ខេត្តកំពង់ឆ្នាំង ៖ មានមតិជាច្រើនលើកឡើងថា ផ្ទះបណ្តែតទឹកនៅចំណុចចុងកោះ ក្នុងខេត្តកំពង់ឆ្នាំង នៅតែមានជាច្រើនរយខ្នងដែលបញ្ហានេះធ្វើឲ្យមានការរិះគន់ដល់អាជ្ញាធរខេត្តថាវិធានការបន្លាស់ទីផ្ទះបណ្តែតទឹក មិនមានប្រសិទ្ធិភាព ដោយសារតាមការពិនិត្យស្ថានភាពនៅចំណុចចុងកោះ ស្ថិតក្នុងភូមិទី៦ សង្កាត់ខ្សាម ក្រុងកំពង់ឆ្នាំង មានផ្ទះទឹករាប់រយខ្នង កំពុងបន្តរស់នៅ និងបន្ទោបង់ចូលទឹកនៅឡើយ ។ យ៉ាងនេះក្តីអាជ្ញាធរខេត្តបានបញ្ជាក់ថា គឺនៅសល់តែបែត្រីនោះទេ គ្មានការរស់នៅលើផ្ទះបណ្តែតទឹកឡើយ ។
មានការលើកឡើងថា ផ្ទះបណ្តែតទឹករាប់រយខ្នងកំពុងបន្តរស់នៅយ៉ាងអាណាធិបតេយ្យពេញទឹកទន្លេនៅចំណុចចុងកោះ ហើយបានចោទប្រកាន់អាជ្ញាធរថា មិនមានប្រសិទ្ធភាពក្នុងការបន្លាស់ទីផ្ទះបណ្ដែតទឹកនោះឡើយ ។ ដូចរូបភាពដែលយើងបានឃើញនេះ គឺសុទ្ធសឹងតែផ្ទះទឹកដែលភ្នាក់ងារយើងទើបនឹងថត កាលពីថ្ងៃទី៧ ខែមេសា ចុងសប្តាហ៍កន្លងទៅនេះ ឃើញថា ពិតមានច្រើនស្អេកស្កះពិតមែន ។ ប៉ុន្តែមួយចំនួនទៀតក៏ឃើញមានឡើងមកនៅលើគោកខ្លះហើយដែរ ។ ជុំវិញបញ្ហានេះឯកឧត្តមស៊ុន សុវណ្ណរិទ្ធ អភិបាលរងខេត្តកំពង់ឆ្នាំងបានមានប្រសាសន៍ថា មិនមានផ្ទះបណ្តែតទឹកនៅក្នុងទឹកនោះទេ ប៉ុន្តែផ្ទះដែលយើងបានឃើញនោះសុទ្ធសឹងតែជាបែចញ្ចឹមត្រីទាំងអស់ នេះបើតាមការបញ្ជាក់របស់ក្រុមសមត្ថកិច្ចដែលមានតួនាទីស្រាវជ្រាវ និងពិនិត្យស្ថានភាពផ្ទះទឹកនៅតំបន់នោះ ។
ឯកឧត្តមបានបញ្ជាក់ថា បែត្រីនៅចំណុចភូមិចុងកោះដែលយើងបានឃើញនោះ គឺមានចំនួនជាង៤៨០បែត្រី ហើយមិនមែនជាផ្ទះបណ្ដែតទឹកនោះទេ ។ ជាគោលការណ៍របស់អាជ្ញាធរខេត្ត បានបានប្រជុំឯកភាពគ្នា គឺក្រោយបុណ្យចូលឆ្នាំខ្មែរខាងមុខនេះ និងតម្រូវឲ្យពួកគាត់រុះ ជញ្ជាំងចេញទាំងអស់ រួមទាំងបង្គន់អនាម័យក៏ត្រូវរើចេញផងដែរ ។ ជាមួយគ្នានេះអាជ្ញាធរខេត្តបានកំណត់ក្រោយចូលឆ្នាំខ្មែររយៈពេលពី២ ទៅ៣ខែ ត្រូវតែរុះរើចេញឲ្យអស់ បើមិនដូច្នោះទេ និងមានវិធានការណ៍ជាមិនខាន ។
សូមបញ្ជាក់ថា កន្លងទៅអាជ្ញាធរខេត្តកំពង់ឆ្នាំងបានរៀបចំបន្លាស់ទីផ្ទះបណ្តែតទឹកទាំងអស់ទូទាំងខេត្តអោយឡើងលើគោកក្នុងគោលបំណងសំអាតបរិដ្ឋានក្នុងទឹក ដើម្បីសោភ័ណ្ឌភាព និងដើម្បីសម្រួលការចរាចរណ៍ផ្លូវទឹកផងដែរ ។ ស្រុកដែលមានអ្នករស់នៅលើផ្ទះបណ្តែតទឹក គឺមានស្រុកកំពង់ត្រឡាច ស្រុកជលគិរី ស្រុកកំពង់លែង ក្រុងកំពង់ឆ្នាំង និងស្រុកបរិបូណ៌ ។ ក្រោយការរៀបចំឃើញផ្ទះទឹកមួយចំនួនធំឃើញតែបានឡើងគោកអស់ហើយ នៅសល់មួយចំនួនទៀត គឺតិចតួចដែលបានលេចមានបែត្រីពីក្រោម បន្តរស់នៅពីលើដល់សព្វថ្ងៃ៕
ចែករំលែកព័តមាននេះ