រាជធានីភ្នំពេញ ៖ មន្ត្រីនគរបាលថ្នាក់វរសេនីយទោម្នាក់ត្រូវបានកម្លាំងនគរបាលខណ្ឌជ្រោយចង្វារឃាត់ខ្លួន បន្ទាប់ពីមានទំនាស់វាយតប់គ្នា ហើយដកកាំភ្លើងខ្លីបានគំរាមមន្ត្រីនគរបាលជាប់កិច្ចម្នាក់ដែលជាគូទំនាស់នោះ ។ ដែលហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង១និង៣០នាទីរសៀល ថ្ងៃទី០៩ ខែមេសា ឆ្នាំ២០១៩ នៅចំណុចផ្លូវលំ ក្នុងភូមិទី៣ សង្កាត់ជ្រោយចង្វារ ខណ្ឌជ្រោយចង្វារ ។
ជនបង្កផ្ទុះអាវុធដែលត្រូវឃាត់ខ្លួនឈ្មោះ យន់ ផល្លី ភេទប្រុស អាយុ៥៤ឆ្នាំ ជានាយរងនគរបាលការិយាល័យបណ្ដុះបណ្ដាលនៃស្នងការនគរបាលខេត្តកណ្តាលឋានន្តរសក្តិថ្នាក់វរសេនីយទោ មានទីលំនៅភូមិព្រែកសំរោង សង្កាត់តាខ្មៅ ខេត្តកណ្ដាល ។ ចំណែកជនរងគ្រោះដែលរងការគំរាមឈ្មោះ ឈួង គឹមស៊ា ភេទប្រុស អាយុ៣៣ឆ្នាំ ជាមន្ត្រីនគរបាលចរាចរណ៍រាជធានីភ្នំពេញ ជាប់កិច្ចសន្យា មានទីលំនៅទីតាំងកើតហេតុខាងលើ ។
តាមព័ត៌មានបានអោយដឹងថា ផ្ទុះអាវុធនេះផ្តើមចេញពីទំនាស់រឿងជនបង្កបើករថយន្តកិនខឿនសួនដំណាំ ហើយឈានទៅវាយតប់គ្នាផ្ទុះអាវុធតែម្តង ។ តាមព័ត៌មានបានអោយដឹងថា នៅមុនពេលកើតហេតុជនបង្កបានបើករថយន្តម៉ាក់តាកូម៉ា ពណ៌ទឹកប្រាក់ ពាក់ស្លាកលេខនគរបាល២-4881 មួយគ្រឿងដឹកឥវ៉ាន់មកធ្វើផ្ទះនៅម្ដុំកន្លែងកើតហេតុ ។
ខណៈនោះក៏បានបើករថយន្តឆ្លងកាត់ផ្ទះមន្ត្រីជាប់កិច្ចសន្យាឡើងខឿនបន្លែ ហើយត្រូវបានមន្ត្រីជាប់កិច្ចសន្យាទៅគោះទ្វាររថយន្ត ដើម្បីប្រាប់ ព្រមទាំងថតរូប ។ តាមព័ត៌មានបានបន្តទៀតថា ខណៈនោះលោកវរសេនីយទោក៏បានចុះពីលើរថយន្ត ហើយក៏មានទំនាស់គ្នាបែកផ្សែង ហើយឈានទៅប្រើហិង្សាវាយតប់គ្នា ហើយត្រូវលោកវរៈសេនីយដកកាំភ្លើង ខ្លីមិនស្គាល់ម៉ាកបាញ់គំរាមមួយគ្រាប់ ។ បន្ទាប់ពីផ្ទុះអាវុធនគរបាលមូលដ្ឋានក៏បានចុះទៅអន្តរាគមន៍ឃាត់ខ្លួន បញ្ជូនទៅកាន់អធិការដ្ឋានខណ្ឌជ្រោយចង្វារ ។ កន្លងមកភាគីទំនាស់ទាំង២នាក់តែងមានទំនាស់ពាក្យសំដី ហើយក៏ក្លាយជាគំនុំ និងឈានទៅប្រើហិង្សាតែម្តង ។
តាមនគរបាលខណ្ឌជ្រោយចង្វារបានអោយដឹងថា ការឃាត់ខ្លួននេះមិនបានកសាងសំនុំរឿងចាត់ការតាមច្បាប់នោះទេ គឺអោយអង្គភាពមកធានាហើយយកទៅដាកពិន័យកងកម្លាំង ព្រោះមិនទាន់បង្កអោយមានរបួសស្នាម ៕
ចែករំលែកព័តមាននេះ