ខេត្តក្រចេះ ៖ គ្រោះថ្នាក់ចរាចរណ៍ដ៏រន្ធត់បំផុតមួយ ដោយរថយន្តមួយគ្រឿងបើកមានល្បឿនយ៉ាងលឿនស្រាប់តែជ្រុលរេចង្កូតបុកចូលក្រោមផ្ទះអ្នកភូមិ ស្ថិតក្បែរចិញ្ចើមផ្លូវបណ្តាលឱ្យមនុស្ស២នាក់ស្លាប់ភ្លាមៗយ៉ាងអាណោចអាធ័ម ដែលហេតុការណ៍កើតឡើង កាលពីវេលាម៉ោងរសៀលថ្ងៃទី០៣ មេសា ស្ថិតលើផ្លូវលេខ៧ ត្រង់ចំណុចភូមិអូរតាណឹង ឃុំក្បាលដំរី ស្រុកសំបូរ ហើយនគរបាលចរាចរណ៍កំពុងសន្និដ្ឋានថា គឺបង្កឡើងដោយខ្លួនឯងក្នុងពេលអ្នកបើកបររូបនេះងងុយដេកខ្លាំង ។
សេចក្តីរាយការណ៍បន្តថា ករណីនេះ គឺបង្កឱ្យមានបុរសពីរនាក់បានស្លាប់ ម្នាក់ឈ្មោះ ឌិន ឌីណា ជាអ្នកបើក និងម្នាក់ទៀតឈ្មោះ ឌិន ម៉េងហ៊ាង ។ ហើយមានអ្នករួមដំណើរប្រុស-ស្រីពីរនាក់ផ្សេងទៀត តែរងរបួសធ្ងន់ ។ ជនរងគ្រោះទាំងបួននាក់ មានទីលំនៅក្នុងសង្កាត់ឡាបានសៀក ក្រុងបានលុង ខេត្តរតនគិរី ។
ប្រភពបន្តថា រថយន្តខាងលើធ្វើដំណើរចេញពីខេត្តរតនគិរី បំណងទៅធ្វើបុណ្យសែនផ្នូរ(ឆេងម៉េង)នៅក្រុងសួង ខេត្តត្បូងឃ្មុំ ដោយរថយន្តធុនបាឡែន មនុស្សជិះ៤នាក់ (ស្រី១នាក់) ។ នគរបាលចរាចរណ៍និយាយថា តាមអ្នកឃើញហេតុការណ៍នេះប្រាប់ថា រថយន្តមួយគ្រឿងនេះ បានបើកបោះពួយលឿន
និងបានរចង្កូតធ្លាក់ទៅចិញ្ចើមផ្លូវ បុកចូលទៅក្រោមផ្ទះអ្នកភូមិ ដែលលក់គ្រឿងទេសនៅក្បែរចិញ្ចើមផ្លូវ កៀបរថយន្តនៅក្រោមផ្ទះឈើ ហើយជនរងគ្រោះដែលស្លាប់ទាំងពីរនាក់ គឺត្រូវឈើបាក់បុកកៀងជាប់
ក្នុងរថយន្តស្លាប់បាត់បង់ជីវិតភ្លាម។
គួររំលឹកដែរថា ស្ថានភាពគ្រោះថ្នាក់ចរាចរណ៍ ដែលបានកើតមានឡើងក្នុងអំឡុងរយ ៈពេលប៉ុន្មានខែចុងក្រោយនេះត្រូវមើលឃើញថា បានកើតឡើងជាញឹកញាប់ណាស់នៅតាមបណ្តោយផ្លូវជាតិលេខ៧ ក្នុងស្រុកសំបូរនេះ ។ ហើយរាល់គ្រោះថ្នាក់ចរចារណ៍ គឺតែងតែមានមនុស្សស្លាប់ជានិច្ច ។
ដូច្នេះ សូមបងប្អូនជាអ្នកដំណើរទាំងអស់ចូលរួមប្រុងប្រយ័ត្ន ដើម្បីការពារជីវិតយើង និងជីវិតអ្នកដទៃ
ផង ។
ចែករំលែកព័តមាននេះ