ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ចិនម្នាក់របួសដៃ ឯខ្មែរវិញមានទាំងសន្លប់ មានទាំងរបួស ក្នុងជម្លោះមួយមិនទាន់ដឹងមូលហេតុច្បាស់លាស់ បង្កឱ្យមានការភ្ញាក់ផ្អើលកាលពីយប់ថ្ងៃទី14 មេសា 2019 ចំណុចផ្លូវដើមពុទ្រា ស្ថិតក្នុងភូមិក្បាលស្ពាន01សង្កាត់និងក្រុងប៉ោយប៉ែត។
សេចក្តីរាយការណ៍បន្តថា គេមិនទាន់ដឹងពីមូលហេតុពិតប្រាកដនៃជម្លោះនេះនៅឡើយទេ ប៉ុន្តែអ្នកស្រុកនិយាយថា ដំបូងមានរថយន្តស៊េរីទំនើបមួយគ្រឿង ពាក់ស្លាកលេខ8888 ហើយក្នុងរថយន្តនោះមានខ្មែរ មានចិន ហើយអ្នកបើកបរជាខ្មែរបានបើកឆ្លងកាត់កន្លែងកើតហេតុ។ ភ្លាមនោះមានការលេងសាចទឹក ប៉ាតម្សៅរថយន្ត តែមិនដឹងថា បញ្ហាកើតឡើងដោយសារអ្វីនោះទេ ស្រាប់តែឃើញមានជម្លោះផ្ទុះឡើងរហូតវាយតប់គ្នាដូចរឿងកុនអីចឹង។
ក្រោយកើតហេតុ ខ្មែរមួយក្រុមត្រូវនគរបាលក្រុងប៉ោយប៉ែតហៅទៅសួរនាំ ឯអ្នករបួសម្នាក់ដែលបន្តោងសេរ៉ូមក្នុងគ្លីនិកឯកជនក៌មិនលើកលែងដែរ ត្រូវសមត្ថកិច្ចនាំយកទៅអធិការដ្ឋាននគរបាលក្រុងប៉ោយប៉ែតទាំងដើរមិនទាន់បានផង ព្រោះស្រវឹងខ្លាំង និងរបួសផ្ទៃមុខ ដើម្បីសាកសួរដូចគ្នាដែលអំពីរឿងនេះ ដែលគេសង្ស័យថាជារឿងមិនធម្មតា ព្រោះមិនឃើញមានជនជាតិចិនត្រូវគេហៅទៅសាកសួរម្នាក់ឡើយ។
ហើយបុរសម្នាក់ដែលគេសង្ស័យជាសន្តិសុខបាននិយាយនៅក្នុងអធិការដ្ឋានប៉ោយប៉ែតទាំងយប់ថា ខ្លួនជាអ្នកបើកបររថយន្តស្លាកលេខ8888នោះ ហើយចោទប្រកាន់ភាគីម្ខាងថា បានទៅវាយរថយន្តដែលខ្លួនបើក ហើយចោមរោមវាយមនុស្សដែលរួមដំណើរជាខ្មែរម្នាក់ថែមទៀត។ បុរសដដែលអះអាងថា ខ្លួនមានអាវុធខ្លី និងជាសមត្ថកិច្ចផងដែរ តែខ្លួនមិនបានបំផ្ទុះអាវុធទេ ហើយប្រាប់ថា ជនជាតិចិនម្នាក់ត្រូវភាគីម្ខាងកាប់របួសដៃកំពុងសម្រាកព្យាបាលនៅគ្លិនិកឯកជន ព្រមទាំងចុចទូរស័ព្ទបើករូបឲ្យមើលទៀតផង។
ពាក់ព័ន្ធករណីនេះ សមត្ថកិច្ចអះអាងថា បំផ្ទុះអាវុធឡើងលើផងដែរ ទើបជម្លោះស្ងប់ស្ងាត់ទៅវិញ។ យ៉ាងណាក៌ដោយ នៅក្នុងអធិការដ្ឋាននគរបាលក្រុងប៉ោយប៉ែតនោះ ភាគីម្ខាងដែលសុទ្ធតែជាខ្មែរខ្លះបានបដិសេធថា មិនពាក់ព័ន្ធរឿងរ៉ាវខាងលើឡើយ ហើយថារឿងនេះអ្នកលេងសាចទឹកមានច្រើនកុះករ។
លោកអធិការរងទទួលផែនព្រហ្មទណ្ឌនៃអធិការដ្ឋាននគរបាលក្រុងប៉ោយប៉ែត បានប្រាប់តាមទូរស័ព្ទព្រឹកថ្ងៃ15 មេសានេះថា លោកមិនទាន់ក្តាប់បានសាច់រឿងខាងលើទាំងស្រុងនៅឡើយទេ ព្រោះយប់កើតហេតុជាវេណចាំបញ្ជារបស់អ្នកផ្សេង ប៉ុន្តែលោកថា ពេលនេះសមត្ថកិច្ចកំពុងសាកសួរមនុស្សមួយចំនួន។ គេចាំមើលថា តើបញ្ហានេះខ្មែរ ឬចិន ដែលទទួលបានយុត្តិធម៌ បើទាំងសងខាងរងរបួសដូចគ្នា៕
ចែករំលែកព័តមាននេះ