តាម​ប្រភព​ព័ត៌មាន Tuko បានឱ្យ​ដឹង​ថា មិត្ត​ស្រី​របស់​កីឡាករ​ព័រ​ទុ​យ​ហ្កា​ល់ Cristiano Ronaldo នាង Georgina Rodriguez បាន​បដិសេធ​មិន​ទទួលស្គាល់​ការ​លើក​ឡើង​ថា នាង​មាន​ផ្ទៃពោះ​។

យោង​តាម​សម្តី​របស់​តារា​បង្ហាញ​ម៉ូ​ដ​ជនជាតិ​អា​ហ្ស​ង់​ទី​ន​អាយុ​២៥​ឆ្នាំ​រូប​នេះ បានឱ្យ​ដឹង​ថា ដោយសារ​តែ​ការ​ឡើង​ទម្ងន់​របស់​នាង បាន​ធ្វើ​ឱ្យ​គ្រប់​គ្នា​មានការ​យល់​ច្រ​លំ​ថា​នាង​មាន​ផ្ទៃពោះ​។ ការ​ឡើង​ទម្ងន់​នេះ គឺ​បង្ក​ឡើង​ដោយសារ​តែ​ការ​បរិភោគ Pasta ច្រើន​ពេក​។

មាន​ព័ត៌មាន​ជា​ច្រើន បាន​រាយការណ៍​ថា នាង​កំពុង​តែ​មានកូន​ទី​ពីរ​ជាមួយនឹង​កីឡាករ​ប្រយុទ្ធ​របស់​ក្លិប Juventus​។ ពេល​និយាយ​នៅ​ក្នុង​បទ​សម្ភាសន៍​ជាមួយនឹង​ទស្សន​វ​ដ្តី​អេ​ស្ប៉ា​ញ Hola នាង​បាន​និយាយ​ថា​៖«​ខ្ញុំ​កន្លង​មក បាន​ធ្វើ​ដំណើរ​តាម​យន្តហោះ​ចុះឡើង​ៗ ហើយ​ត្រូវ​ញ៉ាំ Pasta នៅ​លើ​នោះ​រហូត​»​។

គួរ​បញ្ជាក់​ផង​ដែរ​ថា Georgina បាន​ផ្តល់​កំណើត​ឱ្យ​កូនស្រី​របស់ Ronaldo ឈ្មោះ Alana Martina នៅ​ថ្ងៃ​ទី​១២ ខែវិច្ឆិកា ឆ្នាំ​២០១៧ ជាមួយនឹង​ការ​បង្ហោះ​រូបថត​លើ Instagram ថា​៖«Alana Martina ទើបតែ​កើត​! ទាំង Geo និង Alana គឺ​មាន​ភាព​ប្រសើរ​ណាស់​! ពួក​យើង​ទាំងអស់​គ្នា​សុទ្ធតែ​សប្បាយចិត្ត​»៕