ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ផ្ទះមួយខ្នងដែលផ្ទះម្ចាស់ខំធ្វើការ ខ្ចីលុយគេ ដើម្បីផ្ទះធ្វើរួចរាល់មិនទាន់ទាំងបាននៅផង ស្រាប់តែរន្ទះបាញ់ឆេះផ្ទះខ្ទេចគ្មានសល់ ខណៈម្ចាស់ផ្ទះចាក់សោចោលទៅដេកផ្ទះម្តាយក្មេក បង្កឱ្យមានការភ្ញាក់ផ្អើលកាលពីម៉ោង៧និង៣០នាទីយប់ ថ្ងៃទី១៥ ខែមេសា ឆ្នាំ២០១៩ ស្ថិតក្នុងភូមិស្រណាល ឃុំសំបួរ ស្រុកមង្គលបូរី។
បើតាមលោកមេប៉ុស្តិ៍នគរបាលឃុំសំបួរ បានប្រាប់ថា ម្ចាស់ផ្ទះដែលត្រូវរន្ទៈបាញ់ឆេះផ្ទះអស់ទាំងស្រុងខាងលើមានឈ្មោះ ងិវ ងិក ភេទប្រុស អាយុ៤៩ឆ្នាំ និងមានប្រពន្ធឈ្មោះ កេវ ថងឌី អាយុ៤៥ឆ្នាំ មានកូន៣នាក់ ក្នុងនោះប្រុសម្នាក់ រស់នៅភូមិ-ឃុំខាងលើ។
បើតាមម្ចាស់ផ្ទះបានប្រាប់ថា ផ្ទះ១ខ្នងនេះទើបធ្វើរួច ហើយបានពិធីឡើងផ្ទះរួចរាល់បាន២ថ្ងៃប៉ុណ្ណោះ ស្រាប់តែនៅយប់កើតហេតុនោះគាត់និងក្រុមគ្រួសារបានចាក់សោផ្ទះចោល រួចទៅជួបជុំបងប្អូនផឹកស៊ីមុនពេលដែលគាត់ត្រឡប់ទៅធ្វើការនៅប្រទេសថៃវិញ ហើយដេកនៅផ្ទះម្តាយក្មេកដែលមានចម្ងាយពីផ្ទះរបស់គាត់ប្រមាណ៣០០ម៉ែត្រប៉ុណ្ណោះ។
ស្រាប់តែអ្នកជិតខាងរត់ប្រាប់ថា ផ្ទះគាត់ត្រូវរន្ទះបាញ់កំពុងឆាបឆេះ ខណៈនោះអ្នកជិតខាងបាននាំគ្នាជួយពន្លត់ នៅពេលដែលមេឃកំពុងភ្លៀងខ្លាំង និងខ្យល់បក់បោកខ្លាំង ធ្វើឱ្យរបស់ផ្ទះរបស់ឆេះអស់ទាំងស្រុង ដែលផ្ទះរបស់គាត់ធ្វើពីឈើប្រក់ស័ង្កសី មានបណ្តោយ១០ម៉ែត្រទទឹង៨ម៉ែត្រ និងទ្រព្យសប្បត្តិនៅលើផ្ទះត្រូវឆេះគ្មានសល់ទេ។
ម្ចាស់ផ្ទះដដែលបានយំសម្រក់ទឹកភ្នែកថា «គាត់អស់ហើយ គ្មានសល់អ្វីទៀតទេ ខិតខំធ្វើការងារស្រុកថៃទាំងគ្រួសារសន្សំលុយយកមកធ្វើផ្ទះ ខ្វះខាតមួយចំនួនចងការ និងខ្ចីគេមកធ្វើឱ្យរួចរាល់មិនទាន់បាននៅផង ហើយគិតថានាំប្រពន្ធកូនទៅរកលុយសងបំណុលដែលជំពាក់គេ និងមិនបានរស់នៅកក់ក្តៅផង ស្រាប់តែត្រូវរន្ទះបាញ់ឆាបឆេះអស់គ្មានសល់»។
លោកមេប៉ុស្តិ៍នគរបាលបានបញ្ជាក់ថា នៅពេលដែលរន្ទះបាញ់ឆេះផ្ទះខាងលើនេះ គឺម្ចាស់ចាក់សោចោលទៅដេកផ្ទះម្តាយក្មេកមុនទៅថៃហើយមុនរន្ទៈបាញ់ឆេះផ្ទះ គឺមានភ្លៀងកំពុងធ្លាក់ និងខ្យល់បក់បោកខ្លាំង ស្រាប់តែរន្ទះបាញ់ចូលកណ្តាលផ្ទះ បណ្តាលឆាបឆេះ និងដាច់ចរន្តអគ្គិសនីអ្នកជិត ហើយភ្លើងបានឆេះផ្ទះ និងខូចខាតទ្រព្យសម្បត្តិទាំងស្រុង៕
ចែករំលែកព័តមាននេះ