រាជធានី​ភ្នំពេញ ៖ ក្រសួងសុខាភិបាល​នៃ​ព្រះរាជាណាចក្រ​កម្ពុជា​ថ្មី​ៗ​នេះ​បាន​ចេញ​សេចក្តីជូនដំណឹង​មួយ ហាមឃាត់​គណនី​ហ្វេ​ស​ប៊ុ​ក​ចំនួន​ពីរ ដែល​មានឈ្មោះ Na Na OnlineShop និង NaNa Brand Nrn បញ្ឈប់​ការ​ផ្សព្វផ្សាយ​លក់​ផលិតផល​គ្រឿងសម្អាង​ជា​បន្ទាន់ ព្រោះ​គណនី​ខាងលើ​កំពុង​ផ្សព្វផ្សាយ​លក់​នូវ​ផលិតផល​គ្រឿងសម្អាង​ដែល​គ្មាន​ច្បាប់​អនុញ្ញាតិ​ពី​ក្រសួងសុខាភិបាល​ឡើយ ។

«​ក្រសួងសុខាភិបាល​នឹង​មាន​វិធានការ​តឹងរ៉ឹង​ទៅ​តាម​ផ្លូវច្បាប់​ចំពោះ​ម្ចាស់​គណនី​ឈ្មោះ Na Na OnlineShop និង NaNa Brand Nrn ដែល​នាំ​ចូល លក់ ចែកចាយ និង​ផ្សព្វផ្សាយ​ផលិតផល​គ្រឿង​សម្អាង​ខាងលើ​នេះ ទៅ​តាម​ច្បាប់​ស្តី​ពី​វិសោធនកម្ម​ច្បាប់​ស្តី​ពី​ការ​គ្រប់គ្រង​ឱសថ​ជា​ធរមាន​» ។ នេះ​បើ​យោង​តាម​សេចក្តីជូនដំណឹង​របស់​ក្រសួងសុខាភិបាល​ចុះ​ថ្ងៃ​ទី ១០ ខែមេសា ឆ្នាំ ២០១៩ ។

សូម​បញ្ជាក់​ថា ការ​ព្រមាន​របស់​ក្រសួងសុខាភិបាល​ធ្វើ​ឡើង​បន្ទាប់​ពី​ស្ថាប័ន​ជំនាញ​បាន​តាមដាន និង​ការ​ពិនិត្យ​លើ​បណ្តាញ​សង្គម​ហ្វេ​ស​ប៊ុ​ក រៀងរាល់ថ្ងៃ​នេះ​ថា​មាន​គណនី​ចំនួន​ពីរ​គឺ​៖ ១)- Na Na OnlineShop និង​ទី ២)- NaNa Brand Nrn កំពុង​ផ្សព្វផ្សាយ​លក់​ផលិតផល​គ្រឿងសម្អាង​ជា​ច្រើន​មុខ «​ដែល​គ្មាន​ចុះ​ប្រវេទន៍ គ្មាន​ការ​ត្រួតពិនិត្យ​គុណភាព និង​គ្មាន​ច្បាប់​អនុញ្ញាត​ឲ្យ​ផ្សព្វផ្សាយ​ពី​ក្រសួងសុខាភិបាល​» ឡើយ ហើយ​ផលិតផល​គ្រឿងសម្អាង​ទាំង​អស់នោះ​គឺ​មាន​ដូច​ជា​៖ ១)- ឡេ​លាប​ស្បែក​ស NRN, ២)- White Rose Spa, ៣)- Gluta Snow Body Lotion, ៤)- ឡេ​បំបាត់​មុន Anti-Acne NRN, និង ៥) Scrub Coffee NRN ។

សេចក្តីជូនដំណឹង​របស់​ក្រសួងសុខាភិបាល បាន​ព្រមាន​ដល់​ម្ចាស់​គណនី​ទាំង​២​ខាងលើ​ថា «​ក្រសួង​សុខា​ភិបាល​តម្រូវ​ឲ្យ​ម្ចាស់​គណនី​ខាងលើ​នេះ ត្រូវ​បញ្ឈប់​ការ​នាំ​ចូល លក់ ចែកចាយ និង​ផ្សព្វផ្សាយ​ផលិតផល​គ្រឿងសម្អាង​ខាងលើ​នេះ​ជា​បន្ត​ទៀត ព្រមទាំង​ប្រមូល​ផលិតផល​ទាំងនេះ​មក​វិញ​ដើម្បី​កំទេច​ចោល​» ។

ជាមួយ​គ្នា​នោះ​ផង​ដែរ ក្រសួង​ក៏​បាន​សំណូមពរ​ដល់​មហាជន​ថា «​ដើម្បី​ជៀសវាង​ការ​ខាតបង់​ប្រាក់​កាស និង​ប៉ះពាល់​ដល់​សុខភាព ឬ​អាច​ឈាន​ដល់​ការ​បាត់បង់​អាយុជីវិត​របស់​អ្នក​ប្រើប្រាស់​ទៀត​នោះ ក្រសួង​សុខា​ភិបាល​សូម​ជូនដំណឹង​ដល់​បងប្អូន​ប្រជាពលរដ្ឋ​ដែល​បាន​ប្រើប្រាស់​ផលិតផល​គ្រឿងសម្អាង​ខាង​លើ​នេះ ត្រូវ​បញ្ឈប់​ការ​ប្រើប្រាស់​ជា​បន្ទាន់​» ។

ក្រសួងសុខាភិបាល​ក៏​បាន​អំពាវនាវ​ដល់​បងប្អូន​ប្រជាពលរដ្ឋ​ខ្មែរ បើសិនជា​ប្រទះ​ឃើញ​ជន​ណា​កំពុង​លក់ ចែកចាយ​ផលិតផល​គ្រឿងសម្អាង​ខាងលើ សូម​ប្រញាប់​ផ្តល់​ព័ត៌មាន ឬ​ត្រូវការ​ព័ត៌មាន​បន្ថែម​ពី​នាយក​ដ្ឋាន​ឱសថ ចំណីអាហារ បរិក្ខារ​ពេទ្យ និង​គ្រឿងសំអាង សូម​ទំនាក់ទំនង​ទៅ​កាន់​លេខ​ទូរស័ព្ទ​៖ 011 574-787/ 012 983-334 ៕ ដោយ​សហការ