រាជធានីភ្នំពេញ ៖ នៅល្ងាចថ្ងៃសៅរ៍ទី៦ មេសា ស្អែកនេះ សង្វៀនទូរទស្សន៍ប៉ុស្តិ៍លេខ៥ នឹងបើកឱ្យកីឡាករកម្ពុជាមួយរូបប៉ះគ្នាជាមួយជើងខ្លាំងថៃ ខណៈដែលជំនួបប្រកួតនេះ ត្រូវបានអ្នករៀបចំកម្មវិធីបង្ហើបថាធ្វើឡើងដើម្បីស្ទង់មើលសមត្ថភាពរបស់កីឡាករកម្ពុជាដែលជាជើងថ្មីទើបឡើងកូដប៉ុន្មានប្រកួតចុងក្រោយ។ ប្រភពពីអ្នករៀបចំកម្មវិធីព្រឹត្តិការណ៍…
រាជធានីភ្នំពេញ ៖ នៅល្ងាចថ្ងៃសៅរ៍ទី៦ មេសា ស្អែកនេះ សង្វៀនទូរទស្សន៍ប៉ុស្តិ៍លេខ៥ នឹងបើកឱ្យកីឡាករកម្ពុជាមួយរូបប៉ះគ្នាជាមួយជើងខ្លាំងថៃ ខណៈដែលជំនួបប្រកួតនេះ ត្រូវបានអ្នករៀបចំកម្មវិធីបង្ហើបថាធ្វើឡើងដើម្បីស្ទង់មើលសមត្ថភាពរបស់កីឡាករកម្ពុជាដែលជាជើងថ្មីទើបឡើងកូដប៉ុន្មានប្រកួតចុងក្រោយ។
ប្រភពពីអ្នករៀបចំកម្មវិធីព្រឹត្តិការណ៍ ប្រដាល់ជើងឯក TV5 Boxing Knock Out Series By K-Cement រដូវកាលទី៥ បានអះអាងថា កីឡាករវ័យក្មេង ធន មករា(តាញ់ មករា) ត្រូវបានគេកត់សម្គាល់ថា ទើបតែឡើងកូដមួយរយៈចុងក្រោយនៅក្នុងពិភពប្រដាល់ទើបក្លាយជាគូឯកនៅក្នុងការប្រកួតមួយនេះ ។
ធន មករា ទើបតែទទួលបានការចាប់អារម្មណ៍ក្រោយពីបានចូលប្រកួតជើងឯករបស់ប៉ុស្តិ៍លេខ៥មុននេះប៉ុណ្ណោះ ដោយទោះជាគេបរាជ័យតំណែងជើងឯក ប៉ុន្តែសន្ទុះឡើងកូដក៏នៅតែមាន។
កីឡាករកម្ពុជារូបនេះ ហាក់មិនសូវធ្វើឱ្យអ្នក គាំទ្រទុកចិត្តទាំងស្រុងនោះទេ ទើបការដាក់ឱ្យប្រកួតជាមួយកីឡាករថៃនៅថ្ងៃសៅរ៍នេះត្រូវគេចាត់ទុកថាជាការប្រកួតដើម្បីស្ទាបស្ទង់សមត្ថភាពមួយថ្មី ដើម្បីចង់ដឹងថា តើកីឡាកររូបនេះនៅខ្លាំងក្រោយពេលឡើងកូដ ឬក៏បណ្ដោយឱ្យធ្លាក់ដៃក្នុងប៉ុន្មានសប្ដាហ៍នេះបាត់ទៅ ហើយ។
ការប្រកួតដែលនឹងចាប់ផ្ដើមពីម៉ោង៦ល្ងាចស្អែកនេះ កីឡាករកម្ពុជាត្រូវបានគេចាប់អារម្មណ៍ហួសប្រមាណក្រោយពីមានការប្រកាសថា តម្រូវឱ្យស្វាគមន៍ជើងខ្លាំងមកពីប្រទេសថៃ Yorth Katangou ដែលអ្នកណាៗ ក៏ស្គាល់ថាជាជើងខ្លាំងវ័យក្មេងហើយធ្លាប់ប្រកួតឈ្នះកីឡាករកម្ពុជាកន្លងមក ។ វត្តមានកីឡាករទាំងកម្ពុជា និងថៃ ក្នុងសប្ដាហ៍នេះ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈមិត្តភាពក្នុងស្រុកទេត្រូវបានគេអះអាងថាមានការសម្រាំងយ៉ាងពិសេស ដើម្បីឱ្យអ្នកទស្សនាកាន់តែកន្ត្រាក់អារម្មណ៍ ក្នុងពេលដែល សប្ដាហ៍នេះគឺជាការប្រកួតរវាងអ្នកមានឈ្មោះប្រកួតទាំង៤នាក់ក្នុងវគ្គជម្រុះលើកដំបូងសម្រាប់សប្ដាហ៍ទី៤ ក្នុងចំណោមបេក្ខភាពទាំង៣២រូប ដែលជ្រើសយកមកឱ្យប្រកួតវគ្គថ្មីនោះផង។
លោក សេង កដិកា អ្នករៀបចំការប្រកួត បានបញ្ជាក់ថា សមាសភាពខាងកម្ពុជា សម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ ធន មករា ដោយសារតែកីឡាកររូបនេះស្ថិតក្នុងការតាមដានធំមួយដើម្បីប្រាកដថា ក្រោយពេលគេឡើងគូឯកអន្តរជាតិ តើគេខ្លាំងបន្ថែមទៀត ឬធ្លាក់ដៃ ។ លោកសម្រេចដាក់ឱ្យប្រកួតជាលក្ខណៈអន្តរជាតិក្នុងសប្ដាហ៍ប្រកួតជម្រុះរវាងកីឡាករខ្លាំងៗលើកនេះព្រោះតែចង់ដឹងតើកីឡាករនេះល្អ ឬមិនល្អ ។
មុនពេលផ្គូផ្គង លោកក៏បានកំណត់ឱ្យកីឡាករកម្ពុជារូបនេះ ហ្វឹកហាត់ជាប់លាប់មិនតិចជាង១សប្ដាហ៍ផងដែរ ទើបលោកយល់សមាសភាពរបស់កីឡាករកម្ពុជាមួយនេះ គ្រប់គ្រាន់សម្រាប់ឱ្យប៉ុស្តិ៍លេខ៥ដាក់ប្រកួតជាលក្ខណៈអន្តរជាតិ នៅថ្ងៃសៅរ៍នេះបាន ។ លោកថា កីឡាករកម្ពុជា និងថៃ សុទ្ធតែត្រូវបានអះអាងថា មានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។
មួយគូនេះ មានការចាប់អារម្មណ៍ភាគច្រើន ថានឹងមានអ្នកស្នេហាវិស័យប្រដាល់ជក់ចិត្ត ដោយសារជាបទពិសោធន៍ កីឡាករកម្ពុជាធន មករា ត្រូវបានគ្រូបង្វឹកធានាថា មិនសូវមានទម្លាប់ឡើងវ៉ៃលាក់ដៃ ទើបលោកផ្ដល់ឱកាសដោយពេញចិត្ត ។
លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាងកីឡាករទាំង២លោកជឿជាក់ថានឹងទទួលបានការគាំទ្រខ្ពស់ ដោយសារកីឡាករថៃលោកស្គាល់ថ្វីដៃច្បាស់ហើយថា មិនធម្មតា ហើយសម្រាប់កីឡាករកម្ពុជា វិញ ក៏ល្អស្ថិតក្នុងទំនុកចិត្តលោកតាំងពីមុនផ្គូផ្គង ។
យ៉ាងណាមិញ លោកថា កីឡាករកម្ពុជាដ្បិតថារូបលោក និងអ្នកគាំទ្រទុកចិត្តពីសមត្ថភាពយ៉ាងហ្នឹង តែបើគេប្រកួតមិនល្អ ឬមិនអស់ពីសមត្ថភាព ក៏ពិតជារងការរិះគន់មិនតិចដែរ ។ ដោយឡែកសម្រាប់គូប្រកួតជម្រុះដណ្ដើមយកកៅអី២នាក់ក្នុងសប្ដាហ៍នេះ ត្រូវបានគេអះអាងថាសុទ្ធតែត្រៀមខ្លួនរួចរាល់មុនការឡើងរេញ ដែលក្នុងវគ្គកន្លងមកគឺល្អមើលរួចស្រេចទៅហើយ ៕
ចែករំលែកព័តមាននេះ