ខេត្តបន្ទាយមានជ័យ ៖ លំនៅឋានរបស់ប្រជាពលរដ្ឋចំនួន៩០ខ្នង ក្នុងនោះខូចខាតទាំងស្រុងចំនួន៨ខ្នង ដោយសារតែគ្រោះធម្មជាតិខ្យល់កន្ត្រាក់លើចំនួន៣ស្រុក គឺស្រុកភ្នំស្រុក , ស្វាយចេកនិងមង្គលបូរី ខេត្តបន្ទាយមានជ័យ នៅល្ងាចថ្ងៃទី១៥ ខែមេសា ឆ្នាំ២០១៩ ។
បើយោងតាមរបាយការណ៍របស់ស្នងការដ្ឋាននគរបាលខេត្តបន្ទាយមានជ័យ បានឲ្យដឹងថា ស្រុកដែលរងនូវផលប៉ះពាល់ដោយខ្យល់កន្ត្រាក់ខ្លាំងជាងគេនៅល្ងាចថ្ងៃទី១៥ មសានេះ គឺស្រុកភ្នំស្រុក ខូចខាតចំនួន៧៦ខ្នង ក្នុងនោះរលំដួលផ្ទះខូចខាតទាំងស្រុងចំនួន៥ខ្នង, សាលារៀន៣ខ្នង, សាលាឆទាន២ខ្នង។ ស្រុកស្វាយចេកចំនួន១២ខ្នង ក្នុងនោះខូចខាតទាំងស្រុងចំនួន៣ខ្នង រប៉ើកដំបូល៩ និងស្រុកមង្គលបូរី ចំនួន២ខ្នង របើកដំបូល ។
បើតាមការឲ្យដឹងពីអធិការនគរបាលស្រុកភ្នំស្រុក លោកវរសេនីយ៍ឯក យ៉ត សុផល បានបញ្ជាក់ឲ្យដឹងថា នៅថ្ងៃថ្ងៃទី១៥ មេសា នៅស្រុកភ្នំស្រុក ក្នុងឃុំពន្លៃ ផ្ទៃមេឃមានភ្លៀងកក់ខែលាយឡំជាមួយនឹងផ្គររន្ទះ ខ្យល់កន្ត្រាក់បានបង្កឲ្យលំនៅឋានរបស់ប្រជាពលរដ្ឋនៅក្នុងឃុំពន្លៃ ចំនួន៥ភូមិ គឺភូមិស្វាយខ្មៅ, ភូមិឈូកអាង, ភូមិតាវង និងភូមិពន្លៃ សរុបចំនួន៧៦ខ្នង ខូចទាំងស្រុងចំនួន៥ខ្នង សាលារៀន៣ខ្នង សាលាឆទាន២ខ្នង និងរបួសមនុស្សម្នាក់ ។
ជាមួយគ្នានោះដែរ លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក ក៏បានឲ្យដឹងដែរថា នៅថ្ងៃទី១៥ មេសា នៅស្រុកស្វាយចេក មានភ្លៀងធ្លាក់យ៉ាងខ្លាំងផងដែរដោយលាយឡំជាមួយនឹងខ្យល់កន្ត្រាក់ ផ្គរ រន្ទះ បង្កឲ្យលំនៅឋាននៅឃុំផ្គាំ លើ៣ភូមិ គឺភូមិប្រាសាទវៀន ,ថ្មគោល,ស្វាយសនិងភូមិតាដួល សរុបចំនួន១២ខ្នង រប៉ើកដំបូល តែករណីនេះមិនបង្កឲ្យគ្រោះថ្នាក់ ដល់មនុស្សឡើយ។
ចំណែកឯកស្រុកមង្គលបូរី ក៏មានខ្យល់កន្ត្រាក់បង្កឲ្យខូចខាតផ្ទះរបស់ប្រជាពលរដ្ឋ នៅភូមិគោកក្តួច ឃុំបន្ទាយនាងចំនួន២គ្រួសារ រប៉ើកដំបូល នេះបើតាមការឲ្យដឹងពីលោកវរសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបូរី ៕
ចែករំលែកព័តមាននេះ