ខេត្តបាត់ដំបង ៖ បន្ទាប់ពីឈើព្រៃគ្រប់ប្រភេទត្រូវបានគេកាប់បំផ្លាញលក់ខ្ទេចខ្ទីគ្មានសល់នៅទូទាំងស្រុកសំឡូត ស្រាប់តែពេលនេះក្រុមឈ្មួញបានប្រកាស់ដើរប្រមូលទិញដើម«ខ្នុរ» ម្ដង ដោយទិញតំលៃ១ដើមចន្លោះពី១៥០០០រៀលដល់២៥០០០រៀល ទៅតាមទំហំដើមតូចឬធំ ហើយប្រជាពលរដ្ឋនៅក្នុងស្រុកសំឡូត ដែលមានដើម«ខ្នុរ»មិនសូវផ្ដល់ផលក៏បាននាំគ្នាកាប់លក់ព្រោងព្រាតស្ទើររាល់ថ្ងៃឲ្យពួកឈ្មួញដែលចុះទៅទិញដល់ចំការតែម្ដង ។
អ្នកស្រុកសំឡូតបាននិយាយកាលពីថ្ងៃទី០៨ មេសា ថានៅក្នុងស្រុកសំឡូតទាំងមូលមាននៅសេសសល់ព្រៃឈើតិចតួចណាស់ សម្រាប់អ្នកភូមិឬពួកជនខិលខូចកាប់លក់ តែពេលនេះអ្នកភូមិចាប់ផ្ដើមកាប់ដើមខ្នុរហូបផ្លែលក់ឲ្យឈ្មួញម្ដង ។
អ្នកភូមិនិយាយទៀតថា សព្វថ្ងៃមានពួកឈ្មួញកំពុងដើរប្រមូលទិញដើមខ្នុរស្រុក ក្នុង១ដើមអាចលក់បានចាប់ពី១៥០០០រៀល ដល់២៥០០០រៀល តាមទំហំតូចឬធំ ហើយមិនរើសដើមល្អឬមិនល្អ វៀចឬត្រង់នោះទេ គឺឈ្មួញប្រមូលទិញទាំងអស់សំខាន់ឲ្យតែមានដើមខ្នុរមានខ្លឹម។ ប៉ុន្តែគេមិនបានដឹងថា តើក្រុមឈ្មួញដើមប្រមូលទិញដើមខ្នុរស្រុកនេះយកទៅណាឬយកទៅធ្វើអ្វីនោះទេ ព្រោះទិញមិនរើសឈើរសោះ ។
ពាក់ព័ន្ធនឹងការដើរប្រមូលទិញដើមខ្នុរក្នុងស្រុកនេះបុរសម្នាក់ឈ្មោះម៉ៅ ដែលអះអាងថា ខ្លួនជាអ្នកប្រមូលទិញដើមខ្នុរពាសពេញក្នុងស្រុកសំឡូតនេះ(ឈ្មួញ)បាននិយាយថា «ខ្ញុំបានចូលប្រមូលទិញដើមខ្នុរនេះ នៅក្នុងស្រុកសំឡូត រាប់រយម៉ែត្រគូបនិងច្រើនលើកកន្លងមកហើយ»។
បុរសនេះនិយាយទៀតថា «ដើមខ្នុរនេះខ្ញុំទិញដឹកទៅខេត្តកំពង់ចាម ដើម្បីលក់បន្តឲ្យតាមសិប្បកម្មចម្លាក់ឈើ.. ខ្ញុំមិនបានដឹងថា ជាងនៅតាមរោងសិប្បកម្មចម្លាក់ឈើទាំងនោះ បានយកដើមខ្នុរទៅធ្វើអ្វីខ្លះទេ តែខ្ញុំគ្រាន់តែដឹងខ្លះៗថា ពួកជាងចម្លាក់បានយកដើមខ្នុរទាំងនេះទៅកាត់ខ្លីៗតាមក្បូនខ្នាត ឆ្លាក់ធ្វើជារូបសិល្បៈដូចជា ឧបករណ៏ភ្លេងបុរាណ រូមក្អម ឆ្នាំង រូបសត្វ ឬ ផ្លែឈើផ្សេងៗ។ល។ ព្រោះដើមខ្នុរមានខ្លឹមពណ៏លឿងល្អធ្វើរូបចម្លាក់ស្អាត»។
ឈ្មួញឈើរូបនេះបានបញ្ជាក់ថា ខ្លួនបានចូលទៅប្រមូលទិញដើមខ្នុរនៅក្នុងស្រុកសំឡូត នេះច្រើនលើកហើយ ដោយទិញក្នុងតំលៃ១ដើមថ្លៃចាប់ពី១៥០០០រៀល ដល់២៥០០០រៀល ។
អ្នកភូមិដែលមានដើមខ្នុរមិនចាំបាច់កាប់ខ្លួនឯងទេ ឲ្យតែមានដើមខ្នុរដែលត្រូវលក់គឺខ្លួនដាក់កម្លាំងកម្មករឲ្យកាប់និងចាំងសំបកក្រៅចេញយកតែខ្លឹមខាងក្នុងតែប៉ុណ្ណោះ ។ លោកម៉ៅ បានបញ្ជាក់ថា បើទិញផ្ទាល់តាមផ្ទះឬចំការគឺគិតតំលៃតាមដើមតូចឬធំ តែពេលដឹកយកទៅលក់តាមសិប្បកម្មនៅខេត្តកំពង់ចាម គឺលក់គិតជាម៉ែត្រគូប ក្នុង១ម៉ែត្រគូបថ្លៃ១លានរៀល។
ខណៈដែលដើមខ្នុរស្រុក កំពុងមានហាងឆេងខ្លាំងនេះ អ្នកស្រុកសំឡូត ហាក់មិនបង្អង់យូរឡើយ ក្នុងការកាប់ដើមខ្នុរចាស់ៗលក់ឲ្យឈ្មួញ ។ ប្រជាពលរដ្ឋបាននិយាយថា អ្នកស្រុកសំឡូតបាននាំគ្នាលក់ដើមខ្នុរ តែលក់តែដើមខ្នុរដែលលេងសូវផ្លែ ឬ ដើមចាស់ៗ ឬ ដើមស្អុយំខាន់ឲ្យតែមានខ្លឹមខាងក្នុងជាជាងទុកចោល ៕
ចែករំលែកព័តមាននេះ