រាជធានីភ្នំពេញ ៖ រយៈពេល៣ថ្ងៃ នៃព្រះរាជពិធីបុណ្យចូលឆ្នាំប្រពៃណីជាតិខ្មែរ ពោលគឺចាប់ពីថ្ងៃទី១៤ ដល់ថ្ងៃទី១៦ គេសង្គេតឃើញថា សំរាមមួយចំនួនធំត្រូវគរជាគំនរនៅតាមដងផ្លូវធំៗក្នុងរាជធានីភ្នំពេញ ជាក់ស្តែងដូចរូបភាពដែលបានបង្ហាញ គឺស្ថិតតាមបណ្តោយផ្លូវលេខ២៧១ ក្នុងខណ្ឌមានជ័យ ព្រំប្រទល់ជាមួយខណ្ឌចំការមន និងផ្លូវផ្សេងៗមួយចំនួនទៀតផងដែរ ។
សំរាមទាំងអស់នោះ គឺគរជាគំនរបែបនេះ ដោយសារមិនមានការចុះទៅប្រមែរប្រមូល ដែលជាកត្តាបង្កផលប៉ះពាល់ដល់បរិស្ថានអនាម័យតាមដងផ្លូវសាធារណៈ ជាពិសេសប៉ះពាល់ដល់ការរស់នៅរបស់ប្រជាពលរដ្ឋនៅក្បែរតំបន់ទាំងនោះ ដែលត្រូវទទួលរងក្លិនមិនល្អពីគំនរសំរាម ព្រោះតែមិនដឹងយកទៅចោលនៅទីណា ខណៈពុំឃើញមានការចុះប្រមូល។
លោកយាយម្នាក់ឈ្មោះ យាយអ៊ុច អាយុ៦១ឆ្នាំ រស់នៅតាមបណ្តោយផ្លូចលេខ២៧១ ក្នុងសង្កាត់ចាក់អង្រែលើ ខណ្ឌមានជ័យ ថ្លែងប្រាប់កោះសន្តិភាពថា ៖ កាលពីយប់ថ្ងៃទី១៤ ពោលគឺថ្ងៃដំបូងនៃព្រះរាជពិធីបុណ្យចូលឆ្នាំប្រពៃណីជាតិខ្មែរ លោកយាយសង្កេតឃើញក្រុមរថយន្តក្រុមហ៊ុនស៊ិនទ្រីទៅប្រមូលយកម្តងរួចមកហើយដែរ តែមកប្រមូលនៅពេលយប់ លុះក្រោយមករហូតមកទល់ព្រឹកថ្ងៃទី១៧នេះ ក៏ពុំដែលឃើញទៅទទួលយកទៀតសោះឡើយ ទើបជាហេតុនាំអោយសំរាមដែលសល់ពីការប្រើប្រាស់របស់ប្រជាជននៅតំបន់នោះ នាំគ្នាយកទុកចោលលើដងផ្លូវគរជាគំនរតែម្តងទៅ ។
លោកយាយបន្តថា ការដែលមិនបានឃើញរថយន្តស៊ិនទ្រី ឬក្រុមអ្នកប្រមូលសំរាម ចុះមកទទួលយកសំរាមបែបនេះ គឺប្រហែលមកពីពួកគេត្រូវចំណាយពេលវេលាទៅលេងស្រុកកំណើត ដើម្បីជួបជុំគ្រួសារសាច់ញាតិរបស់ពួកគេហើយ ក្នុងឱកាសបុណ្យទានបែបនេះ ។
តែយ៉ាងណាមិញ លោកយាយសំណូមពរដល់ក្រុមហ៊ុនស៊ិនទ្រី មេត្តាចុះទៅប្រមែប្រមូលសំរាមអោយអស់ផង ក្រោយពេលពិធីបុណ្យចូលឆ្នាំប្រពៃណីជាតិខ្មែរត្រូវបានបញ្ចប់ ចៀសវាងការចុះប្រមូលមានការយឺតយ៉ាវ ជាហេតុនាំអោយសំរាមសល់ពីការប្រើប្រាស់របស់ពលរដ្ឋ សល់ចេះតែច្រើនៗទៅ រហូតត្រូវគរជាគំនរសំរាមនៅលើដងផ្លូវ ជាហេតុនាំអោយប៉ះពាល់ដល់បរិស្ថានអនាម័យតាមដងផ្លូវសាធារណៈក្នុងរាជធានីភ្នំពេញ ៕
ចែករំលែកព័តមាននេះ