រាជធានីភ្នំពេញ ៖ សម្តេតេជោនាយករដ្ឋ មន្ត្រី ហ៊ុន សែន បានអំពាវនាវដល់ម្ចាស់រថយន្តតាក់ស៊ី ម្ចាស់សណ្ឋាគារ ផ្ទះសំណាក់ កុំដំឡើងថ្លៃក្នុងឱកាសបុណ្យចូលឆ្នាំថ្មីប្រពៃណីជាតិ…
រាជធានីភ្នំពេញ ៖ សម្តេតេជោនាយករដ្ឋ មន្ត្រី ហ៊ុន សែន បានអំពាវនាវដល់ម្ចាស់រថយន្តតាក់ស៊ី ម្ចាស់សណ្ឋាគារ ផ្ទះសំណាក់ កុំដំឡើងថ្លៃក្នុងឱកាសបុណ្យចូលឆ្នាំថ្មីប្រពៃណីជាតិ ដែលនឹងចូលមកដល់នាពេលខាងមុខនេះ ។ សម្តេចតេជោ ហ៊ុន សែន បានសរសេរលើបណ្តាញសង្គមនៅថ្ងៃទី៧ ខែមេសាថា នៅសល់តែ៧ថ្ងៃទៀត ថ្ងៃចូលឆ្នាំថ្មីប្រពៃណីជាតិនឹងមកដល់ ។ យើងសង្កេតឃើញបងប្អូនប្រជាពលរដ្ឋ និងកូនក្មួយមួយចំនួន បានធ្វើដំណើរដោយទឹកមុខរីករាយឆ្ពោះទៅកាន់ស្រុកកំណើតជាបណ្តើរៗហើយ ដើម្បីជួបជុំក្រុមគ្រួសារត្រៀមចូលឆ្នាំថ្មី ។
សម្តេចតេជោបញ្ជាក់ថា «ដើម្បីជួយសម្រួលដល់បងប្អូនប្រជាពលរដ្ឋនិងទេសចរ ជាពិសេស នៅក្នុងឱកាសបុណ្យចូលឆ្នាំថ្មីនេះ សូមម្ចាស់រថយន្តតាក់ស៊ីកុំដំឡើងថ្លៃជិះរថយន្ត និងម្ចាស់សណ្ឋាគារ ផ្ទះសំណាក់ សូមកុំដំឡើថ្លៃស្នាក់នៅ ដើម្បីបងប្អូនមានឱកាសបានធ្វើដំណើរងាយស្រួល និងសន្សំបានថវិកាខ្លះៗសម្រាប់ចាយវាយ និងធ្វើបុណ្យនៅក្នុងឱកាសថ្ងៃចូលឆ្នាំថ្មី ហើយយើងក៏បានសប្បាយរីករាយទាំងអស់គ្នា ។
ជាមួយគ្នានេះ សម្តេចតេជោក៏បានឲ្យដឹងថា ចាប់ពីថ្ងៃទី១២-១៨ ខែមេសា សាលារាជធានីភ្នំពេញនឹងរៀបចំរថយន្តក្រុង១២០គ្រឿង ផ្តល់សេវាដឹកជញ្ជូនបងប្អូន និងកូនក្មួយ ដោយមិនគិតថ្លៃជិះឡើយ ។ សូមទាក់ទងលេខទូរស័ព្ទ ០៨១ ៨១៧ ៤៧៤,០៧៨ ៨១៧ ៤៧៤ ,០៩៨ ៥៥៥ ៥៨១ ដើម្បីដឹងពីព័ត៌មានសេវារថយន្តក្រុងជិះ Free ។ ដើម្បីមានភាពកក់កៅ្តក្នុងឱកាសបុណ្យចូលឆ្នាំថ្មីប្រពៃណីជាតិ សម្តេចតេជោក៏បានស្នើឲ្យអាជ្ញាធរ និងសមត្ថកិច្ចគ្រប់ជាន់ថ្នាក់ រៀបចំពង្រឹងសណ្តាប់ធ្នាប់ ការពារសុវត្ថិភាពជូនប្រជាពលរដ្ឋ និងភ្ញៀវទេសចរឲ្យបានល្អ ។
សម្តេចតេជោ ក៏បានអំពាវនាវសូមបើកបរដោយប្រុងប្រយ័ត្ន និងយោគយល់អធ្យាស្រ័យគ្នាទៅវិញទៅមក គោរពច្បាប់ដើម្បីសុវត្ថិភាពទាំងអស់គ្នា ។ សម្តេចតេជោនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋ ឲ្យមានការប្រុងប្រយ័ត្នក្នុងការបើកបរនៅក្នុងឱកាសបុណ្យចូលឆ្នាំថ្មីប្រពៃណីជាតិ ។ សម្តេចបន្តថា ស្រុកទេសមានសុខសន្តិភាព បងប្អូនជនរួមជាតិក៏មានឱកាសបានសប្បាយរីករាយ ក្នុងការធ្វើដំណើរទៅកម្សាន្តទីជិតឆ្ងាយទាំងក្នុងនិងក្រៅប្រទេសដោយសេរី ។
ជាមួយគ្នានេះដែរ សម្តេចតេជោបានសរសេរឆ្នាំនេះ នៅតាមបណ្តាខេត្តនានាក៏មានរៀបចំកម្មវិធីសង្ក្រាន្តអបអរសាទរឆ្នាំថ្មី ដើម្បីផ្តល់នូវការកម្សាន្តរីករាយជូនដល់បងប្អូនប្រជាពលរដ្ឋ ក៏ដូចជាទេសចរជាតិ និងអន្តរជាតិដែរ ។ ជាពិសេសទៀតនោះ គឺបងប្អូនប្រជាពលរដ្ឋនិងកូនក្មួយកម្មករកម្មការិនីអាចជិះរថយន្តក្រុងពីភ្នំពេញទៅកាន់ខេត្ត ឬពីខេត្តមកភ្នំពេញវិញ ចាប់ពីថ្ងៃទី១២ដល់ថ្ងៃទី១៨ ខែមេសា ដោយមិនបង់ប្រាក់ទៀតផង ។
សម្តេចតេជោ បានអំពាវនាវថា «សូមបងប្អូនប្រជាពលរដ្ឋ ជាពិសេសកូនក្មួយយុវជន បើកបរគោរពច្បាប់ចរាចរណ៍ កុំបើកប្រជែងយកលឿនតែម្នាក់ឯង ដែលអាចបង្កគ្រោះថ្នាក់ដល់ខ្លួនឯងផង និងអ្នកដទៃផង ដែលធ្វើឲ្យយើងសោកស្តាយអស់មួយជីវិត ជាពិសេសនៅក្នុងរដូវបុណ្យចូលឆ្នាំថ្មី» ។សម្តេចតេជោបន្ថែមថា សុំជូនពរបងប្អូន និងកូនក្មួយធ្វើដំណើរមានសុខសុវត្ថិភាពគ្រប់ទីកន្លែង ៕
ចែករំលែកព័តមាននេះ