ខេត្តបាត់ដំបង ៖ បើតាមមន្ត្រីផ្នែកអនុវត្តដីកាបានឲ្យដឹងថា ចៅក្រមស៊ើបសួរនៃសាលាដំបូងខេត្ត កំពុងសួរនាំជនសង្ស័យម្នាក់នៅរសៀលថ្ងៃទី១៤ មេសា ២០១៩នេះ ដែលជាប់ពាក់ព័ន្ធនឹងករណីរំលោភសេពសន្ថវ:ទៅលើនារីម្នាក់កាលពីឆ្នាំ២០១៣ ហើយបានរត់គេចខ្លួនអស់រយៈពេល៦ឆ្នាំ ក្រោយប្រព្រឹត្តបទល្មើស។
មន្ត្រីដដែលបានប្រាប់ថា ជនសង្ស័យឈ្មោះ សុខ ពៅ ហៅប្រុត អាយុ២៥ឆ្នាំ រស់នៅភូមិបាសាក់ ឃុំបាសាក់ ស្រុករុក្ខគិរី។ ជននេះត្រូវឃាត់ខ្លួនតាមដីកាបង្គាប់ឲ្យនាំខ្លួនលេខ៣១២ត/ព្រ ចុះថ្ងៃទី០៣ មីនា ២០១៥ របស់ចៅក្រមស៊ើបសួរលោកទ្រី សុភ័ត នៃសាលាដំបូងខេត្តបាត់ដំបង ដែលតំណាងអយ្យការបានចោទប្រកាន់ពីបទ «រំលោភសេពសន្ថវៈ» ដែលប្រព្រឹត្តនៅភូមិបាសាក់ ឃុំបាសាក់ ស្រុករុក្ខគិរី កាលពីថ្ងៃទី២១វិច្ឆិកា ឆ្នាំ២០១៣ កន្លងទៅ។
មន្ត្រីផ្នែកអនុវត្តដីកាដដែលបានឲ្យដឹងទៀតថា ក្រោយពីប្រព្រឹត្តបទល្មើស ជននេះបានរត់គេចខ្លួនទៅធ្វើកម្មករនៅប្រទេសថៃ បាត់ដំណឹងឈឹងរហូតមក ប៉ុន្តែទំនងជននេះគិតថា សំណុំរឿងរបស់ខ្លួនត្រូវបានតុលាការ ឬសមត្ថកិច្ចបំភ្លេចចោលហើយ ទើបក្នុងឱកាសបុណ្យចូលឆ្នាំថ្មី ប្រពៃណីខ្មែរក្នុងឆ្នាំនេះ ជននេះលបចូលមកលេងស្រុក និងបានបង្ហាញមុខនៅនឹងផ្ទះរបស់ខ្លួន ក៏ត្រូវបានកម្លាំងជំនាញអធិការនគរបាលស្រុករុក្ខគិរីធ្វើការឃាត់ខ្លួនតែម្តង។
បើតាមមន្ត្រីខាងលើបានបញ្ជាក់ថា ជនសង្ស័យពេលត្រូវបានបញ្ជូនទៅសាលាដំបូងខេត្ត ដើម្បីប្រគល់ឲ្យលោកចៅក្រមស៊ើបសួរចាត់ការតាមនីតិវិធីហើយ៕
ចែករំលែកព័តមាននេះ