រាជធានីភ្នំពេញ ៖ តាមទ្រឹស្ដីកីឡា បាននិយាយថា ការហាត់កីឡាគឺជាផ្នែកមួយ យ៉ាងសំខាន់ក្នុងជីវភាពប្រចាំថ្ងៃរបស់មនុស្ស ដោយសារវាជួយទ្រទ្រង់ទាំងសុខភាពផ្លូវកាយ និងផ្លូវចិត្ត ធ្វើឱ្យអ្នកហាត់កាន់តែមានប្រាជ្ញា ឈ្លាសវៃ គិតអ្វីបានលឿនជាងអ្នកមិនបានហាត់។ កីឡាតេក្វាន់ដូក៏ជាផ្នែកមួយយ៉ាងសំខាន់នៅក្នុងទ្រឹស្ដីកីឡានេះដែរទើបធ្វើឱ្យកីឡាមួយនេះកាន់តែទទួលបាននូវការពេញនិយមហ្វឹកហាត់ពីសំណាក់យុវវ័យជាពិសេសនារីវ័យក្មេងកាន់តែមានទំនោរចូលហ្វឹកហាត់ច្រើនឡើងនាពេលបច្ចុប្បន្ន ។ តើការហាត់កីឡាមួយនេះផ្ដល់ផលប្រយោជន៍អ្វីខ្លះដល់នារីវ័យក្មេងទាំងនោះ?
កញ្ញាឈឿម អាលីហ្សា អាយុ១៨ឆ្នាំ ជាប្អូនស្រីបង្កើតរបស់កីឡាការិនី ឈឿម ពុទ្ធារីម បានប្រាប់ឱ្យដឹងថា ការហាត់តេក្វាន់ដូមិនត្រឹមតែជួយធ្វើឱ្យសុខភាពរឹងមាំប៉ុណ្ណោះទេ ថែមទាំងជួយការពារខ្លួននិងបង្កើនសម្រស់ថែមទៀតផង ។ នាងបានចូលហាត់តេក្វាន់ដូអស់រយៈពេល៤ឆ្នាំមកហើយដោយទទួលបានការគាំទ្រនិងលើកទឹកចិត្តពីក្រុមគ្រួសារ របស់នាងទៀតផងហើយមកដល់បច្ចុប្បន្ននាងបានជាប់នៅក្នុងក្រុមជម្រើសជាតិឈុត ធំទៀតផង ។
នាងថា ការហាត់តេក្វាន់ដូ បានជួយឱ្យនាងមានសុខភាពល្អ មានកម្លាំង មាំមួន ប្រាជ្ញាឈ្លាសវៃ គិតអ្វីក៏បានលឿនដែរ ។ ជាងនេះទៀត វាជួយបង្កើនសម្រស់ដែលនារីទាំងអស់ប្រាថ្នាចង់បានសូម្បីរាងកាយក៏ស្រឡូន បើប្រៀបធៀបពេលមិនទាន់ហាត់គឺខុសគ្នាឆ្ងាយណាស់ ។ នាងចំណាយពេលហាត់១ថ្ងៃត្រឹមតែ១ម៉ោងប៉ុណ្ណោះ គឺចាប់ពីម៉ោង៥និង៣០នាទីរហូតដល់ម៉ោង៦និង៣០នាទីល្ងាច ។
ចំណែកកញ្ញា ស៊ឹម រចនា និងស៊ឹម វឌ្ឍនា ជាបងប្អូនបង្កើតនឹងគ្នាបានលើកឡើងស្រដៀងគ្នានឹងកញ្ញាឈឿម អាលីហ្សាដែរ ។ កញ្ញា ទាំងពីរបាននិយាយថា ពួកនាងស្រឡាញ់ចូល ចិត្តកីឡាតេក្វាន់ដូតាំងពីនៅតូចម្លេ៉ះ ។ ដំបូងឡើយនាងបានលួចមើលគេហ្វឹកហាត់ក្នុងក្លិប មួយនៅក្បែរផ្ទះដោយពួកនាងបានប៉ងទុក ក្នុងចិត្តថា ពេលនាងមានឱកាសនឹងចូលហ្វឹក ហាត់ឱ្យទាល់តែបានហើយគោលបំណងនេះ ក៏បានសម្រេច។
ស៊ឹម រចនា ដែលមានអាយុជាង២០ឆ្នាំទៅហើយនោះ បានប្រាប់ថា នាងចូលហាត់តេក្វាន់ដូបានប្រហែល៥ឆ្នាំ ហើយសព្វថ្ងៃនាងជាកីឡាការិនីក្នុងក្រុមជម្រើសជាតិឈុតធំដែល កំពុងទទួលការបង្ហាត់ផ្នែកបង្ហាញកាតាពីលោក គ្រូជនជាតិកូរ៉េដោយផ្ទាល់ ។
នាងបានបង្ហើប ពីគោលបំណងចូលហាត់តេក្វាន់ដូថា គឺដើម្បីមុខមាត់គ្រួសារនិងប្រទេសជាតិនៅពេលប្រកួតដណ្ដើមបានមេដាយនៅលើឆាកអន្តរជាតិ ហើយអ្វីដែលសំខាន់ជាងគេគឺដើម្បីសុខភាពតែម្ដង។នាងថា ពេលនាងមិនទាន់មកហាត់តេក្វាន់ដូ សុខភាពរបស់នាងមិនសូវល្អទាល់តែសោះ ហើយសម្រស់ក៏មិនសូវស្អាតដូចសព្វថ្ងៃនេះដែរ។
ចំណែកកញ្ញាស៊ឹម វឌ្ឍនាវិញ មិនបាននិយាយច្រើនទេគ្រាន់តែនាងប្រាប់ថា អ្វីដែលបងស្រីនាងបាននិយាយគឺមិនខុសពីនាងគិតប៉ុន្មាននោះទេ ៕
ចែករំលែកព័តមាននេះ