ខេត្តកំពង់ឆ្នាំង ៖ សាធារណមតិមួយចំនួនបានលើកឡើងថា ផ្ទះបណ្តែតទឹកនៅចំណុចចុងកោះ ក្នុងខេត្តកំពង់ឆ្នាំង នៅតែមានរាប់រយខ្នងលើផ្ទៃទឹកពេញខាប់ដដែល ធ្វើឲ្យមានការរិះគន់ដល់អាជ្ញាធរថា វិធានការបំលាស់ទីផ្ទះបណ្តែតទឹកកន្លងមក មិនមានប្រសិទ្ធភាព ។
ប្រការដែលគេហ៊ាននិយាយបែបនេះដោយសារតាមការពិនិត្យស្ថានភាពនៅចំណុចចុងកោះ ស្ថិតក្នុងភូមិទី៦ សង្កាត់ខ្សាម ក្រុងកំពង់ឆ្នាំង មានផ្ទះទឹករាប់រយខ្នងកំពុងបន្តរស់នៅនិងបន្ទោបង់ចូលផ្ទៃទឹកនៅឡើយ ។ ទោះជាយ៉ាងនេះក្តី អាជ្ញាធរខេត្តបានបញ្ជាក់ថា នៅសល់តែបែត្រីទេ និងគ្មានការរស់នៅលើផ្ទះបណ្តែតទឹកទាំងនោះឡើយ ។
មានការលើកឡើងទៀតថា ផ្ទះបណ្តែតទឹក រាប់រយខ្នងដែលកំពុងបន្តរស់នៅយ៉ាងអនាធិបតេយ្យពេញ
ផ្ទៃទឹកទន្លេនៅចំណុចចុងកោះ មិនមែនសុទ្ធតែបែត្រីនោះទេ តែជាផ្ទះស្នាក់នៅផង ដែរ ដែលបង្ហាញថា
បំលាស់ទីផ្ទះបណ្ដែតទឹកមិនទាន់ឈានដល់ការលុបបំបាត់បានទាំងស្រុងនៅឡើយទេ ។ ដូចរូបថតដែលឃើញនេះគឺសុទ្ធសឹងតែផ្ទះទឹកដែលថតបានកាលពីថ្ងៃអាទិត្យទី៧ ខែមេសាកន្លងទៅ ពិតជាមានច្រើនស្អេកស្កះពិតមែន ប៉ុន្តែមួយចំនួនទៀតក៏ឃើញមានឡើងមកនៅលើគោកខ្លះហើយដែរ ។
ជុំវិញបញ្ហានេះ លោក ស៊ុន សុវណ្ណរិទ្ធ អភិបាលរងខេត្ត មានប្រសាសន៍ថា មិនមានផ្ទះបណ្តែតទឹកនៅក្នុងទឹកនោះទេ ឯផ្ទះដែលយើងឃើញនោះសុទ្ធសឹងជាបែចញ្ជឹមត្រីទាំងអស់ ។ នេះបើតាមការបញ្ជាក់របស់ក្រុមសមត្ថកិច្ច ដែលមានតួនាទីស្រាវជ្រាវនិងពិនិត្យស្ថានភាពផ្ទះទឹកនៅតំបន់នោះ ។ លោកអភិបាលរងខេត្តបញ្ជាក់ថា បែត្រីនៅភូមិចុងកោះដែលយើងឃើញនោះមានជាង៤៨០ ហើយមិនមែនជាផ្ទះបណ្ដែតទឹកទេ ។
ជាគោលការណ៍របស់អាជ្ញាធរខេត្តដែលបានប្រជុំឯកភាពគ្នា គឺក្រោយបុណ្យចូលឆ្នាំថ្មីខាងមុខនេះនឹងតម្រូវឲ្យពួកគាត់រុះជញ្ជាំងចេញទាំងអស់ រួមទាំងបង្គន់អនាម័យក៏ត្រូវរើចេញដែរ ។ ជាមួយគ្នានេះអាជ្ញាធរខេត្តបានកំណត់ក្រោយចូលឆ្នាំថ្មីរយៈពេលពី២ទៅ៣ខែ ត្រូវតែរុះរើចេញឲ្យអស់ បើមិនដូច្នោះទេនឹងមានវិធានការជាមិនខាន ។
សូមបញ្ជាក់ថា កន្លងទៅអាជ្ញាធរខេត្តបានរៀបចំបំលាស់ទីផ្ទះបណ្តែតទឹកទាំងអស់ទូទាំងខេត្តឲ្យឡើងលើគោក ក្នុងគោលបំណងសម្អាតបរិស្ថានក្នុងទឹក ដើម្បីសោភ័ណភាពនិងដើម្បីសម្រួលចរាចរណ៍ផ្លូវទឹកផងដែរ ។ ស្រុកដែលមានអ្នករស់នៅលើផ្ទះបណ្តែតទឹកមាន ស្រុកកំពង់ត្រឡាច ស្រុកជលគិរី ស្រុកកំពង់លែង ក្រុងកំពង់ឆ្នាំង និងស្រុកបរិបូណ៌ ។ ក្រោយការរៀបចំ ឃើញផ្ទះទឹកមួយចំនួនធំបានឡើងគោកហើយ នៅសល់មួយចំនួនទៀតបានលេសមានបែត្រីពីក្រោម ក៏បន្តរស់នៅមកដល់ពេលនេះ ៕
ចែករំលែកព័តមាននេះ