឹម និង​ការ​ផ្លាស់​ប្តូរ ហើយ​ក៏​ជា​ការ​គាំទ្រ​ដ៏​ស្រស់​ស្អាត​បំផុត​នៃ​ចលនា Gen Z​។ ការ​គោរព​ពិតប្រាកដ​ចំពោះ​បុគ្គល​នៃ​ក្រុម Gen Z នឹង​ត្រូវ​បាន​បង្ហាញ​តាម​រយៈ​ការងារ​ជាក់ស្តែង ដែល​អនុវត្ត​ជា​រៀងរាល់ថ្ងៃ​ដោយ​រដ្ឋាភិបាល​ដឹកនាំ​ដោយ​លោក Balendra Shah»៕ ប្រភព ៖ BBC, The Guardian និង Al Jazeera