តាម​ប្រភព​ព័ត៌មាន Goal បានឱ្យ​ដឹង​ថា អតីត​កីឡាករ​ក្លិប​អធិរាជ​ស McManaman បានឱ្យ​តម្រុយ​ថា គ្រូបង្វឹក​របស់ Real Madrid ដែល​ចេញចូល​ក្លិប​ពីរ​ដង Zinedine Zidane អាច​នឹង​ដឹង​ថា Cristiano Ronaldo នឹង​ចាក​ចេញពី Real Madrid ហើយ​ក្លិប​មិន​បាន​គ្រោង​នឹង​ជំនួស Ronaldo ទេ ទើប​បានជា​សុខចិត្ត​ចាក​ចេញពី​ក្លិប​កាលពី​រដូវ​កាល​មុន នៅ​ឆ្នាំ​២០១៨ ។

គ្រូបង្វឹក​រូប​នេះ បាន​បញ្ចេញស្នាដៃ​យ៉ាង​ល្អ ដែល​បាន​នាំ Real Madrid ឱ្យ​ឈ្នះ Champions League ដល់​ទៅ​៣​ដង​ជាប់​ៗ​គ្នា​ក្នុង​សម័យកាល​របស់​ខ្លួន​ដឹកនាំ ។ ការ​សម្រេចចិត្ត​ចាកចេញ​របស់​គាត់ គឺ​ធ្វើ​ឡើង​ក្រោយ​ពី​ម្ចាស់​ពាន Ballon d’Or ប្រាំ​លើក Ronaldo ប្រាប់​ថា ចាក​ចេញពី Real ទៅ​កាន់ Juventus ។

McManaman ប្រាប់​សារព័ត៌មាន La Galerna ថា​«​ប្រាកដ​ណាស់​គេ (Zidane) មាន​អ្វី​មក​ភ្ញោ​ច​ឱ្យ​ចេញ​។ ខ្ញុំ​មិនដឹង​ទេ ប្រសិនបើ​គេ​បានដឹង​ថា Cristiano កំពុង​ចង់​ចាកចេញ​នា​ពេល​នោះ ហើយ​គ្មាន​នរណា​អាច​ជំនួស Ronaldo បាន ។ ប្រសិនបើ​គេ​ដឹង​មុន ប្រាកដ​ណាស់​គេ​នឹង​ចាកចេញ​។ នេះ​ដោយសារ​តែ គ្មាន​នរណា​ម្នាក់​មាន​ថ្វី​ជើង​ដូច Cristiano ហើយ​គ្មាន​នរណា​អាច​ជំនួស​គេ​បាន​។ ដូចនេះ គ្រូបង្វឹក​នឹង​មាន​បញ្ហា​»៕