រាជាធានីភ្នំពេញ ៖ មនុស្ស៣នាក់បានរងរបួសធ្ងន់ និង៧នាក់ទៀតបានរងរបួសស្រាល នៅក្នុងហេតុការប្រទូស្តរ៉ាយគ្នាយ៉ាងខ្លាំងក្លារវាងក្រុមកម្មកររោងចក្រ២ផ្សេងគ្នាដែលមានទំនាស់ពេលកំពុងផឹកស៊ីក្នុងពិធីជប់លៀងដែលរៀបចំឡើងដោយថៅកែរោងចក្រ ដើម្បីអបអរសាទរឱកាសបុណ្យចូលឆ្នាំថ្មីប្រពៃណីជាតិខ្មែរនេះ ។ ហេតុការណ៍នេះបានបង្កឲ្យមានការភ្ញាក់ផ្អើលឡើងកាលពីវេលាម៉ោង១២និង៥០នាទីរសៀល ថ្ងៃទី១០ ខែមេសា ឆ្នាំ២០១៩ នៅក្នុងរោងចក្រ«ខេមបូឌាន រេដសាន់ ខ្លូស៊ីង ខូអិលធីឌី»និងរោងចក្រ«មីល័រ ខេមបូឌា ហ្គាម៉ិន ឯក»ដែលមានទីតាំងស្ថិតនៅក្នុងតំបន់សេវែនស៊ី ភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ខណៈនោះភាគីទាំង២ម្ខាងៗមានគ្នារាប់រយនាក់បានវាយតប់គ្នា ព្រមទាំងប្រើដុំថ្ម ដបស្រា និងកែវស្រាគប់ដាក់គ្នាទៅវិញទៅមក ហើយក៏បានស្រែកជេរបញ្ចោរគ្នាយ៉ាងអនាធិបតេយ្យទ្រហឹងអឺងកង ពេញរោងចក្រ គ្មានសណ្ដាប់ធ្នាប់ឡើយ និងមើលទៅអាក្រក់មើលបំផុត ។ ភ្លាមៗនោះកម្លាំងនគរបានខណ្ឌពោធិ៍សែនជ័យ និងនគរបាលបណ្ដាប៉ុស្តិ៍នានាបានចេញអន្តរាគមន៍ទប់ស្កាត់បន្ទាន់ ប៉ុន្តែមិនបានធ្វើការឃាត់ខ្លួនមនុស្សណាម្នាក់ឡើយ ។
អ្នករងរបួសធ្ងន់ និងស្រាលទាំង១០នាក់នោះមិនទាន់ត្រូវបានគេស្គាល់ឈ្មោះនៅឡើយ និងត្រូវបានបញ្ជូនទៅសង្គ្រោះនៅតាមបណ្ដាគ្លីនិកឯកជនមួយចំនួន ។ តាមប្រភពព័ត៌មានបានឲ្យដឹងថា នៅមុនពេលកើតហេតុថៅកែរោងចក្រកាត់ដេរទាំង២ខាងលើ បានរៀបចំធ្វើពិធីជប់លៀងជូនកម្មករ ដើម្បីជាការអបអរក្នុងពិធីបុណ្យចូលឆ្នាំថ្មីប្រពៃណីជាតិ ខណៈនោះរោងចក្រនីមួយៗមានកម្មករកម្មការិនីចូលរួមរាប់រយនាក់ ។ ខណៈដែលកម្មវិធីបានដំណើរការតាំងពីព្រឹករហូតដល់ពេលកើតហេតុមានកម្មការិនី២នាក់ បម្រើការងារនៅក្នុងរោងចក្រ «ខេមបូឌាន រេដសាន់ ខ្លូស៊ីង ខូអិលធីឌី» បានជិះម៉ូតូ១គ្រឿងឌុបគ្នាចេញក្រៅ ដើម្បីរកទិញម្ជូរយកទៅហូប ។
ពេលនោះពួកនាងបានជួបនឹងយុវជន១ក្រុម ដែលជាអ្នកបម្រើការងារនៅក្នុងរោងចក្រ «មីល័រ ខេមបូឌា ហ្គាម៉ិនឯក» ហើយយុវជនទាំងនោះបានយកម្សៅទៅប៉ាតពួកនាង ព្រមទាំងបន្លំវាយក្បាលពួកនាងទាំង២នាក់ផងដែរ ។ ប្រភពដដែលបានបន្តថា បន្ទាប់មកពួកនាងបានជិះម៉ូតូត្រឡប់ចូលទៅក្នុងរោងចក្រវិញរួចយករឿងនេះទៅប្រាប់ប្ដីនិងាង្សារឲ្យដឹង ហើយគ្រាន់តែដឹងភ្លាមប្ដីព្រមទាំងសង្សារនាងទាំ២នាក់ បាននាំគ្នីគ្នា៥ទៅ៦នាក់ចេញទៅសួរនាំយុវជនដែលវាយក្បាលប្រពន្ធ និងសង្សាររបស់ខ្លួន ។ ទើបខណៈនោះបង្កឲ្យមានទំនាស់ពាក្យសម្ដីរហូតក្លាយទៅជាអំពើហិង្សាវាយតប់គ្នា និងបង្កឲ្យមានការភ្ញាក់ផ្អើល ហើយភាគីម្ខាងៗមានគ្នារាប់រយនាក់បានទាញដុំថ្មដបស្រា និងកែវស្រាគប់ដាក់គ្នាទៅវិញទៅមករញ៉េរញ៉ៃពេញក្នុងរោងចក្រ ។ មិនតែប៉ុណ្ណោះបណ្ដាលឲ្យមានអ្នករងរបួសធ្ងន់៣នាក់ និងស្រាល៧នាក់ ចំណែកកម្លាំងនគរបាលខណ្ឌពោធិ៍សែនជ័យ និងនគរបាលប៉ុស្តិ៍នានា បានលើកគ្នាទៅអន្តរាគមន៍ទប់ស្កាត់និងបំបែកទើបស្ងប់ស្ងាត់ ។
ប្រភពខាងលើបានបន្តថា ក្រោយពេលកើតហេតុអ្នករងរបួសត្រូវបានបញ្ជូនទៅសង្គ្រោះហើយតំណាងរោងចក្រទាំង២បានធ្វើការសម្របសម្រួលគ្នាដោយបានឯកភាពគ្នាថា មិនប្ដឹងផ្ដល់គ្នាឡើយ ដោយសុខចិត្តជួយព្យាបាលកម្មកររបស់ខ្លួនដែលរងរបួសរៀងៗខ្លួន ។ ម្យ៉ាងទៀតដរាបណា គ្មានអ្នកស្លាប់ ប្រសិនបើមានកម្មកររោងចក្រណាស្លាប់ទើបមានការប្ដឹងផ្ដល់គ្នា ហើយក្រោយពេលរឿងត្រូវបញ្ចប់នៅវេលាម៉ោង៣រសៀល ថ្ងៃដដែលទើបកម្លាំងនគរបាលដកចេញពីរោងចក្រនោះវិញ ៕
ចែករំលែកព័តមាននេះ