រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា រថយន្តក្រឡុកស៊ីម៉ង់ត៍មួយគ្រឿងត្រូវបានភាគីខាងម៉ូតូមួយគ្រឿងជិះគ្នា២នាក់ដេញតាមឃាត់ ខណៈភាគីខាងម៉ូតូអះអាងថា ភាគីខាងរថយន្តក្រឡុកស៊ីម៉ង់ត៍បើកបរបំរុងបំបុក បង្កឱ្យមានការភ្ញាក់ផ្អើលកាលពីវេលាម៉ោង៣និង៥១នាទីរសៀលថ្ងៃទី៣ មេសា ឆ្នាំ២០១៩ ស្ថិតនៅចំណុចខាងត្បូងស្តុបស្ពានអាកាសផ្សារដីហុយ សង្កាត់ទឹកថ្លា ខណ្ឌសែនសុខ ។
ភាគីខាងរថយន្តក្រឡុកស៊ីម៉ង់ត៍ ពណ៌ស ពាក់ស្លាកលេខ ភ្នំពេញ ៥A-២៣៨៤ បើកបរដោយឈ្មោះអែល ហាយ ភេទប្រុស អាយុ៣៤ឆ្នាំ មានទីលំនៅភូមិក្រសាំង ឃុំច្រេស ស្រុកមេសា ខេត្តព្រៃវែង ។ ចំណែកភាគីខាងម៉ូតូមួយគ្រឿងម៉ាកស្គូពី ពណ៌លឿង ជិះដោយបុរស២នាក់ត្រូវជាបងប្អូននឹងគ្នា មិនត្រូវបានស្គាល់អត្តសញ្ញាណ ។
តាមប្រភពពីអ្នកបើកបររថយន្តក្រឡុកស៊ីម៉ង់ត់បានអះអាងថា គាត់គ្មានចេតនាបើកបររថយន្តបុកនោះទេ ហើយមុនពេលកើតហេតុ គាត់បានធ្វើដំណើរតាមផ្លូវណតប្រ៊ីដ ក្នុងទិសដៅពីត្បូងទៅជើង ហើយក៏បានវ៉ារថយន្តធុនធំមួយគ្រឿងទៀត រួចក៏ជ្រុលបំរុងបុកម៉ូតូម៉ាកមួយគ្រឿងម៉ាកស្គូពីដែលជិះដោយបុរស២នាក់ លុះក្រោយមកត្រូវបុរសទាំង២នាក់នោះជិះម៉ូតូដេញតាមរថយន្តគាត់ រហូតមកដល់ត្រង់ចំណុចស្តុបខាងលើក៏ប្តឹងសមត្ថកិច្ចឱ្យជួយឃាត់ ដោយបុរស២នាក់បងប្អូននោះបានចោទប្រកាន់ថា រថយន្តក្រឡុកស៊ីម៉ង់ត៍បើកបរប៉ុនប៉ងបើកបំបុក ។
តាមសេចក្តីរាយការណ៍បានបន្តថា គិតមកត្រឹមវេលាម៉ោង៤និង៣នាទីរសៀលថ្ងៃដដែល ភាគីទាំងសងខាងកំពុងតែប្រកែកគ្នាយកត្រូវរៀងៗខ្លួន ដោយមានខាងតំណាងរថយន្តក្រឡុកស៊ីម៉ង់ត៍ ព្រមទាំងឪពុករបស់បុរស២នាក់បងប្អូនជាភាគីខាងម៉ូតូដែលចោទប្រកាន់ថា រថយន្តក្រឡុកស៊ីម៉ង់ត៍បំរុងបើកបំបុក ចំណែកភាគីខាងរថយន្តនិយាយថា គាត់គ្មានបំណងបើកបំបុកនោះទេ ហើយក៏មិនទាន់បុក និងមិនទាន់បង្ករបួសស្នាមអ្វីដែរ ហេតុអ្វីក៏មកឃាត់រថយន្តគាត់? ចំណែកភាគីខាងម៉ូតូបានអះអាងថា បើកបរថយន្តធ្វេសប្រហែស ទោះបីមិនបានបុកក៏ជាសុជីវធម៌មួយក្នុងការបើកបរផងដែរ។
តាមសេចក្តីរាយការណ៍បានបន្តទៀតថា មកដល់វេលាម៉ោង៤និង២៦នាទីថ្ងៃដដែលនេះ បន្ទាប់ពីមានការជជែកគ្នាយ៉ាងតឹងសរសៃករវាងភាគីទាំងសងខាងរួចមក គោលបំណងភាគីខាងម៉ូតូបានសំណូមដល់សមត្ថកិច្ចឱ្យនាំយករថយន្ត និងអ្នកបើកបរទៅពិនិត្យជាតិអាកុល និងពិនិត្យរកសារធាតុញៀន និងធ្វើការសុំទោសជាលាយលក្ខណ៍អក្សរ ព្រោះតែការបើកបរថយន្តនោះគ្មានសុជីវធម៌ បើកបរក្នុងល្បឿនលឿន ហើយវ៉ាជែងបង្កការភ័យខ្លាចដល់អ្នកដំណើរ ។ ចំណែកភាគីខាងរថយន្តក្រឡុកស៊ីម៉ង់ត៍ក៏បានឯកភាពឱ្យយករថយន្តក្រឡុកស៊ីម៉ង់ត៍ទៅខណ្ឌសែនសុខហើយដែរ ។ ព័ត៌មានលម្អិតនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ