រាជធានីភ្នំពេញ ៖ ក្រសួងបរិស្ថានបានណែនាំឲ្យអាជ្ញាធរមូលដ្ឋាន និងប្រជាពលរដ្ឋគ្រប់គ្រងសំរាមនៅតំបន់ទេសចរណ៍ឲ្យបានត្រឹមត្រូវ ដើម្បីរក្សាសោភ័ណភាពអនាម័យបរិស្ថានល្អស្អាត ប្រកបដោយផាសុខភាពដល់ភ្ញៀវទេសចរណ៍ដែលទៅកម្សាន្ត ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានលើកទឹកចិត្តក៏ដូចជា ស្នើឲ្យគ្រប់ភាគីទាំងអស់រួមមានប្រជាពលរដ្ឋ និងអាជ្ញាធរមូលដ្ឋានគ្រប់ជាន់ថ្នាក់ រួមទាំងម្ចាស់អាជីវកម្ម អាជីវករ នៅតាមផ្សារនានា សេវាកម្ម ភោជនីយដ្ឋាន ទីផ្សារ និងកន្លែងកម្សាន្តនានាយកចិត្តទុកដាក់ក្នុងការគ្រប់គ្រងសំណល់សំរាម ដែលខ្លួនបង្កើតឡើងឲ្យបានត្រឹមត្រូវក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដើម្បីលើកកម្ពស់សោភ័ណភាព សណ្តាប់ធ្នាប់ និងអនាម័យបរិស្ថានសាធារណ ។
ថ្លែងប្រាប់នៅថ្ងៃទី១២ ខែមេសានេះលោកនេត្រ ភក្ត្រា បានបញ្ជាក់ថា ក្នុងឱកាសពិធីបុណ្យធំៗ បរិមាណផលិត និងការបញ្ចេញសំរាមតែងតែកើនឡើងទ្វេដងជាថ្ងៃធម្មតាដែលទាមទារនូវការវេចខ្ចប់និងទុកដាក់ឲ្យត្រឹមត្រូវជៀសវាងបោះចោលអនាធិបតេយ្យ នៅតាមទីសាធារណៈ និងតាមបណ្តោយផ្លូវនានាដែលធ្វើឲ្យបាត់បង់សោភ័ណភាពអនាម័យទីក្រុង និងទីប្រជុំជន និងផលវិបាកផ្សេងទៀត ។
យ៉ាងណាក៏ដោយលោកកត់សម្គាល់ថា បច្ចុប្បន្នការគ្រប់គ្រងសំរាមសំណល់រឹងនៅទីប្រជុំជន នៅទូទាំងប្រទេសមានភាពល្អប្រសើរជាងមុន បើទោះបីជាមិនទាន់បានឆ្លើយតបទៅនឹងស្ថានភាពជាក់ស្តែងនៃបរិមាណសំណល់ដែលបានបង្កើតឡើង និងមានកំណើនជារៀងរាល់ថ្ងៃ ជាពិសេសការប្រមូលដឹកជញ្ជូន និងការទុកដាក់ចុងក្រោយ ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញបានឲ្យដឹងថា ក្នុងឱកាសថ្ងៃបុណ្យចូលឆ្នាំថ្មីប្រពៃណីជាតិខ្មែរ ឆ្នាំកុរ ខាងមុខនេះកម្មករ-កម្មការិនីរបស់ក្រុមហ៊ុនស៊ីនទ្រី ត្រូវបានឈប់សម្រាក និងធ្វើដំណើរទៅកាន់ស្រុកកំណើតជួបជុំក្រុមគ្រួសារដែលធ្វើឲ្យការផ្តល់សេវាសម្អាតប្រមូល និងដឹកជញ្ជូនសំរាមក្នុងរាជធានីភ្នំពេញ នឹងត្រូវបានអនុវត្តមិនបានពេញលេញទេ ចាប់ពីថ្ងៃទី១៤ ដល់ថ្ងៃទី១៧ ខែមេសា ។
រដ្ឋបាលរាជធានីភ្នំពេញក៏បានអំពាវនាវដល់ប្រជាពលរដ្ឋជាម្ចាស់លំនៅឋានទាំងអស់យោគយល់ និងអធ្យាស្រ័យដោយកុំបញ្ចេញសំរាមមកដាក់នៅតាមដងផ្លូវសាធារណនៅក្នុងអំឡុងពេលដែលការផ្តល់សេវាមិនបានពេញលេញនេះ ដោយរក្សាការទុកដាក់សំរាមរបស់ខ្លួនឲ្យបានត្រឹមត្រូវ នៅក្នុងទីតាំងរៀងៗខ្លួនជាបណ្តោះអាសន្នសិន ដើម្បីចូលរួមចំណែកថែរក្សាអនាម័យបរិស្ថាន រាជធានីភ្នំពេញឲ្យបានល្អប្រសើរ ។
ក្រសួងបរិស្ថានបានធ្វើប្រតិភូកម្មអំណាចទៅឲ្យរដ្ឋបាលថ្នាក់ក្រោមជាតិ តាមរយៈការផ្តល់មូលនិធិសេវាអនាម័យបរិស្ថាន ដើម្បីទទួលភារកិច្ច និងទទួលខុសត្រូវលើការងារគ្រប់គ្រងសំរាមសំណល់រឹង សំណល់រាវ និងបញ្ហាបំពុលបរិស្ថានផ្សេងនៅតាមខេត្តក្រុង និងទីប្រជុំជននានា ៕
ចែករំលែកព័តមាននេះ