បើ​តាម​ការ​គ្រោងទុក​របស់​សមត្ថ​កិច្ច​ស្ថានភាព​ចរាចរណ៍​នឹង​អាច​កកស្ទះ​តាម​ផ្លូវជាតិ​លេខ​៦


រាជធានី​ភ្នំពេញ ៖ បន្ទាប់​ពី​បញ្ចប់​ពិធី​បុណ្យចូលឆ្នាំ ប្រពៃណី​ជាតិខ្មែរ ប្រជាពលរដ្ឋ​ដែល​បាន​ធ្វើ​ដំណើរ​ទៅ​លេង​ស្រុក​កំណើត និង​ដើរ​លំហែកាយ​បាន​ធ្វើ​ដំណើរ​ត្រឡប់​ចូល​រាជធានី​ភ្នំពេញ​បណ្តើរ​ៗ​ហើយ ដើម្បី​ត្រៀម​ចូល​បំរើ​ការងារ និង​ប្រកប​មុខរបរ​អាជីវកម្ម​វិញ ។

នៅ​ព្រឹក​ថ្ងៃ​ទី ១៧ ខែមេសា ឆ្នាំ​២០១៩ នៅ​តាម​ដងផ្លូវ ក៏​ដូច​ជា​នៅ​តាម​ផ្លូវជាតិ​នានា ដែល​ជា​ច្រកចូល​រាជធានី​ភ្នំពេញ​ដែល​ជា​បេះដូង​នៃ​ព្រះរាជាណាចក្រ​កម្ពុជា គេ​ឃើញ​ប្រជាពលរដ្ឋ​បាន​ធ្វើ​ដំណើរ​ត្រឡប់​មក​ពី​តាម​បណ្តាល​ខេត្ត​ស្រុក​កំណើត​របស់​ខ្លួន​បណ្តើរ​ៗ ហើយ​បាន​ញ៉ាំង​ឱ្យ​រាជធានី​ភ្នំពេញ​ដែល​ស្ងាត់ជ្រងំ​ប៉ុន្មាន​ថ្ងៃនេះ​បាន​វិល​ទៅ​រក​ភាព​អ៊ូអរ និង​អាច​កក់ស្ទះ​ចរាចរ​ឡើង​វិញ​។ ដោយឡែក​នៅ​លើ​ស្ពាន​ជ្រោយចង្វារ ក៏​ដូច​ជា​ស្ពាន ព្រែក​ព្នៅ​ដែល​ប៉ុន្មាន​ថ្ងៃជា​ថ្ងៃ​បុណ្យចូលឆ្នាំ​ប្រពៃណី​ជាតិខ្មែរ គេ​សង្កេត​ឃើញ​មាន​សភាព​ស្ងាត់ ក៏​ដូច​ជា​រាជធានី​ភ្នំពេញ​ទាំងមូល​ដែរ ហើយ ឥឡូវ​បាន​ចាប់ផ្តើម អ៊ូអរ ឡើង​វិញ ខណៈ​ពេល​ដែល​បងប្អូន​ពលរដ្ឋ ក៏​បាន​វិល​ត្រឡប់​មក​ពី​ស្រុក​កំណើត និង​មក​ពី​ដើរ​កម្សាន្ត ។

ទោះបីជា​យ៉ាងណា កម្មករ កម្ម​ការី​នី​ខ្លះ មិន​ទាន់​បាន​វិល​ត្រឡប់​មក​វិញ​នោះ​ទេ ព្រោះ​ខ្លះ​បាន​ធ្វើការ​ជំនួស ថ្ងៃ​សៅ​រិ៍ អាទិត្យ មុន​ឈប់​សម្រាក ដែល​រោងចក្រ​នឹង​ចូល​ធ្វើការ​វិញ​នៅ​ថ្ងៃ​ច័ន្ទ​ទី​២២ ខែមេសា ហើយ​ស្ថានភាព​ចរាចរណ៍​នឹង​អាច​កក់ស្ទះ​នៅ​ថ្ងៃ​សៅ​រិ៍ អាទិត្យ ។ ទន្ទឹម​នោះ អាជ្ញាធរ​រាជធានី​ភ្នំពេញ ក៏​ដូច​ជា​ស្នងការដ្ឋាន នគរបាល​រាជធានី​ភ្នំពេញ បាន​ដាក់​ផែនការ​រួច​ជា​ស្រា​ច​ត្រៀម​ដំបង និង​អាវ ពន្លឺ ដាក់​ពង្រាយ​កម្លាំង​នៅ​តាម​ដងផ្លូវ​ជាតិ​នានា ដែល​ជា​ច្រកចូល​នានា​របស់​រាជធានី​ភ្នំពេញ ដើម្បី​ជួយ​សម្រួល​ចរាចរណ៍​ដល់​ប្រជាពលរដ្ឋ​ដែល​នឹង​វិល​ត្រឡប់​ចូល​មក​រាជធានី​ភ្នំពេញ​វិញ​។

នៅ​រសៀល​ថ្ងៃ​ទី​១៧ ខែមេសា​នេះ​ដែរ អាជ្ញាធរ​ខណ្ឌ​ជ្រោយចង្វារ និង​នគរបាល​ខណ្ឌ ក៏​បាន​ជួប​ប្រមូលផ្តុំ​ដើម្បី​ត្រៀមកម្លាំង​ក្នុង​ការ​ចេញ​រៀបចំ​សណ្តាប់ធ្នាប់ និង​សម្រួល​ចរាចរ​ដល់​បងប្អូន​ប្រជាពលរដ្ឋ​ដែល​បាន​វិល​ត្រឡប់​ចូល​រាជធានី​ភ្នំពេញ​វិញ​។ បើ​តាម​ការ​គ្រោងទុក​របស់​សមត្ថកិច្ច​ស្ថានភាព​ចរាចរណ៍​នឹង​អាច​កកស្ទះ​នៅ​តាម​ផ្លូវជាតិ​លេខ​៦ វេលា​យប់​នេះ ខណៈ​ពេល​ដែល​ពលរដ្ឋ​សម្រុកចូល​មក​រាជធានី​ភ្នំពេញ​។

គួរ​បញ្ជាក់​ថា នៅ​ក្នុង​ឱកាស​បុណ្យចូលឆ្នាំ​ថ្មី​ប្រពៃណី​ជាតិ​ឆ្នាំ កុរ ឯកស័ក ដែល​បាន​ប្រព្រឹត្តិ​ទៅ​រយៈពេល​៣​ថ្ងៃ​គឺ​ថ្ងៃ​ទី​១៤ ,១៥ និង​ទី​១៦ ខែមេសា ឆ្នាំ​២០១៩ ប្រជាពលរដ្ឋ​ដែល​រស់នៅ​ប្រកប​មុខរបរ​ជីវ​កម្ម និង​ធ្វើការ​នៅ​រាជធានី​ភ្នំពេញ​បាន​ឈប់​សម្រាក​ពី​ការងារ និង​បាន​ធ្វើ​ដំណើរ​ទៅ​កម្សាន្ត​នៅ​ស្រុក​កំណើត​លេង​បងប្អូន​ឪពុក​ម្តាយ និងរ​ម្មណី​យ​ដ្ឋា​ន​នានា​ធ្វើ​ឱ្យ​រាជធានី​ភ្នំពេញ​ស្ងាត់ជ្រងំ​។ បន្ទាប់​ពី​ចប់​ពិធីបុណ្យ​ពលរដ្ឋ ក៏​បាន​វិល​ត្រឡប់​ចូល​រាជធានី​បណ្តើរ​នៅ​ថ្ងៃ​បន្ទាប់ ដើម្បី​ត្រៀមខ្លួន​ចូល​បម្រើ​ការងារ និង​ប្រកប​មុខរបរ​រកស៊ី​របស់​ខ្លួន​វិញ​៕

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ