ខេត្តបាត់ដំបង ៖ សមត្ថកិច្ចបានរាយការណណ៍ថា ស្ត្រីម្នាក់ត្រូវកម្លាំងសមត្ថកិច្ចឃាត់ខ្លួន ក្រោយពីប្រើប្រាស់កូនកាំបិតចាក់សម្លាប់ប្ដីនៅក្នុងជម្លោះប្រតាយប្រតាបគ្នាដ៏កំរោលមួយរវាងប្ដីប្រពន្ធនេះ កាលពីវេលាម៉ោង៧និង៣០នាទីយប់ថ្ងៃទី១១ មេសា នៅនឹងផ្ទះរបស់ខ្លួន ដែលស្ថិតនៅភូមិសាមសិប ឃុំតាក្រី ស្រុកកំរៀង ។
លោកឧត្តមសេនីយត្រី ជេត វណ្ណនី ស្នងការរងខេត្តបានឲ្យដឹងថា ស្ត្រីដែលចាក់សម្លាប់ប្ដីរបស់ខ្លួននោះឈ្មោះថេត ធី អាយុ២០ឆ្នាំ រីឯបុរសជាប្ដីដែលស្លាប់ឈ្មោះទី ផលឡាត់ អាយុ២៧ឆ្នាំ ប្ដីប្រពន្ធរស់នៅក្នុងភូមិ ឃុំកើតហេតុខាងលើ ។ លោកស្នងការរងបានប្រាប់ថា អំពើហិង្សារវាងប្ដីប្រពន្ធដែលឈានដល់ការចាក់សម្លាប់គ្នានេះ គឺផ្ដើមចេញពីការប្រតាយប្រតាប់គ្នា ខណៈបុរសជាប្ដី ស្ថិតក្នុងស្ថានភាពស្រវឹងជោកជាំ ។ ពេលដែលប្រតាយប្រតាប់គ្នានោះ គឺប្រពន្ធមានកាន់កូនកាំបិតនៅក្នុងដៃ ទើបបណ្ដាលឲ្យចាក់ត្រូវប្ដីចំដើមដោះខាងឆ្វេងមុតកប់តែម្ដង។
លោកជេត វណ្ណនី បានបញ្ជាក់ថា បើតាមពិនិត្យទំនងប្រពន្ធគ្មានចេតនាចាក់សម្លាប់ប្ដីរបស់ខ្លួនទេ តែជាការជង់មុតដោយចៃដន្យពេលកំពុងប្រតាយប្រតាប់គ្នា ។ បើតាមប្រភពព័ត៌មាននៅកន្លែងកើតហេតុថា គេមិនបានឲ្យជាក់លាក់អំពីមូលហេតុនៃអំពើហិង្សាដ៏ធ្ងន់ធ្ងរនេះទេ តែគេគ្រាន់តែដឹងថា ពេលនោះបុរសជាប្ដីហាក់ដូចជា ស្រវឹងទោទន់ទៅហើយ ។ ប្រភពបានឲ្យដឹងទៀតថា ពេលប្រតាយប្រតាប់គ្នា គេឃើញស្ត្រីជាប្រពន្ធមានកាន់កូនកាំបិតចុងស្រូច ហើយពេលនោះស្រាប់តែជង់មុតចំដើមទ្រូងប្ដី រងរបួសយ៉ាងធ្ងន់ធ្ងរដេកដួលបង្កឲ្យមានការភ្ញាក់ផ្អើលតែម្ដង ។ ប៉ុន្តែជនរងគ្រោះមិនទាន់ស្លាប់ទេ លុះអ្នកភូមិ និងក្រុមគ្រួសារជួយបញ្ជូនទៅដល់មន្ទីរពេទ្យជនរងគ្រោះក៏ដាច់ខ្យល់ស្លាប់តែម្ដង ។
លោកជេត វណ្ណនី ស្នងការរងខេត្តបានបញ្ជាក់ថា បើតាមការស្រាវជ្រាវជំហ៊ានដំបូងរបស់សមត្ថកិច្ច ករណីខាងលើអាចជាអំពើមនុស្សឃាតដោយអចេតនា ។ ក្រោយកើតហេតុសមត្ថកិច្ចមូលដ្ឋានបានឃាត់ខ្លួនស្ត្រីជាប្រពន្ធភ្លាមៗដែរ ។ ពេលនេះមន្ត្រីជំនាញកំពុងសួរនាំជនសង្ស័យ ដើម្បីកសាងសំណរឿងបញ្ជូនទៅសាលាដំបូងខេត្តហើយ ៕
ចែករំលែកព័តមាននេះ