ទឹកលិចតូបផ្សារល្វាហើយនៅអូសបន្លាយដល់ណា យូរហើយនៅដោះស្រាយមិនចេញទៀត
- បាត់ដំបង
ខេត្តបាត់ដំបង ៖ អាជីវករ១០៨តូប លក់ដូរនៅផ្សារល្វា ស្រុកបវេល ខេត្តបាត់ដំបងភាគច្រើនលក់បន្លែ ត្រីសាច់ ខោអាវជជុះ និងលក់បបរ គុយទាវ…
ខេត្តបាត់ដំបង ៖ អាជីវករ១០៨តូប លក់ដូរនៅផ្សារល្វា ស្រុកបវេល ខេត្តបាត់ដំបងភាគច្រើនលក់បន្លែ ត្រីសាច់ ខោអាវជជុះ និងលក់បបរ គុយទាវ កាហ្វេ ដែលធ្លាប់បានធ្វើបាតុកម្មឡើងមកសាលាខេត្តបាត់ដំបងចំនួន២លើក កាលពីចុងខែវិច្ឆិកា និងក្នុងខែធ្នូ ឆ្នាំ២០១៨ កន្លងមកនេះសុំឲ្យអាជ្ញាធរខេត្តជួយសម្រួលបញ្ឈប់ ក្នុងការដេញរុះរើតូបកំពុងលក់សព្វថ្ងៃ ដើម្បីផ្តល់ឲ្យក្រុមហ៊ុនមួយធ្វើការចាក់លុបដី និងពង្រីកធ្វើតូបថ្មីចំនួន២០៨តូប សម្រាប់លក់ឲ្យអាជីវករសារថ្មី ក្រោមគម្រោងការរៀបចំសណ្តាប់ធ្នាប់ និងអភិវឌ្ឍន៍ផ្សារក្នុងឃុំល្វា ឲ្យមានសោភ័ណភាពបន្ថែមទៀត ។
លោកអភិបាលខេត្តបាត់ដំបងបានចេញបញ្ជាបេសកកម្មដល់ក្រុមជំនាញការងារមួយក្រុមដែលមានលោកតេង គឹមស៊ាន នាយកស្តីទីចាត់ការអន្តរវិស័យសាលាខេត្តបាត់ដំបង ដឹកនាំក្រុមការងារជំនាញសំណង់ដែនដីនគរូបនីយកម្មសុរិយោដី សេដ្ឋកិច្ច តំណាងវិនិយោគខេត្តអភិវឌ្ឍន៍សំណង់សាលាខេត្ត ចុះជួបដោះស្រាយសម្របសម្រួលដល់បងប្អូនអាជីវករលក់ដូរនៅក្នុងផ្សារល្វា ដែលស្ថិតនៅឃុំល្វា ស្រុបវេល ខេត្តបាត់ដំបង នៅថ្ងៃទី១៥ ខែកុម្ភៈ ឆ្នាំ២០១៩ ហើយបានអូសបន្លាយពេលវេលារហូតមកថ្ងៃនេះ (ថ្ងៃទី១៣ ខែមេសា ឆ្នាំ២០១៩) ស្របពេលមុនចូលឆ្នាំខ្មែរមេឃបានភ្លៀងធ្លាក់មួយមេមកធ្វើឲ្យទឹកជំនន់បានជន់លិចតូបអាជីវករកំពុងរកស៊ីលក់ដូររៀងរាល់ថ្ងៃកាន់តែជួបការលំបាកឡើងបន្ថែមទៀត ។
តំណាងអាជីវករកំពុងលក់ដូរបានបញ្ជាក់ថា នេះជាការឃុបឃិតគ្នារវាងក្រុមហ៊ុន និងមូលដ្ឋានឃុំបានត្រូវរូវគ្នា លើកគំរោងរកផលចំណេញក្រោមការយកលេសថា រៀបចំកែប្រែសោភ័ណភាព ក្នុងការអភិវឌ្ឍ ហើយមិនបានសុំគម្រោងទៅដល់ថ្នាក់ខេត្តបានដឹងឮឡើយ ដោយកន្លងមកការតម្រូវចុះជួបបងប្អូនប្រជាពលរដ្ឋបានប្រាប់ទៅអាជីវករលក់ដូរត្រូវតែទិញតូបថ្មី ដែលមានទំហ៊ំ២ម៉ែត្របួនជ្រុងតម្លៃ១៨០០ដុល្លារ និងទំហ៊ំ២ម៉ែត្រកន្លះ តម្លៃ២៥០០ ទៅ២៨០០ដុល្លារ ដែលមានអ្នកលក់ដូរខ្លះគ្មានលទ្ធភាព គ្មានលុយទិញតូបសម្រាប់លក់ដូរបាន ហើយមិនពេញចិត្តចំពោះការបង្ខិតបង្ខំនេះឡើយ ។
បន្តមកអាជីវករមិនយល់ព្រមឲ្យក្រុមហ៊ុននេះសាង់សង់ រួចលក់តូបឲ្យពួកគាត់ទៅវិញ ព្រោះជាដីរបស់រដ្ឋ ហើយពួកគាត់បានលក់ដូរនៅទីនេះរាប់សិបឆ្នាំមកហើយ នៅតំបន់ជនបទនេះដែលលក់ពេលព្រឹកមានរយៈពេលពី១ម៉ោងកន្លះទៅ៣ម៉ោងតែប៉ុណ្ណោះ ហើយវាហួសពីសមត្ថភាព លទ្ធភាពអ្នកផ្សារលក់ដូរ បន្លែ ត្រីសាច់ គ្រឿងហូបចុក ដែលអ្នកខ្លះគ្មានលុយដល់១ពាន់ដុល្លារធ្វើដើមទុនរកស៊ីផង តែត្រូវមកជួបបញ្ហាទិញតូបតម្លៃ២ទៅ៣ពាន់ដុល្លារទៀត ដែលគាត់រកសម្រាប់តែរស់មួយថ្ងៃៗនោះ ហើយសុំឲ្យមានការអភិវឌ្ឍទៅកន្លែងផ្សេងទៀតចុះ ទុកកន្លែងនេះឲ្យពួកគាត់លក់ដូរធម្មតាសម្រាប់រស់ពីមួយថ្ងៃទៅមួយថ្ងៃដូចពីមុន ។ ដូច្នោះបន្ទុកលំបាកកាន់តែធ្ងន់ទៅៗ ហើយមានតែពេលនេះសុំគណៈកម្មការក្រុមកាងារមេត្តាទទួកយករឿងនេះទៅសម្របសម្រួលបញ្ឈប់ការសាងសង់ផ្សារនេះចុះ ។
ក្រោយរយៈពេលចុះដោះស្រាយ២ខែ នៅថ្ងៃទី៨ ដល់ថ្ងៃទី១០ ខែមេសា ឆ្នាំ២០១៩ កន្លងមកនេះសាលាខេត្តបាត់ដំបងបានជំរុញក្រុមការងារសាលាខេត្តចុះប្រមូលទិន្នន័យ និងការកំណត់អត្តសញ្ញាណអាជីវករលក់ដូរនៅក្នុងផ្សារល្វា ដើម្បីសម្រេចតាមតម្រូវការ តែមិនទាន់បានដឹងលទ្ធផលនៅឡើយទើបនៅក្នុងថ្ងៃទី១២ មេសា ម្សិលមិញនេះភ្លៀងបានធ្លាក់លិចតូបរបស់ពួកគាត់ព្រោះ តែគ្មានដំណោះស្រាយ និងប្រព័ន្ធលូបង្ហូររំដោះទឹកចេញឲ្យបានសមស្របឡើយ ៕
ចែករំលែកព័តមាននេះ