ម្តងនេះសមត្ថកិច្ចប្រមូលក្មេងទំនើងយកទៅដុសក្អែលមុនចូលឆ្នាំខ្មែរខាងមុខ
- បាត់ដំបង
ខេត្តបាត់ដំបង ៖ កម្លាំងនគរបាលការិយាល័យព្រហ្មទណ្ឌកំរិតស្រាលនៃស្នងការខេត្តប៉ុន្មានថ្ងៃកន្លងទៅនេះបានតាមស្ទាក់ចាប់ក្រុមក្មេងទំនើងបានជាង១០នាក់ជាមួយនឹងម៉ូតូជាង១០គ្រឿងដែលជិះម៉ូតូបំពាក់បំពង់ស៊ីម៉ាំងកែឆ្នៃបំពងសំឡេងលាន់កក្រើក បង្កឲ្យមានការភ្ញាក់ផ្អើលពេញក្រុងបាត់ដំបងយកទៅកាន់ស្នងការខេត្ត ដើម្បីដុសក្អែលឲ្យជ្រះចង្រៃ មុនពេលសង្ក្រាន្តឆ្នាំថ្មីចូលមកដល់នាពេលខាងមុខនេះ ។
លោកឈឿង គឹមសុង នាយការិយាល័យព្រហ្មទណ្ឌកំរិតស្រាលដែលទទូលបទបញ្ជាផ្ទាល់ពីលោកស្នងការខេត្តឲ្យបំពេញការងារនេះបាននិយាយថា ដោយសារតែមួយរយៈកន្លងទៅនេះ ក្រុមក្មេងទំនើងហាក់បង្កឲ្យមានការភ្ញាក់ផ្អើលខ្លាំងដល់ប្រជាពលរដ្ឋ និងប៉ះពាល់ដល់សណ្តាប់ធ្នាប់សាធារណៈជាមួយនឹងការជិះម៉ូតូបំពងសំឡេងលាន់កក្រើកទើបលោកស្នងការខេត្តបញ្ជាឲ្យកម្លាំងរបស់លោកតាមក្របួចក្រុមក្មេងទំនើងនេះយកមកអប់រំ ។
លោកនាយការិយាល័យរូបនេះបានប្រាប់ថា រយៈពេល២ថ្ងៃមុននេះកម្លាំងរបស់លោកបានតាមស្ទាក់ចាប់ក្រុមជិះម៉ូតូបំពងសំឡេងនេះបានចំនួន១៦នាក់ ដកហូតម៉ូតូដែលបានកែច្នៃស៊ីម៉ាំងបំពងសំឡេងបានចំនួន១៦គ្រឿង ហើយនៅថ្ងៃទី០៨ មេសា លោកស្នងការខេត្តបានបញ្ជាឲ្យមន្ត្រីជំនាញធ្វើការពិនិត្យ និងដោះចេញនូវឧបករណ៍កែច្នៃដែលបំពាក់លើម៉ូតូ និងធ្វើការអប់រំដល់ក្រុមក្មេងទំនើងទាំងនោះមុនពេលឲ្យពួកគេត្រឡប់ទៅផ្ទះវិញ ។
បើតាមមន្ត្រីជំនាញបានឲ្យដឹងថា ម៉ូតូក្រុមក្មេងទំនើងទាំងនោះភាគច្រើនបំពាក់ស៊ីម៉ាំងកែច្នៃបំពងសំឡេងលាន់កងរំពងបង្កឲ្យមានការភ្ញាក់ផ្អើលពេលជិះចូលទីប្រជុំជននៅក្នុងក្រុង និងធ្វើឲ្យប៉ះពាល់ខ្លាំងដល់សណ្ដាប់ធ្នាប់សាធារណៈ ។ ប៉ុន្តែយ៉ាងណាក្រោយពីធ្វើការអប់រំលោកស្នងការបានបញ្ជាឲ្យក្រុមក្មេងទំនើងទាំងនោះដោះស៊ីម៉ាំងបំពងសំឡេងចេញពីម៉ូតូរួចប្រគល់ឲ្យពួកគេ តែបានព្រមានដល់ពួកគេឲ្យបញ្ឍប់សកម្មភាពទំនើងបែបនេះជៀសវាងកុំឲ្យមានការប្រឈមនឹងផ្លូវច្បាប់ធ្ងន់ធ្ងរនៅថ្ងៃក្រោយ ៕
ចែករំលែកព័តមាននេះ