រាជធានីភ្នំពេញ ៖ រាជរដ្ឋាភិបាលបានកំពុងតែយកចិត្តទុកដាក់លើកកម្ពស់វិស័យបច្ចេកវិទ្យាវិស្វកម្ម និងគណិតវិទ្យា ដើម្បីចូលអភិវឌ្ឍន៍សេដ្ឋកិច្ចជាតិនៅពេលខាងមុខនេះ ។ នេះបើតាមការលើកឡើងរបស់ឧបនាយករដ្ឋមន្ត្រីអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ។ ក្នុងពិធីសម្ភោធដាក់សំណើរការជាផ្លូវការអគារវិទ្យាសាស្ត្រមជ្ឈមណ្ឌលបណ្តុះបណ្តាលធុរកិច្ចថ្មី «តេជោ» និងសមិទ្ធិផលនានា នៅសាកលវិទ្យាល័យភូមិន្ទភ្នំពេញ នារសៀលថ្ងៃទី៨ ខែមេសា ឆ្នាំ២០១៩ ។
លោកបន្តថា អគារថ្មីនេះជាសមិទ្ធិផលមួយទៀតដែលបានសបញ្ជាក់ឲ្យឃើញថា រាជរដ្ឋាភិបាលបានកំពុងតែអនុវត្តយ៉ាងសកម្មនូវគោលនយោបាយរបស់ខ្លួន និងបង្ហាញយ៉ាងច្បាស់ថា នៅពេលអនាគតផ្នែកវិទ្យាសាស្ត្របច្ចេកវិទ្យាវិស្វកម្ម និងគណិតវិទ្យាបានកំពុងតែលេចចេញ ជារូបរាង្គនៅក្នុងសកលវិទ្យាល័យភូមិន្ទភ្នំពេញហើយ ដែលនឹងជួយបន្ថែមជាមួយ និងការបណ្តុះបណ្តាលលើកវិស័យនេះលើកតាមគ្រឹះស្ថានឧត្តមសិក្សា និងគ្រឹះស្ថានឧត្តមបណ្តុះបណ្តាលផ្សេងនៅក្នុងប្រទេស ។
លោកឧបនាយករដ្ឋមន្ត្រីក៏បានឲ្យដឹងថា អគាវិទ្យាសាស្ត្រមជ្ឈមណ្ឌលបណ្តុះធុរកិច្ចថ្មី «តេជោ» ដែលដាក់សម្ភោធឲ្យដំណើរនៅថ្ងៃនេះ មានទំហំទឹកប្រាក់ប្រមាណជាង៣លានដុល្លារ ។ ជាការវិនិយោគមួយដែលមានសារៈសំខាន់ និងអាទិភាពរបស់រាជរដ្ឋាភិបាលក្នុងការកសាងធនធានមនុស្សក្នុងវិស័យនេះ ។ ហើយរាជរដ្ឋាភិបាលនឹងបន្តកសាងវិស័យនេះបន្តទៀ តទៅតាមលទ្ធភាពនៃថវិកាជាតិ ។
លោកបញ្ជាក់ថា «អីញ្ចឹងនៅបរិវេណសាកលវិទ្យាល័យពេលនេះមានអគារស្ទែមមួយ ។ ហើយរដ្ឋមន្ត្រីក្រសួងអប់រំថា យើងមានសាលាគំរូ (ស្ទែម)នេះ នៅវិទ្យាល័យព្រះស៊ីសុវត្ថិ ហើយអាឡូវនេះមាន១១សាលាហើយនៅទូទាំងប្រទេស ។ ហើយជាគោលបំណងខ្ញុំចង់បន្ត ពង្រីកសាលាគំរូ និងមជ្ឈមណ្ឌលវិទ្យាសាស្ត្របែបនេះឲ្យបានច្រើនជានបន្តទៀត ហើយមាន ស្តង់ដារបស់អគារផ្តល់នូវផាសុខភាព និងផ្តល់សម្ភារបរិក្ខាផ្សេងៗទៀត ដោយឲ្យសម្រេច បានលទ្ធផលល្អ និងផលិតបាននូវធនធានមនុស្សប្រកបដោយគុណភាពនៅក្នុងវិស័យវិទ្យា សាស្ត្របច្ចេកវិទ្យាវិស្វកម្ម និងគណិតវិទ្យា» ។
លោកក៏បានលើកឡើងថា លោកចង់ឲ្យបង្កើតធនធានមនុស្សផ្នែកបច្ចេកវិទ្យាវិស្វកម្ម និងគណិតវិទ្យាឲ្យបានច្រើននៅតាមតំបន់សំខាន់ៗនានានៅក្នុងប្រទេសកម្ពុជាព្រោះថា គុណភាពធនធានតទៅមុខទៀត គឺជាគន្លឹះដ៏សំខាន់នៅក្នុងការប្រកួតប្រជែងដែលកំណត់នៃភាពប្រកួតប្រជែងរបស់ប្រទេសនីមួយៗនៅក្នុងការអភិវឌ្ឍទៅសេដ្ឋកិច្ចទាំងសង្គមតទៅអនាគត ។ ដូច្នេះធនធានមនុស្សរបស់កម្ពុជា គឺជាអាទិភាពខ្ពស់បំផុតមួយទាំងនៅក្នុងនីតិកាលកន្លងមកនឹងនៅអាណត្តិបន្តទៀតដែលធនធាមនុស្សនឹងក្លាយជាវិស័យអាទិភាពដ៏សំខាន់បំផុតរបស់រាជរដ្ឋាភិបាលសម្រាប់អភិវឌ្ឍន៍សង្គមជាតិផងដែរ ។
ជាមួយគ្នានោះដែរលោកឧបនាយករដ្ឋមន្ត្រីក៏បានស្នើដល់ថ្នាក់ដឹកនាំសកលវិទ្យាល័យត្រូវធ្វើឲ្យអស់លទ្ធភាពដូចជា ការធ្វើបច្ចុប្បន្នភាពក្នុងការលម្អកម្មវិទ្យាសិក្សាផ្នែកបច្ចេកវិទ្យា វិស្វកម្ម និងគណិតវិទ្យាល័យឲ្យមានលក្ខខណៈជាក់ស្តែងឲ្យស្របតាមការប្រែប្រួលបច្ចេកវិទ្យានៅក្នុងតំបន់ និងជាសកល ។ ជំរុញឲ្យមានការស្រាវជ្រាវអន្តវិស័យផ្នែកសង្គម និងផ្នែកវិទ្យាសាស្ត្រ និងការបង្កើតឲ្យមានយន្តការភាពជាដៃគូឧស្សាហកម្មឲ្យកាន់តែរឹងមាំ និងទម្រង់ច្រើនសំបូរបែប ។
លោកបញ្ជាក់ថា «យើងចង់បានឲ្យមានការស្រាវជ្រាវផ្នែកវិស័យបច្ចេកវិទ្យានេះមិនមែនត្រឹមតែបម្រើឲ្យមានការរីកចម្រើនក្នុងវិស័យវិទ្យាសាស្ត្រខ្លួនឯងនោះទេ ប៉ុន្តែចង់បានការសិក្សា ស្រាវជ្រាវនេះក្លាយជាឧបកណ៍ជាក់ស្តែងសម្រាប់អភិវឌ្ឍន៍សេដ្ឋកិច្ចសង្គម និងដោះស្រាយ បញ្ហានានានៅក្នុងសេដ្ឋកិច្ច និងសង្គមជាតិ» ។ ចំណែកលោកហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡាបានលើក ឡើងថា ក្រសួងអប់រំបានកំពុងតែខិតខំធ្វើការកែទម្រង់ប្រព័ន្ធអប់រំឲ្យមានភាពល្អប្រសើរដែលការអប់រំនេះមិនសំដៅទៅលើការកែសម្រួលប្រព័ន្ធប្រឡងនោះទេ គឺត្រូវធ្វើការកែអប់រំចាប់ពីកុមារតូចមក ។
លោករដ្ឋមន្ត្រីបន្តថា ការអប់រំនេះដើម្បីឲ្យធនធានមនុស្សរបស់កម្ពុជាត្រៀមខ្លួនយ៉ាងល្អដោយបណ្តុះទាំងសម្បទា បំនិនសម្បទា និងចរិយាសម្បទា ដែលជាគន្លឹះសម្រាប់ការចូល រួមប្រកបដោយប្រសិទ្ធភាពនៅក្នុងសេដ្ឋកិច្ចឌីជីថលដែលជាផ្នែកសំខាន់ក្នុងវិស័យបដិវត្តឧស្សាហកម្មរបស់យុទ្ធសាសាស្ត្ររបស់រាជរដ្ឋាភិបាលសម្រាប់អាណត្តិនេះ ។ លោករដ្ឋមន្ថែមថា ជាពិសេសនោះ គឺវិស័យអេឡិចត្រូនិច និងវិស័យកសិឧស្សាហកម្ម ដោយសារតែនៅពេលអនាគតកម្ពុជាត្រូវប្រែក្លាយពីវិស័យកសិកម្មទៅជាវិស័យកសិឧស្សាហកម្មតាមរយៈការប្រែក្លាយកសិផលដែលដាំដុះនៅក្នុងស្រុក ឲ្យក្លាយជាផលិតផលសម្រេច ៕
ចែករំលែកព័តមាននេះ