រាជធានីភ្នំពេញ ៖ តាមសេចក្តីរាយការណ៍ចេញពីពន្ធនាគាររាជធានីភ្នំពេញ(ប៉េហ្ស៊ី)បានឲ្យដឹងថា ខាងពន្ធនាគារដោយមានការអនុញ្ញាតពីស្ថាប័នសាលាដំបូងរាជធានីផង គឺបានដឹកនាង យិន ម៉ាណា ដែលជាជនសង្ស័យក្នុងករណីបើកបររថយន្តបុកនិស្សិតស្រីម្នាក់ស្លាប់នោះ បញ្ជូននាងទៅកាន់មន្ទីរពេទ្យមិត្ត
ភាពខ្មែរ-សូវៀត (ហៅពេទ្យរុស្ស៊ី) ដើម្បីសង្គ្រោះជាបន្ទាន់ ដោយសារសុខភាពធ្វើទុក្ខខ្លាំង កាលពីវេលាម៉ោងប្រមាណ១២ថ្ងៃត្រង់ថ្ងៃទី៨ មេសា ។
សេចក្តីរាយការណ៍បន្តថា ការដែលខាងពន្ធនាគារបញ្ជូននាងយិន ម៉ាណា ទៅកាន់មន្ទីរពេទ្យសង្គ្រោះបន្ទាន់នោះ ដោយសារនាងកើតជំងឺថប់ដង្ហើម ចង់រកគាំងបេះដូងសន្លប់ម្តងៗ ។ ហើយជំងឺនេះ កើតមានតាំងពីនាង យិន ម៉ាណា មិនទាន់ចូលដេកក្នុងពន្ធនាគារម្លេះ ។ ប្រភពបន្តថា ជំងឺថប់ផ្លូវដង្ហើមរបស់នាងយិន ម៉ាណា កាលនៅក្រៅពន្ធនាគារ នាងត្រូវប្រើថ្នាំម្យ៉ាងបាញ់ចូលតាមច្រមុះ នៅពេលពិបាកដកដង្ហើមម្តងៗ លើសពីនេះ គឺត្រូវតែប្រើអុកស៊ីហ្សែនទៀតផង ។
ប្រភពបន្តថា នាងយិន ម៉ាណា មានអាយុ១៧ឆ្នាំ តែសុខភាពមិនសូវគ្រប់គ្រាន់ទេ ចង្វាក់បេះដូងខ្សោយ មានអារម្មណ៍ឆាប់ភ័យខ្លាច ។ នេះបើតាមការបញ្ជាក់ពីវេជ្ជបណ្ឌិតខាងពន្ធនាគារបានប្រាប់ទៅក្រុមអនុរក្ស ដែលនាងមិនអាចខ្វះការព្យាបាលនោះបានឡើយ និងអាចបន្តការព្យាបាលយូរអង្វែង ។
គួររំលឹកថា ថ្មីៗនេះ លោកយិន ហ្គិច ដែលជាឪពុកនាងយិន ម៉ាណា បានយកប្រាក់ចំនួន៧០.០០០ដុល្លារអាមេរិក ទៅជូនដល់ដៃម្តាយនិស្សិត ដែលរងគ្រោះដល់ជីវិតនោះរួចហើយដែរ តែទឹកប្រាក់៧មឺុនដុល្លារនេះ គ្រាន់ជាសំណងរដ្ឋប្បវេណី ទៅលើជនរងគ្រោះប៉ុណ្ណោះទេ ដូច្នេះសំណុំរឿងនាង យិន ម៉ាណា នៅជាប់បណ្តឹងអាជ្ញាមួយទៀត ។ បណ្តឹងអាជ្ញាកំពុងស្ថិតនៅដំណាក់កាលចៅក្រមស៊ើបសួរ មិនទាន់បានបិទបញ្ចប់នៅឡើយទេ ហើយបើតាមនីតិវិធីកាលណា បើចៅក្រមស៊ើបសួរបិទការស៊ើបអង្កេតហើយ សំណុំរឿងនោះនិងចាត់ទៅចៅក្រម ឬក្រុមប្រឹក្សាជំនុំជម្រះ ដើមបើកសវនាការជំនុំជម្រះទោស ។
គួបញ្ជាក់ទៀតថា កាលពីថ្ងៃទី២៩ មីនា លោកស្រី កែវ សុគន្ធា ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចធ្វើការចោទប្រកាន់លើជនបង្កគឺនាង យិន ម៉ាណា ជាផ្លូវការក្រោមបទ.បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន បណ្តាលឲ្យមរណៈភាពដល់អ្នកដ៏ទៃ ។ ដែលបទល្មើសនេះមានចែងតាមបញ្ញាតិមាត្រា៨៥ នៃច្បាប់ស្តីពីចរាចរផ្លូវគោក ដោយបាន និងកំណត់ឲ្យផ្តន្ទាទោសលើជនបង្ក ដាក់ពន្ធនាគារពី២ឆ្នាំទៅ៥ឆ្នាំ ។
ចែករំលែកព័តមាននេះ