ខេត្តបន្ទាយមានជ័យ ៖ ដោយមានភ្លៀងស្រិចៗ និងខ្យល់កន្ត្រាក់លាយឡំជាមួយផ្គររន្ទះបានបក់បោកយ៉ាងខ្លាំងបង្កឲ្យខូចខាតលំនៅដ្ឋានរបស់ប្រជាពលរដ្ឋចំនួន២ស្រុក ក្នុងខេត្តបន្ទាយមានជ័យ សរុប៤៧ខ្នង និងកុដ្ឋលោក១ខ្នង ។ ខ្យល់កន្ត្រាក់នេះបានកើតឡើងនៅល្ងាចថ្ងៃទី០៧ ខែមេសានេះ ២ស្រុកដែលរងគ្រោះដោយខ្យល់កន្ត្រាក់នោះ គឺស្រុកមង្គលបូរីខូចខាតផ្ទះ១៣ខ្នង កុដ្ឋលោក១ខ្នង និងស្រុកម៉ាឡៃខូចខាតផ្ទះ៣៤ខ្នង ។ នេះបើយោងតាមរបាយការណ៍របស់អធិការដ្ឋាននគរបាល ស្រុកមង្គលបូរី និងស្រុកម៉ាឡៃឲ្យដឹងនៅថ្ងៃទី០៨ ខែមេសា ឆ្នាំ២០១៩នេះ ។
លោកវរសេនីយឯក ស៊ិន ណារ៉ាក់ អធិកានគរបាលស្រុកមង្គលបូរីបានឱ្យដឹងថា នៅល្ងាចថ្ងៃទី០៧ ខែមេសា ឆ្នាំ២០១៩ ម្សិលមិញខ្យល់កន្ត្រាក់បានបង្កឲ្យប៉ះពាល់ផ្ទះប្រជាពលរដ្ឋ មានដួលរលំ និងរបើកដំបូលស័ង្កសី នៅភូមិហ៊ុបប្ញស្សី ឃុំសឿ ស្រុកមង្គលបូរីចំនួន១៣ខ្នង និងកុដ្ឋលោក១ខ្នង ។
ចំណែកនៅស្រុកម៉ាឡៃលោកវរសេនីយឯកបេន សំអាត អធិការនគរបាលស្រុកក៏ឲ្យដឹងដែរថា នៅក្នុងភូមិស្រះភ្លោះ ភូមិខ្ជាយបល្ល័ង្ក ឃុំតាគង់ ស្រុកម៉ាឡៃ ក៏មានខ្យល់កន្ត្រាក់ផងដែរ នៅល្ងាចថ្ងៃទី០៧ ខែមេសា ឆ្នាំ២០១៩ ដែលបង្កឲ្យខូចខាតលំនៅដ្ឋានរបស់ប្រជាពលរដ្ឋដូចជា របើកដំបូល និងដួលរលំចំនួន៣៤ខ្នង ។
ក្រោយពីខ្យល់កន្ត្រាក់បង្កឱ្យខូចខាតផ្ទះសំបែងប្រជាពលរដ្ឋទាំង២ស្រុក គឺស្រុកម៉ាឡៃ និងស្រុកមង្គលបូរី នៅព្រឹក ថ្ងៃទី៨ ខែមេសា ឆ្នាំ២០១៩ កម្លាំងនគរបាល កម្លាំងប្រជាការពារ និងកម្លាំងយោធា ទាំង២ស្រុក បានចេញទៅជួយអន្តរាគមន៍រុះរើផ្ទះរងការខូចខាត និងបានជួសជុល កសាងជូនប្រជាពលរដ្ឋរងគ្រោះជាបន្តបន្ទាប់នោះផងដែរ ។
សូមបញ្ជាក់ថា លើកទី៣នោះហើយដែលបន្ទាយមានជ័យនាដើមឆ្នាំ២០១៩ បានរងគ្រោះដោយគ្រោះធម្មជាតិខ្យល់កន្ត្រាក់ បង្កការខូចខាតផ្ទះសំបែងរបស់ប្រជាពលរដ្ឋរាប់រយខ្នង និងសាលារៀនកុដ្ឋលោក មួយចំនួនផងដែរ ។ តែពុំមានបង្កឲ្យគ្រោះថ្នាក់ដល់អាយុជីវិតមនុស្សនោះឡើយ ៕
ចែករំលែកព័តមាននេះ